Read Timugon Murut 2 MAKABI 8 Bible Online

2 MAKABI 8 - Timugon Murut bible

2 MAKABI 8

¹I Judas Makabi am ulun minaya' riso simininok minongoi ra kampung-kampung. Nampiau ilo ra ngaangai' pabukat nilo am nanimung olo'-olo' 6,000 ngaulun ru Jaudi ondo' totopot giminagaya' ra ugama nilo.

²Nakitaak ilo ra Tuhan maa' raginio mangindangan io ra ulun Nano am raino inimbolo' ru ngaangai' bansa', am koson makaasi' ra Baloi Nano ondo' jinamalan ru ulun malaat,

³am niayuk maa' raginio makaasi' Io ra bandar Jirusalim ondo' pinuso noyo am mamaar marata' ru tana', am nokorongog ra golok ru ulun ondo' pinatoi.

⁴Nakitaak ilo niayuk maa' raginio manulu' Tuhan ra sisang Nano ra ulun ondo' malaat am mambalos ra binaal ru ulun ondo' nagulas ri Aki Kapuuno' am guang kalo makaasi' namatoi ra lalagang-lalagang ondo' kolondo' sala.

⁵Kopongo ri Judas napatampos ra pulalai nano, bansa'-bansa' ra bokon kalo nakapangala riso sabap ra sangit ru Tuhan ra Israil nakulau noyo ra guang makaasi'.

⁶Namulunsar i Judas ra namulali', am kaindalaman no io nakasugut poyo paat ra rondom. Kampung-kampung am bandar-bandar sinolob no, intok-intok ra moonsoi ginaau no, am masuang pantula' jinajalan no nagiru'. Nauligan kaga' i Judas giu' ra ati-ati intok sabap ra kinabaani nano.

⁸Pakakito i Pilipus ra gabenor Judia, ra i Judas giminaai jalai am masalok mamanang, nanulis io ra surat posoboyon ri Ptolimius, gabenor ru Siria Maayo, am Pinisia maa' raginio matong mangampin ra kaatangan ru pamarintaan.

⁹Nalingas i Ptolimius nampasauk ri Nikanor anak ri Patroklus, sangulun intor ra rangan-rangan ru raja' ondo' maatang. Sinusub i Nikanor mangindangan rondo' pulalai ru saujor 20,000 ngaulun intor ra ngaangai' bansa' koson mamuso ra ngaangai' bansa' ru Jaudi. Pinasauk niayuk ri Ptolimius i Gorgias, panglima ondo' mokoondo' ra masuang nailian ra pangayawan maa' raginio maya'.

¹⁰Raja' Antiokus musiti' mambayar ra cukai 68,500 ngakilogram pirok ra ulun Roma, am i Nikanor makaguang koson mambayar riso am mantalan ra ulun rinakop ru pangayawan ra Jaudi koson ra ulipon.

¹¹Io pana nalingas nangator ra tanou giu' ra bandar-bandar giu' ra igig ru raat ra ilo makapambali ra ulipon-ulipon ru Jaudi ra logo kalo masailan sakilogram pirok sangulun. Kalo nakapandai io ra malumpa' io ra ukuman ri Aki Kapuuno' Ondo' Maayo Kaga' Kuasa'.

¹²Nakapandai i Judas ra tanou ra i Nikanor am pulalai nano nakaugar noyo minongoi ra Jirusalim. Pinatanou ri Judas ra ulun-ulun nano ra saujor ru pantula' mamaar noyo.

¹³Ulun ondo' matalou am kalo mangintopot ra katimpakan ri Aki Kapuuno' pana nagiru' nangiruan ra intok no.

¹⁴Ondo' bokon nantalan ra ngaangai' ondo' lakat poyo soroi risilo am nababaya' nakiasi' ra Tuhan maa' raginio namayag risilo intor ri Nikanor ulun malaat no, ondo' nantalan noyo risilo ra kalo poyo nakatalimpuun pangayawan.

¹⁵Nakitaak ilo, amon ru marara' Tuhan mimbuor sabap risilo galama', Io pana mamayag risilo sabap ra nabantuan ondo' binaal Nano ra kinamatuaan nilo sabap Io, i Aki Kapuuno' Ondo' Maayo am Matulai, nampili' noyo risilo nasauk ra ulun Nano.

¹⁶I Judas pana nanimung ra ulun-ulun nano suang 6,000 ngaulun am nangikang ra guang nilo maa' raginio kalo magalabo am malaa' magilong ra masuang ulun bansa' bokon ondo' matong mangayou risilo ra kolondo' sasaban. Kaa' musiti' ilo mingkotog mangayou ra baani kaga',

¹⁷am kalo makalilian ati kulaan bansa' ra bokon nambaal ra malaat ra Baloi ru Tuhan, nagasab am nangimbolo' ra bandar ru Jirusalim am namuso ra kaulayan ru kinamatuaan.

¹⁸Kon ri Judas, “Malansan ilo ra kandoi mangayou am kinabaani nilo. Kaa' mangintopot takau ri Aki Kapuuno' Ondo' Maayo Kaga' Kuasa' ondo' makapuso sala' ka ayuk pulalai ru pantula' no, mulu' piboo niayuk titikop ru tana' ra igondo' ayuk kuga' ru ulu Nano.”

