Read Timugon Murut MATIUS 13 Bible Online

MATIUS 13 - Timugon Murut bible

MATIUS 13

¹Orou ragili niayuk i Jisus nangiruan ra baloi no, am ongoi boo ra kiing ru Tasik Galilia. Panturung Io ra intok raginio am pangila'.

²Ulun ondo' liminimpu Riso no masuang toojo suku' siminakoi Io ra parau am panturung ra ralalom no. Ulun masuang no minigor giu' ra lantur no.

³Nangila' i Jisus risilo ra masuang baal ralalom ru abig. Indagu Io, “Mokoondo' sangulun minongoi pampatias.

⁴Paat ra io nampatias ra sampug no, mokoondo' niayuk naratu' ra ralan, am tinduko' ru susuit.

⁵Mokoondo' niayuk naratu' ra tana' makabatu ondo' kalo masuang tana'. Sampug no mataki' timinuu' sabap ra tana' no kalo masuang.

⁶Paat ra mato ru orou no malasu', tutuu' ru sampug no liminonot sabap ra bakat nano kalo makasuku' ra ralalom am mapua' ra mataki'.

⁷Mokoondo' niayuk naratu' ra tatanga' ru bulungkut ondo' timinuu' am mamisi' ra tutuu' ru sampug no.

⁸Kaa' mokoondo' niayuk naratu' ra tana' malabung am nangkawa'. Mokoondo' maatus kawa' nano, mokoondo' onom ngoopor, am mokoondo' niayuk talu ngoopor.”

⁹Indagu boo i Jisus, “Rongogo' am karaa' min!”

¹⁰Ratong boo maamaya'-maamaya' ri Jisus am pangkuot Riso, “Kua raguo' Mu ra abig paat mangila' ra ulun masuang no?”

¹¹Taam i Jisus, “Binalaan kano ondo' kalo igondo' pinabala' ra ati kulaan i Aki Kapuuno' mamarinta,[33] kaa' ulun masuang no kalo.

¹²Sabap ra osoi mokoondo', ruangin poyo, am maulian io; kaa' osoi kolondo', ondo' sanganu soroi riso no alapon niayuk.

¹³Ginio sabap ra Aku magabig paat ra Aku mindagu ra ulun-ulun no, magilong ilo ra kaimuagan Kuno kaa' kalo mangintopot am mangkirongog ilo ra pangilaan Kuno kaa' kalo makarati'!

¹⁴Ginio ra nasauk boo ragu ru nabi Jisaya risilo: ‘Ulun ti mangkirongog am mangkirongog, kaa' kalo makarati'; magigilong ilo kaa' kalo makakito.

¹⁵Sabap ra pangkaraan nilono kalo kinalarom, sinilong nilo talingo nilono, am koromo' nilo mato nilono. Sabap ra amon ru kalo, makakito mato nilono, mokorongog talingo nilono am pangkaraan nilono malarom am sumaguli' ilo Raki', am mamabas Aku risilo,’ kon ri Aki Kapuuno'.

¹⁶Kaa' akau, mumpara' boo bonsoi mino! Makakito mato mino, am mokorongog talingo mino.

¹⁷Karaa' min gitio! Masuang nabi am ulun motopot ra galing i masaga' toojo milong ra atan ondo' makito min ra raino ti, kaa' kalo nakarampot ilo. Masaga' ilo mangkirongog ra atan ondo' morongog min kaa' kalo nokorongog ilo.”

¹⁸“Rongogo' min noyo atan arati' ru abig ra sangulun mampatias no.

¹⁹Ulun ondo' mangkirongog ra tanou ati kulaan i Aki Kapuuno' mamarinta, kaa' kalo makarati', ulun koson ragitio noyo koson ra sampug ondo' naratu' ra ralan. Tingganai ru riwato no riminatong am nampagaau ra atan ondo' nakatias ra ralalom ru guang nilono.

