Read Timugon Murut 2 MAKABI 9 Bible Online

2 MAKABI 9 - Timugon Murut bible

2 MAKABI 9

¹Olo'-olo' bulintok raginio, Raja' Antiokus am saujor nano liminugut intor ra Pirsia ralalom ru baal najajajou.

²Kalo poyo bulintok raginio siminubol raja' ra bandar Pirsipolis am mirot koson mampagaau ra kuil am niayuk manguasa' ra bandar no. Kaa' mamagun ru libung no nalingas nangakat ra kinandoi mangayou am nampagiru' ra Raja' Antiokus, saboi liminugut io kalalaat ra nauyu'.

³Pakasaboi raja' giu' ra bandar Ikbatana, binalaan io atan nasauk ra pulalai ri Nikanor am i Timotius.

⁴Siminangit kaga' raja' am namatas koson mambalos ra ulun ru Jaudi ra kalaatan ru ulun ru Pirsia ondo' napagiru' riso. Nanusub raja' ra ulun nampaugar ondo' nagibit ra kurita' kuda nano ra kalo lumonggo', marayus ayuk saboi giu' ra Jirusalim. Nabaya' ra limbau mindagu io, “Makasaboi giu' ra Jirusalim, bandar no pasaukon ku ra lobong ru ulun ru Jaudi.” Kaa' kalo nakapandai raja' ra i Aki Kapuuno' namatas noyo koson mangukum riso.

⁵Kopongo ayuk mindagu ra ragu-ragu raginio, Tuhan ondo' nakakito ra ngaangai' no, iono i Aki Kapuuno' ru Israil, nampalumpa' riso ra maruol ondo' kalo makito am kalo mapali'. Natiu' io ra maruol ru tinai' ondo' mapaja' am kalo mababas.

⁶Ginio noyo ukuman matimpok ra ulun ondo' nangimbolo' ra ulun bokon ra mansalinut ralan ra makalalaa'.

⁷Kaa' baal raginio sanganu pana kalo makairuru' ra kinalimbau ru raja'. Giminaai poyo limbau nano am nampasingkual ra sangit nano ra ulun ru Jaudi. Nanusub io maa' raginio kurita' kuda karibokon poyo ugar no. Kinibit raginio naratu' io nakapatir intor ra kurita' kuda ondo' tatanga' mugar ra maribok am nakaigu' ra nakatigalu' kaga' saboi ngaangai' ru inan nano narualan ra masaran.

⁸Kinalimbau nambaal riso nangkara' ra mokoondo' io ra kaikangan riminalalom ra kalo makito saboi makapanusub ra kinulun-kinulun giu' ra raat am makapanimbang ra gunung-gunung masawat ra timbangan. Kaa' pulali' ru raja' naratu' pakapatir ra tana' am musiti' bandasin. Koson raginio noyo nakito ru ngaangai' ulun kuasa' ri Aki Kapuuno'.

⁹Naimbolo' raja' ra maruol ondo' najanjayan kaga' am niayuk intor ra mato ru ulun malaat no miningkual ulor-ulor. Liliwa' lakat poyo naayag, kual nano mootong noyo am owou nano sumusuk ra arung, saboi majamalan ngaangai' saujor nano.

¹⁰Sabap ra owou nano mootong kaga', kolondo' sangulun pana makainggaar koson mamandas riso. Alika kalo nabuoi ra kalo poyo raginio nangkara' io makaguut ra butitin-butitin.

¹¹Naimbolo' Raja' Antiokus ra maruol kalo tumaru' sabap ra ukuman ri Aki Kapuuno' ondo' nakalumpa' riso. Pupus no guang ru raja' natutuk; nakaliman io am tumalimpuun mampalabus ra kinalimbau nano.

¹²Kopongo raginio, bulintok kalo boo tumaan ra owou mootong nano galama', indagu raja', “Ngaangai' ondo' naayag ra mapandai matoi musiti' kumuku' ri Aki Kapuuno' am kalo mangkara' ra inan nano nogondo' Riso.”

¹³Ulun ondo' malaat no nambaal boo ra bantu' ra Tuhan ondo' kalo boo mampalabus riso.

¹⁴Indagu Raja' Antiokus, “Ragili agou-agou aku minongoi ra Jirusalim koson mamparata' raginio ra tana' am nambaal raginio nasauk ra lobong ru ulun ru Jaudi. Kaa' raino potonowon ku bandar no ra pinalabus.

