Read Timugon Murut 2 MAKABI 7 Bible Online

2 MAKABI 7 - Timugon Murut bible

2 MAKABI 7

¹Rondo' kasaukan ra bokon nampalabit ra sangulun ina' ondo' rinakop nababaya' ra tulu' ngaulun anak ungkuyon nano. Ralalom susuban ru raja' inimbolo' ilo ra pitol lalapos am owoi koson mampajajal risilo mangakan ra kual ru bauwi.

²Indagu boo sangulun intor risilo ondo' nasauk ra mindadagu, “Atan kia kasagaan mu raja' intor ramon? Masaga' akai poyo matoi intor ra manggal ra ukum ru kinamatuaan mai.”

³Pokorongog ra ragu raginio siminangit kaga' raja'. Nanusub io maa' raginio pagangan maayo am paliuk-paliuk palasuon.

⁴Nakalasu' noyo, nanusub raja' maa' raginio rila' ru ulun mindadagu no pututon, kungkung ru ulu nano aniton am kalindu' am niayuk kalayam nano pungguon am inilayan ru ina' am koonom-onom ngaulun pabukat nano.

⁵Kopongo pinunggu' ngaangai' no, nanusub raja' maa' raginio guringon io ra biag-biag giu' ralalom ru paliuk. Liliwa' lisun nano siminuang, ina' am pabukat-pabukat nano sigagama' mangikang ra guang maa' raginio matoi koson ra ulun tutumula'. Konilo,

⁶“Tuhan i Aki Kapuuno' takau nakakito am nakarati' ra kaimbalaan takau. Nakapandai takau ra baal raginio intor ra rimbai ri Musa nansawai ra ulun ondo' liminungkang. Kon ri Musa, ‘Tuhan makaasi' ra ulun ondo' mangandoi ayuk Riso.' ”

⁷Kopongo pabukat ondo' kasaa' minatoi ra ralan raginio, ondo' karuo inibit koson imboloon. Inanit nilo kungkung ru ulu nano am pangkuot, “Masaga' kou kia raino mangakan ra kual no? Kapoam polosoon mu akai mamunggu' ra kalindu' am kalayam muno rondo'-rondo'?”

⁸Taam io ralalom ragu nano galama', “Kalo!” Ginio ra imboloo' nilo io koson ra kasaa' no.

⁹Kaa' ra kalo poyo namukat, indagu io ra raja', “Ulun malaat! Sotopot no makapamatoi kou ramon. Kaa' Raja' ru tana' ti am limbowon mamayag ramon saguli' intor ra kapatayan am mangani' ra kaayagan mantilayun, sabap ra matoi akai sabap ra ukum-ukum Nano.”

¹⁰Kopongo raginio pabukat ondo' katalu inimbolo'. Paat ra io sinusub rumilai, nalingas io nambaal raginio. Io pana baani napatutui ra kalindu' nano,

¹¹am kalo nonontol ra minindagu, “Nangani' i Aki Kapuuno' ra kalindu' ti raki'. Kaa' ukum-ukum Nano mologo poyo raki' intor ra kalindu' ti. Nakapandai aku pasagulion ri Aki Kapuuno' raki'.”

¹²Raja' am ngaangai' ulun namaya' riso mangimuag magilong ra kinabaani ru ulun no am kasagaan nano maimbolo'.

¹³Kopongo io minatoi, nangimbolo' ilo ra pabukat ondo' kaapat ra nogondo' laat no.

¹⁴Kaa' ragu-ragu pupus nano ra raja', “Masaga' aku matoi sabap ra malansan akai ra i Aki Kapuuno' mamayag ramon saguli' intor ra kapatayan. Kaa' ra tayar muno kolondo' kaayagan saguli'!”

¹⁵Paat ra pabukat ondo' kalimo inibit koson imboloon,

¹⁶tantangi' no raja' am indagu, “Okou raja' makakuasa' koson mambaal maya' ra kasagaan ru guang galama' ra ulun, kabalu' pana okou niayuk ulun mapandai matoi. Kaa' pai' pangkara' ra i Aki Kapuuno' nangiruan noyo ra bansa' mai.

¹⁷Inaani' ayuk, maaru' makakito kou ra kinaayo ru kuasa' ru Tuhan. Mangimbolo' Io rirun am papag muno.”

¹⁸Pabukat ondo' koonom boo inibit koson imboloon, am ra kalo poyo minatoi kono, “Pai' sasala' pangkaraan. Naimbolo' akai sabap ra kasalaan mai galama'. Makatula akai noyo ri Aki Kapuuno' mai, am sabap raginio nalumpa' ru karaat ti.

¹⁹Kaa' pai' pangkara' ra makaanggal kou ri Aki Kapuuno' ra kalo ukumin.”

²⁰Ondo' makaimuag kaga' iono ina' nilo, am io musiti' karaan ra urumat. Nakakito io ra katulu'-tulu' ngaulun anak nano minatoi ralalom ru songorou. Kabalu' pana raginio, nansaan io raginio ra guang maikang toojo sabap ra malansan io ra Tuhan.

²¹Nabaya' ra baani kaga' kinorondo' no guang ru ina' am guang ra baani ru ungkuyon am nangani' ra guang maikang ra anak nano sigagama' ralalom ragu nano galama'.