²⁰Sampug ondo' naratu' ra intok makabatu koson ra ulun ondo' maansayan mangapu ra tanou ti ra ilo mangkirongog.

²¹Kaa' tanou raginio kalo mantilayun ra guang nilono am kalo tumaan ra mabuoi. Paat ra ilo makakapaganan kapoam maimbolo' sabap ra tanou no, marayus kalawo guang nilono.

²²Sampug ondo' naratu' ra tatanga' ru bulungkut no koson ra ulun ondo' mangkirongog niayuk ra tanou no, kaa' maimamang ilo ra kaayagan nilai am pamaguangan nilo ra lumangkaya' mamisi' ra tanou no saboi kalo mangkawa' ilo.

²³Sampug ondo' nakatias ra tana' malabung no koson ra ulun ondo' mangkirongog ra tanou no am makarati' ilo. Mangkakawa' ilo, mokoondo' mangkawa' ra maatus ruli' no, mokoondo' onom ngoopor am bokon no talu ngoopor.”

²⁴Nantunung poyo i Jisus risilo ra rondo' abig. “Paat i Aki Kapuuno' mamarinta,[34] baal no koson sangulun mampatias ra sampug ondo' moonsoi giu' ra umo nali.

²⁵Paat ra iorondom, paat ra ngaangai' ulun nombolong, sangulun pantula' ru mampatias no minatong am pampatanom ra alab pinaratok ra gandum no, am io pana ugar boo.

²⁶Paat ra sampug no tumuu' am tumalimpuun sumasal, mauligan boo alab no.

²⁷Ulipon ru tuan no minatong riso am indagu, ‘Tuan, sala' ka kia nantanom kou ra sampug moonsoi giu' ra umo muno. Ati intor ru alab ti?’

²⁸Taam tuan no, ‘Sangulun pantula' nambaal ragitio!’ Ulipon-ulipon nano nangkuot, ‘Masaga' kou kia bubulon mai alab no?’

²⁹Taam io, ‘Kalo, amon ru bubulon min alab no ati ru makaaya' niayuk gandum no.

³⁰Polosoon ayuk alab no tumuu' saboi mangkumos. Aku pana mindagu boo ra ulun-ulun ondo' mangkumos no: Bubulo' min galing alab no am bongkoso' min, am pasuboon boo ra apui. Mopongo raginio bagu luluro' min gandum am paulion ra gudang.’ ”

³¹[35] Nantunung poyo i Jisus risilo ra rondo' abig, “Paat ri Aki Kapuuno' mamarinta, baal no koson ra sangunor puun mustard ondo' tonomon ru sangulun giu' ra umo nali.

³²Unor no boborok kaga' intor ra nansalinut unor ra tana' ti. Kaa' paat ra io tumuu', masauk io maayo toojo intor ra nansalinut puun tonomon ra bokon no. Masauk io ra puun tataun, saboi susuit-susuit rumatong manabunsut ra raan nano.”

³³Nantunung poyo i Jisus risilo ra rondo' abig. “Paat ri Aki Kapuuno' mamarinta, baal no koson ra ragi ondo' inalap ru sangulun ruandu'. Porotoko' no ra apat ngoopor ngakilo ra tapung, am samput boo tapung i.”

³⁴Paat ri Jisus nangila' ra ulun masuang no ra ngaangai' baal ragitio, raguon no ra abig. Kalo masaga' Io mindagu risilo amon ru sala' ka abig.

³⁵Baalon ri Jisus koson raginio maa' raginio masauk boo ragu ru nabi Jisaya, “Magabig Aku paat ra Aku mangila' risilo; Mambala' Aku risilo ra sauk ondo' kalo napandayan ru ulun intor ra tana' ti binaal.”

³⁶I Jisus pana nangiruan boo ra ulun masuang no am subol ra rondo' baloi. Maamaya'-maamaya' Nano minatong Riso am indagu, “Balai' akai no ra atan arati' ru abig ra alab ondo' tatanga' ru gandum no.”

