Read Timugon Murut 2 MAKABI 6 Bible Online

2 MAKABI 6 - Timugon Murut bible

2 MAKABI 6

¹Kalo nabuoi kalupus raja' nanusub ra sangulun Atina ondo' matutuo noyo koson mampajajal ra ulun ru Jaudi mangiruan ra ugama am kaulayan ru kinamatuaan nilo.

²Io niayuk sinusub koson mampajamol ra Baloi ru Tuhan giu' ra Jirusalim am paluntukon ra Dewa Jius[11] Olimpios. Suai raginio baloi sambayangan giu' ra Gunung Girijim musiti' paluntukon ri Jius Ksinios, dewa ru ulun bansa' ra bokon, nontopot ra kitaak ru mamagun ondo' minayan ra giu' no.

³Kalaatan no nasauk ra saanin ondo' maagat am mapagon ra mamagun.

⁴Baloi ru Tuhan nososok ra ulun bansa' ra bokon ondo' minunsag ra jajajou am nagiginum am jajajou paliso. Narurulug ilo ra ulun-ulun mantalan ra inan am narulug ra ruandu'-ruandu' giu' ra liliut mapasau. Kuliamos-kuliamos inggalarin inibit siminubol ra ralalom Baloi ru Tuhan.

⁵Altar binujukan ra taak-taak simbalui ra susuai ondo' inggalarin ru Ukum takau.

⁶Ulun kalo boo makapangiantak ra orou Sabat am orou-orou pangiantakan ra bokon sumugut ra kaindalaman ru kinamatuaan, mulu' poyo ra ulun kalo iowon mangiou ra ilo ulun ru Jaudi.

⁷Moonong sila' paat ra orou naganakan ra raja', ulun ru Jaudi jinajalan ra malaat koson mangakan ra tinai' ru bibiag ra taak simbalui; am paat ra pangiantakan koson mangurumat ri Dionisius, dewa ru anggur, jinajalan ilo maya' mugar ra ulun guguluyur am ulu nilo sikatin ra raun.

⁸Nasusuk ra ragu ru ulun Ptolimais, iningkual aturan ra bandar-bandar Junani giu' ra liliut no ra ulun ru Jaudi ondo' soroi ra giu' no musiti' mangakan ra bunsag ru taak simbalui.

⁹Moonong ulun ru Jaudi ondo' marara' maya' ra ralan kaayagan ru ulun Junani musiti' potoyon. Makito ru ulun baal ra makalalaa' lumumpa'.

¹⁰Koson ra ruo ngaulun ruandu' rinalaat ra pangakiman sabap sinunatan anak nilo. Pinaliput ilo ra bandar am anak-anak nilo tinair ra titi' nilo. Kopongo raginio pinatiran ilo intor ra rasawat ru timbok ru bandar.

¹¹Rondo' paat ra bokon, binalaan i Pilipus ra kukula' ngaulun ru Jaudi simininok timinimung giu' ra luang-luang batu kalo maalur intor ra giu' koson mangiantak ra orou Sabat. Binulunsar ri Pilipus am nonolob risilo ra biag-biag. Kalo masaga' ilo manggal sabap ra mangurumat ra orou Sabat.

¹²Ulun mambasa' ondo' moonsoi guang, pai' pangkaus sabap ra karaat no. Karaa' noyo ra ukuman-ukuman no kolondo' kuayan ru Tuhan koson mamuso ra bansa' takau, kaa' koson mangila' risilo.

¹³Sotopot no, paat ra ulun ondo' makatula mataki' ukumin am kalo maginaa mabuoi, ginio noyo rondo' tatandu' ru paliso moonsoi guang.

¹⁴Io Ondo' Maayo Kaga' Kuasa' kalo nogondo' pamakuan ritakau koson ra pamakuan Nano ra bansa'-bansa' ra bokon: Nompoloso Io risilo molosor ra ralalom ru tula ra kalo poyo ukumin,

¹⁵liliwa' itakau inukum No ra kalo poyo makatula takau ra masuang kaga'.