²²Kono, “Kalo nakapandai aku ati kulaan akau timinalimpuun naayag ralalom ru binunakan kuno. Sala' ka aku ondo' nangani' ramuyun ra painawo am naayag kapoam napatampos ra moonong tayar ru inan min,

²³kaa' i Aki Kapuuno' ayuk, Io namangun ra tana' ti am limbowon, ondo' nampasauk ra ulun am ngaangai' ondo' soroi. Makaasi' Io am mampasaguli' ra bayag am painawo min ramuyun, sabap kinaatang min ukum-ukum Nano intor ra akau galama'.”

²⁴Indoson ru Raja' Antiokus ra ina' no nagasab riso. Ginio ra minirot raja' koson mangambi' ra anak ru ina' no ondo' pupusan maa' raginio mangiruan ra kaulayan ru kinamatuaan nano. Nambantu' raja' ra ibot am pasaukon anak no ulun langkaya' am moonsoi. Io pana aniin ra kandoi ondo' maatang am pasaukon ra rangan ru raja'.

²⁵Kaa' anak no kalo nampalio ra ragu-ragu ru raja'. Raja' Antiokus pana minirot koson mangambi' ra ina' nano maa' raginio maminson ra anak nano am mamayag ra kaayagan nano.

²⁶Kopongo io jinajalan ra nabuoi, nangiou io.

²⁷Kuung io ra anak nano am namparuung ra panguasa' ondo' masangit no am minindagu ralalom ragu nano galama', “Anak ku, pakaasi' no ra ina' muti ondo' naninai' rirun buoi siam ngansila' am nampatiti' rirun am buoi talu ngambilor. Aku niayuk nampasukor am nagalung rirun saboi orou raiti'.

²⁸Raino totopot kitaakon ku, okou anak kuno, ilai' limbowon am tana' ti am niayuk ngaangai' suang nano. Karaa' noyo ra i Aki Kapuuno' ondo' nampasauk ra ngaangai' no intor ra kolondo'. Koson niayuk ra sinauk No itakau ulun.

²⁹Pai' kalaa' ra ulun mamatoi ti. Pakitono' inan muno koson ra maayo-maayo muno am apuo' noyo patayan ra guang masaga', maa' raginio ralalom guang makaasi' ri Aki Kapuuno', moowot tokou saguli' mababaya' ra maayo-maayo muno paat ra kaayagan saguli'.”

³⁰Kalo poyo nakai' ragu ru ina' no, indagu anak nano, “Atan ondo' inaanin min? Kalo ginagaya' ku susuban ru raja'. Giminagaya' aku ayuk ra inaru' ru Ukum ondo' tinaakan ri Musa ra kinamatuaan takau.

³¹Kaa' okou raja' nangatang noyo ra ngaangai' karaat ra bansa' Ibrani, kalo makalabus intor ra ukuman ri Aki Kapuuno'.

³²Topot Tuhan ondo' naayag nangimbolo' ramon sabap ra tula-tula mai koson mansawai am mampakatanda' ramon. Kaa' sangit Nano kalo mabuoi, sabap ra akai ti ulipon-ulipon Nano, am mobonsoi Io poyo ramon.

³⁴Kaa' okou raja' ondo' makauyuyu' kaga' am malaat kaga' intor ra ngaangai' ulun. Ginio ra pai' lubato' lumimbau guang kapoam masauk ra ulun mamanggo am maruung ra kalansanan ondo' kalo naaruan, kabalu' pana raino kalo makapangukum ra ulipon-ulipon ri Aki Kapuuno'.

³⁵Okou raja' kalo makalabus intor ra pangakiman ri Aki Kapuuno' Ondo' Maayo Kaga' Kuasa' am ondo' makakito ra ngaangai' no.

³⁶Mopongo maimbolo' ra sangkinolor, pabukat-pabukat mai raino maayag ra mantilayun sabap ra nabantuan ri Aki Kapuuno'. Kaa' okou raja' akimin No am aniin ra ukuman ondo' nogondo' ra kinalimbau muno.

³⁷Koson ra maayo-maayo kuno, aku pana nampataak ra painawo am inan kuno sabap ra ukum-ukum ru kinamatuaan mai. Kaa' aku niayuk makitaak ri Aki Kapuuno' maa' raginio mataki' Io manulu' ra guang makaasi' Nano ra bansa' takau, am maa' raginio mangimbolo' Io rirun saboi ra okou mangiou ra Io noyo i Aki Kapuuno' Ondo' Rondo' ayuk.

³⁸Sangit ri Aki Kapuuno' Ondo' Maayo Kaga' Kuasa' nakalumpa' ra bansa' mai ra matimpok. Gama' ru aku am maayo-maayo kuno masauk ra ulun pupus ondo' nalumpa' ra sangit Nano.”

³⁹Pokorongog ra ragu-ragu magasab no, nasingkual sangit ru raja'. Pinamakuan ru raja' ra anak pupusan no malaat poyo intor ra bokon-bokon no.

⁴⁰Koson raginio noyo io minatoi ra kolondo' tula, maayo kaga' pangintapatan ra Tuhan.

⁴¹Ina' no ondo' pupus minatoi nalupus anak-anak nano.

⁴²Sama' noyo tunung kuti intor ra ulun ru Jaudi ondo' jinajalan mangakan ra pagakanan ru taak simbalui am inimbolo' ra pangimbalaan ondo' totopot malaat.