¹⁹Kopongo raginio nampakara' i Judas risilo ra ngaangai' indangan ru Tuhan bulintok ra kinamatuaan nilo, koson ra paat ri Sanirib, paat ra 185,000 ngaulun pantula' pinuso;

²⁰am ralalom ru pangayawan manggal ra ulun ru Galatia giu' ra Babilonia ondo' nampalabit ra 8,000 ngaulun ru Jaudi ondo' nangindangan ra 4,000 ngaulun ru Makidonia. Paat ra ulun ru Makidonia napisi', 8,000 ngaulun no namatoi ra 120,000 ngaulun ru Galatia am nakaalap ra masuang kuliamos ginaau ra pangayawan. Nakasugut ilo sabap ra indangan ri Aki Kapuuno'.

²¹Ragu-ragu ri Judas napaikang ra guang ru ulun-ulun nano, saboi nakatampos ilo matoi koson ra ugama am pamagunan. I Judas pana nantayar ra saujor nano nasauk ra apat ngantayaran,

²²moonong tayar suang no olo'-olo' 1,500 ngaulun, tiningganai nano galama' am pabukat-pabukat nano iono i Simon, i Jusup am i Jonatan.

²³Nanusub io ri Iliajar mambasa' ra Buuk Kitab am kalupus raginio nangani' ra pulanu pangayawan ragitio, “Mabaya' ra indangan ri Aki Kapuuno' ”. Io galama' pana naningganai ra tayar kasaa' manggal ri Nikanor.

²⁴I Aki Kapuuno' Ondo' Maayo Kaga' Kuasa' soroi risilo. Ginio ra nakasugut ilo namatoi ra nasailan intor ra 9,000 ngaulun saujor ru pantula' am namilat ra santayaran maayo saujor ri Nikanor. Ngaangai' saujor ri Nikanor pana jinajalan nagiru'.

²⁵Nampagaau ilo niayuk ra ruit ru ulun ondo' minatong koson mambali risilo koson ra ulipon. Ilo pana nangilou ra pantula' saboi maalur kaa' musiti' ilo sumaguli' sabap ra jam kalo boo maawar.

²⁶Sabap ra paat raginio mamaar noyo rondom ru Sabat.

²⁷Kopongo nanimung ra kinandoi mangayou am nampagaau ra ngaangai' kuliamos ru pantula', nangiantak ilo ra Sabat. Nongompor ilo ra Tuhan am naringkuanang Riso sabap nanindung Io risilo saboi orou raginio am timinalimpuun noyo nanulu' ra guang makaasi' Nano risilo.

²⁸Kopongo orou Sabat, santayaran intor ra kuliamos ginaau tinayar-tayar ra ulun-ulun naimbolo', ruandu'-ruandu' napuor am anak nailusan ra matuo. Suwo no tinayar-tayar ra ilo po ngai' am sasambaloi nilo.

²⁹Kopongo raginio nababaya' ilo nakiasi' am nakitaak ra Tuhan Ondo' Mataau Kaga' maa' raginio totopot mobonsoi Io ra ulipon-ulipon Nano.

³⁰Ralalom ru pangayawan ra saujor ri Timotius am i Bakidis, ulun ru Jaudi namuso ra nasailan intor ra 20,000 ngaulun pulalai ru pantula'. Ginaau nilo kukula' kubu ondo' masawat am nakaalap masuang kuliamos ginaau ondo' tinayar nilo ralalom ru tayar-tayar ra nogondo'; santayaran risilo galama', am santayaran poyo ra ruandu'-ruandu' napuor, anak-anak nailusan ra matuo, ulun-ulun matutuo am ulun-ulun inimbolo'.

³¹Ngaangai' kinandoi mangayou ru pantula' tinimung ra matanda', am binulian ra intok ondo' moonsoi, liliwa' kuliamos ginaau ra bokon no inibit giu' ra Jirusalim.

³²Pinatoi nilo niayuk i Timotius komando ru saujor, iono ulun malaat kaga', ondo' namparatong ra masuang kapaganan ra ulun ru Jaudi.

³³Ralalom pangiantakan ru namanangan ondo' pinaugar giu' ra namagunan nilo galama', sinolob ru ulun ru Jaudi kukula' ngaulun ondo' nonolob ra kulobon-kulobon ru garabang Baloi ru Tuhan. Nagiru' i Kalistinis ra rondo' baloi boborok niayuk nakaaya' nosolob. Koson raginio io nakaalap ra ukuman ondo' nogondo' ra kalaatan nano.

³⁴Koson ra ralan raginio i Nikanor, ulun malaat ondo' nagibit ra saribu ngaulun mantatalan koson mambali ra ulun ru Jaudi,

³⁵am ralalom indangan ru Tuhan kinala ru ulun ondo' ilain nano ra ulun asabin toojo. Iniru' no bayang ru pamarintaan nano am nagiru' koson ra ulipon liminayau. Nansail io ra ralan-ralan giu' ra asak pakasaboi io giu' ra Antiokia. Nakalabus io kaa' ngaangai' ru saujor nano pinuso.

³⁶Ulun no ondo' minirot koson nambayar ra cukai ra Roma am nantalan ra mamagun ru Jirusalim, nampatanou ra ulun ru Jaudi mokoondo' ri Aki Kapuuno' Ondo' Maayo Kaga' Kuasa' koson ra Ulun Manaung, am ra ilo kalo maalap kaala sabap ra giminagaya' ra ukum-ukum ondo' inaru' ri Aki Kapuuno'.