¹⁶Ginio ra Tuhan masalok mataau guang ritakau, ulun Nano. Nangimbolo' Io ritakau ra karaat, kaa' kalo igondo' mangiruan ritakau.

¹⁷Nambaal aku ra pangimansaan ragitilo koson ra pampakaraan ayuk. Raino tunggulin takau tunung ti.

¹⁸Mokoondo' sangulun mapandai kaga' ra ukum ondo' nauligan kaga' inggalan no i Iliajar. Matutuo io noyo am lakat poyo maindon kaga' bulos nano. Jinajalan io mampagaal ra kabang koson mangakan ra kual ru bauwi.

¹⁹Kaa' nampili' io koson matoi ra urumaton toojo intor ra maayag ra majamol. Linuka' no kual no, am ra guang masaga' minongoi io ra intok pangimbalaan. Ginio napatiluan moonsoi ra io nanulu' ra musiti' baani takau marara' ra akanon ondo' majamol, iou pana ra makapatoi ra painawo galama'.

²¹Ulun ondo' nanalingapu ra bunsag ru taak simbalui no nabuoi noyo nakaulig ri Iliajar. Sabap raginio simininok ilo nanusub riso maa' raginio magibit ra kual ondo' pinongo no galama' am maakan no, am nambaal-baal ilain koson mangakan io ra kual ru taak simbalui, koson ra nanusuban ru raja'.

²²Koson raginio painawo nano maayag, am moonsoi pamakuan riso sabap ra pabukatan ondo' nabuoi.

²³Kaa' namatas i Iliajar ondo' matulai maaya' ra umur nano ondo' matutuo am urumaton kaga'. Buoi ru bayag nano totopot io giminagaya' ra ukum ri Aki Kapuuno'. Nontopot raginio indagu io, “Potoyo' aku no raino niayuk.

²⁴Namparuungan koson raginio kalo motopot ra ulun matutuo koson raki'. Maagu no masuang boo ulun mangamulok mangkara' ra malupus umur siam ngoopor ngambilor, manding aku ra ralan kaayagan ru ulun bansa' ra bokon.

²⁵Amon ru babaalon ku ayuk koson mampagawar ra kaayagan ti koborok, aku pana mampajajou ra umur kuno am mampalayau ra masuang ulun mamulok.

²⁶Kabalu' pana raino nakalabus aku intor ra ukuman ru ulun, kaa' ru maayag kapoam matoi, kalo makalabus aku intor ra kalindu' ru Io Ondo' Maayo Kaga' Kuasa'.

²⁷Amon ru raino matoi aku ra baani, manulu' aku ra maaya' aku masauk ra matutuo koson ragitio.

²⁸Koson raginio nangani' aku ra tiluan moonsoi ra ulun mamulok maa' raginio matoi ra guang masaga' am maansukan ra ukum-ukum takau ondo' mapasau am matulai.” Kopongo minindagu raginio, narayus io minongoi ra intok pangimbalaan,

²⁹am ulun ondo' sangkinolor poyo ra buoi ti makapaliso moonsoi riso, raino mantula' riso sabap ra sumugut risilo, raitii' ni i Iliajar minindagu koson ra ulun mantuyang.

³⁰Kopongo inimbolo' saboi mamaar matoi, nampalaa i Iliajar ra minindagu, “Tuhan ondo' nompolonggom ra ngaangai' kapandayan ondo' mapasau nakapandai ra makalabus aku intor ra kaimbalaan maagat ti am intor ra kapatayan, kaa' nakapandai Io niayuk ra nansaan aku raginio ra maansukan sabap ra malaa' aku Riso.”

³¹I Iliajar pana minatoi. Kaa' pinatayan nano ondo' baani karaan koson ra tiluan ondo' matulai, sala' ka ayuk ra ulun mamulok, kaa' niayuk ra ngaangai' bansa'.