Read Timugon Murut 2 MAKABI 5 Bible Online

2 MAKABI 5 - Timugon Murut bible

2 MAKABI 5

¹Olo'-olo' bulintok raginio Raja' Antiokus ondo' Kaapat nakatampos koson mamulunsar ra Misir ra kainduo.

²Mamaar apat ngoopor ngoorou buoi no ulun giu' ra titikop ru bandar Jirusalim nakaalap ra pinaintalang intor ra pulalai mangkuda ondo' giu' ra limbowon. Ulun-ulun nangura' ra kuda no nambayang ra mas am mokoondo' ra tutura',

³am niayuk ilang ra pinatalang. Pulalai-pulalai no nagilong ra rondo' am bokon am nampatoi ra rondo' am bokon. Perisai-perisai magigingku', masuang tutura' am panah pinapatir. Ngaangai' kaukapan am bayang basi' mangayou ra mas makapiniat ralalom ru sinda mato ru orou.

⁴Ngaangai' ulun nakiasi' gama' ru pinaintalang no rondo' tatandu' moonsoi.

⁵Paat ra tanou kalo motopot ra Raja' Antiokus minatoi nakatabual, nanimung i Jason ra nasailan intor ra saribu ngaulun ra namulali' nangayou ra bandar Jirusalim. Binulunsar nilo pulalai magalung ra bandar saboi liminugut, am ginaau nilo bandar no. Nagiru' i Minilaus giu' ra kubu ru bandar,

⁶kaa' i Jason am pulalai nano ra kolondo' guang makaasi' nampalamba' ra ulun ru Jaudi, bansa' nilo galama'. Kalo nalimanan ri Jason ra kamanangan ra bansa' nano galama' sotopot no kakalaan ondo' maayo kaga'. Indoson no nasugutan nano namanang ra pantula', am sala' ka rondo' kakalaan ra tayar ru bansa' nano galama'.

⁷Kaa' kalo nakasugut io giminaau ra kuasa'. Suai no boo kalaatan no ra pupus no nampakauyu' ayuk riso, am nagiru' io kalalaat siminaguli' ra pagun Amon.

⁸Paliso nano ondo' malaat pinupusan ra nasip ragitio: Kopongo inaput ri Aritas, iono panguasa' ru ulun Arab, nagiru' io intor ra bandar mongoi ra bandar ra bokon, inilou-ilou ru ngaangai' ulun, kasisangin koson ra ulun minanggal ra ukum, kinara' ra malaat koson ra ulun liminaat ra bansa' nano galama', am pupus no pinatiran giu' ra Misir.

⁹Kopongo raginio minongoi io ra Junani ra malansan makisindung ra ulun Sparta ondo' lakat poyo mabubukat ra ulun ru Jaudi. Pupus no ulun ondo' nampajajal ra masuang ulun rondo' bansa' riso nagiru' intor ra pagun nilo, minatoi koson ra ulun ilowon giu' ra pagun ru bansa' ra bokon.

¹⁰Namatoi i Jason ra masuang ulun am nompoloso ra baangkai nilo kalo linobong. Raino io galama' kalo sinulabayan, kalo linobong am kalo nakaalap ra intok giu' ra kalabangan ru kinamatuaan nano.

¹¹Pokorongog Raja' Antiokus ra ngaangai' ondo' nasauk giu' ra Jirusalim, indoson no pagun ru Judia giminuor noyo. Ra siminangit kaga' io nangiruan ra Misir am nampagaau ra bandar Jirusalim ra pamulunsaran moporos kaga'.

¹²Namarinta io ra saujor-saujor maa' raginio kolondo' guang makaasi' mamuso ra moonong ulun ondo' mauma', am mamatoi ra osoi ayuk ondo' magiru' intor ra baloi.

¹³Ngaangai' ulun pinatoi: ungkuyon am ruandu', lalaing ungkuyon am ralaa-ralaa, am niayuk lalagang-lalagang.

¹⁴Ralalom buoi talu ngoorou, Jirusalim napusaan ra 80,000 ngaulun: 40,000 minatoi ra pinatoi ralalom namulunsaran no am masuang poyo ondo' tinalan koson ra ulipon.