¹⁵Kuayan kuno mamatir ra baangkai-baangkai ru ulun ru Jaudi am anak-anak nilo koson ra akanon ru bibiag masigo am susuit-susuit, sabap ra karaan ku ilo kalo maaya' koson lobongon. Kaa' raino aniin ku ilo ra kaapuan-kaapuan moonsoi kaga' koson ra mamagun ru bandar Atina.

¹⁶Ragili ginaau ku Baloi ri Aki Kapuuno', kaa' raino masaga' aku mangukop raginio ra tangguang ondo' mongoonsoi am mampasaguli' ra parabut-parabut masuang poyo intor ragili. Ngaangai' taak simbalui bayarin ku intor ra ampos kuno galama'.

¹⁷Suai raginio masaga' aku sumubol ra ugama ru Jaudi am sukuon ngaangai' intok ondo' inayanan ru ulun koson mampatanou ra kuasa' ri Aki Kapuuno'.”

¹⁸Raja' Antiokus liminawo guang. Kolondo' rondo' pana ondo' makairuru' ra ruol nano, sabap ra i Aki Kapuuno' tatanga' mangukum riso ra ukuman ondo' nogondo' ra kalaatan nano. Raja' pana nanulis ra rondo' surat posoboyon ra ulun ru Jaudi. Suang ru surat no koson ragitio:

¹⁹“Intor ra Raja' am Panglima Antiokus posoboyon ra ulun ru Jaudi, mamagun kuno ondo' gumagaya', kaansayan.

²⁰Malansan aku akau am sasambaloi mino maligag am ngaangai' no moonsoi koson ra gogoton min. Kalansanan kuno iono ri Aki Kapuuno'.

²¹Nakara' ku ra guang maansukan ra urumat am guang maansayan ondo' pinakito min ngaangai' raki'. Ralalom pangkiralanan muli' intor ra Pirsia, malanjag maruol kuno, aku pana mangkara' ra musiti' mangkara' ra kaansayan ru ngaangai' mamagun.

²²Kalo poyo nairu' kalansanan kuno ra mapali', mulu' poyo ra mangintopot aku toojo ra maligag aku poyo saguli'.

²³Nakara' ku ra ama' kuno maindalom mampasauk ra ulun malit paat io mongoi pangayou ra libung tampilon ra sirangon ru Sungoi Iprat.

²⁴Baal raginio binaal no amon ru masauk rondo' ondo' kalo iniman-iman, kapoam paat matong tanou malaat, mamagun kalo maubong sabap ra nakapandai osoi papalansanan ra baal ru pagun.

²⁵Nakapandai aku niayuk ra ulun-ulun manguasa' ru pagun-pagun ra paginggaar masalok magilong toojo ra baal am maginaa ra kaluagan. Ginio ra pinasauk ku i Antiokus, anak ungkuyon kuno mamalit raki' koson ra raja'. Masalok aku mampalansan riso ramuyun paat aku mongoi ra wilayah-wilayah giu' ra tampilon ra sirangon ru Sungoi Iprat. Nanulis aku niayuk riso atan ondo' tinulisan ku ragiti.

²⁶Totopot aku nakitaak ramuyun ngaangai' mangkara' ra kinoonsoi kutu ramuyun sigagama', am poyo ra ngaangai' bansa'. Akau musiti' magulayun manulu' ra kinabanis ru guang kutu am anak ungkuyon kuno.

²⁷Mangintopot aku ra anak kuno mamaya' ra kapintaran kuno am pamakuan ramuyun ngaangai' matimpok am moonsoi guang, am niayuk mindalom ra inan am kaatangan min ngaangai'.”

²⁸Kaa' raja' ondo' namatoi ra masuang ulun am nagulas ri Aki Kapuuno', narayus naimbolo' ra maagat kaga', koson ra ondo' pinalumpa' ru raja' ra ulun bokon. Pupus no nakaili' io ra kapupusan ondo' malaat kaga', iono minatoi giu' ra libung kagunungan ra pagun ru bansa' bokon.

²⁹I Pilipus rangan moonsoi nano nagibit ra baangkai nano minuli'. Sabap ra malaat ra anak ungkuyon ri Antiokus, nagiru' i Pilipus ra Misir, siminindung ra Raja' Ptolimius Pilomitor.