¹⁵Kaa' Raja' Antiokus lakat poyo kalo nasamaan, io pana baani siminubol ra ralalom Baloi ru Tuhan ondo' mapasau kaga' ra titikop ru tana' ti. Tiningganai io ri Minilaus, ulun ondo' liminaat ra ukum am bansa' nano.

¹⁶Nabaya' ra kalindu' ondo' makaruruko am majamol, inalap ru raja' parabut-parabut ondo' mapasau am nampagaau ra kuliamos-kuliamos ondo' pinataak ru raja'-raja' koson mamparuang ra kaantakan am katulayan ra Baloi ru Tuhan.

¹⁷Raja' Antiokus liminimbau kaga' ra namanangan nano ra kalo nakaliman ra Io Ondo' Maayo Kaga' Kuasa' nompoloso ra Baloi Nano jinamalan sabap ra tula ru mamagun Jirusalim nampasangit Riso sangkinolor.

¹⁸Amon ru kalo naralaat mamagun ru bandar no ra ralalom ru tula ra masuang kaga', maaru' Raja' Antiokus inggalarin intor ra mambaal ra baal jajajou no am ukumin, nogondo' koson ri Giliodorus ondo' sinusub ru Raja' Siliukus koson mangimumui ra intok kausinan.

¹⁹Tuhan kalo nampili' ra ulun Nano sabap ra Baloi Nano, kaa' nambaal ra Baloi Nano sabap ra ulun Nano.

²⁰Ginio ra Baloi ru Tuhan nakaaya' nalumpa' ra kaimbalaan ru ulun, kaa' kalupus raginio nakaaya' niayuk nakaalap ra kaansayan nababaya' ra ulun. Tuhan Ondo' Maayo Kaga' Kuasa' nangiruan riso paat io siminangit, kaa' napatapuli' ra katulayan nano paat ra sangit Nano nakalinos.

²¹Raja' Antiokus nagaut ra 61,200 ngakilogram pirok intor ra Baloi ru Tuhan, am nalingas minongoi ra Antiokia. Sabap ra malilimbau kaga', indoson ru raja' makapanusub ra kapal-kapal masundoi ra lantur, am pulalai ru saujor mantana' giu' ra raat.

²²Pinasauk ru raja' gabenor-gabenor koson mangimbolo' ra mamagun. I Pilipus intor ra Prigia ondo' malaat poyo intor ra Raja' Antiokus galama', pinasauk ra gabenor ru Jirusalim.

²³I Andronikus pinasauk ra gabenor ru libung Girijim. Suai raginio i Minilaus niayuk malaat poyo pinamakuan nano ra bansa' galama' intor ra gabenor-gabenor no, sabap ra masisang io kaga' ra ulun ru Jaudi.

²⁴Raja' Antiokus nangator ri Apolonius am saujor nano suang 22,000 ngaulun intor ra Misia, minongoi ra Jirusalim. Sinusub ilo koson mamatoi ra ngaangai' ungkuyon giu' ra bandar no am nantalan ra ruandu' am lalaing-lalaing.

²⁵Nakasaboi i Apolonius giu' ra Jirusalim am nambaal-baal ra paliso mobonsoi. Naginaa io polos ra orou Sabat, am paat nakakito ra ulun ru Jaudi giminagaya' ra orou tangusan nilo, nanusub io ra pulalai nano mambaal ra mugar ra guguluyur mananggal ra kinandoi mangayou.

²⁶Masuang ulun minatong ra giu' no koson magilong ra ulun guguluyur no. Pulali' ri Apolonius nanusub ra pulalai nano koson mamatoi ra moonong ulun nagilong no. Pulalai no liminiput ra bandar am namatoi masuang ulun.

²⁷Kaa' i Judas Makabi nababaya' ra olo'-olo' mopor ngaulun nagiru' ra tana' kaagisan am naayag ra giu' koson ra bibiag masigo. Nangakan ilo ayuk ra tutuu'-tutuu' maa' raginio kalo mampajamol ra inan.