³⁷Taam i Jisus, “Ulun ondo' nampatias ra sampug moonsoi no, ioginio Anak ru Ulun.

³⁸Umo no, ioginio tana' ti. Sampug moonsoi no, ioginio ulun ondo' nasauk noyo ra ulun ri Aki Kapuuno', am alab no ulun ondo' maya' ra Tingganai ru riwato.

³⁹Pantula' ondo' nampatias ra sampug ru alab no Tingganai ru riwato. Pangkumasan no, ioginio Orou Pupus no, am ulun ondo' mangkumos no malaikat-malaikat.

⁴⁰Koson ra alab no timungon am suruin ra apui, koson niayuk ra Orou Pupus ra tauli no.

⁴¹Anak ru Ulun no manusub ra malaikat-malaikat Nano manimung intor ra Pamarintaan Nano ngaangai' ulun ondo' mangkinibit ra ulun makatula, am ngaangai' ulun ra bokon ondo' nambaal ra kalaatan.

⁴²Ilo ngaangai' ti patirin ra apui. Giu' no pasalangis am sakuritot ayuk boo ripon nilono sabap ra maruol kaga'.

⁴³Baal ru ulun motopot pana makito boo ru ngaangai' koson ra silau ru mato ru orou giu' ra Tana' Bagu ri Aki Kapuuno', Ama' nilono. Rongogo' am karaa' min!”

⁴⁴“Paat ri Aki Kapuuno' mamarinta, baal no koson ra rapu' nokolobong ra umo. Paat ra sangulun makatuum ra rapu' no, pumpuni' no sagulio'. Sabap ra naansukan io kaga', ongoyo' no talano' ngaangai' kuliamos nano, am saguli' io boo am balio' no umo i.”

⁴⁵“Paat ri Aki Kapuuno' mamarinta poyo, baal no koson ra sangulun mantatalan ondo' maguyum ra mutiara mologo.

⁴⁶Paat ra io makatuum rondo' mutiara ondo' mapasau kaga', ongoyo' no talano' ngaangai' kuliamos nano, am balio' no boo mutiara i.”

⁴⁷“Paat ri Aki Kapuuno' mamarinta poyo, baal no koson ra ralo ondo' pinataan ra tasik am makaalap nansalinut papait.

⁴⁸Paat ra masuang sulung ru ralo no, aaso' ru ulun-ulun mangimpait ralo i ra lantur no. Panturung ilo am pantuliaro' nilo papait-papait no: papait moonsoi no pinauli ra rondo' pambulian, am papait ondo' malaat no pinatiran nilo.

⁴⁹Koson niayuk raginio baal no paat ra Orou Pupus. Mongoi malaikat-malaikat am pampasuai ra ulun malaat intor ra ulun moonsoi.

⁵⁰Ilo pana mamatir boo ra ulun malaat no ra ralalom ru apui. Giu' no mantangi' ilo am manguritot ripon nilono.”

⁵¹Pangkuot i Jisus, “Nakarati' kau kia ra abig-abig ni?” Taam maamaya'-maamaya' Nano, “Nakarati' akai.”

⁵²I Jisus pana mindagu poyo, “Moonong mangingila' ra Ukum ri Musa ondo' nasauk ra ulun ri Aki Kapuuno', io ti koson ra sangulun puun baloi ondo' mapaingkual ra kuliamos nakabagu am lairon intor ra kaban ru rapu' nano.”

⁵³Kopongo i Jisus nantunung ra abig-abig ni, iruani' No intok raginio.

⁵⁴Io pana minuli' boo ra pamagunan Nano galama'. Nangila' Io giu' ra baloi sambayangan am ulun ondo' nangkirongog Riso no nangimuag. Pangkuot ilo, “Ati naalapan No ra kapintaran koson raginio? Ilai' kuasa' Nano mambaal ra kaimuagan!

⁵⁵Sala' ka kia Io ti anak ru sangulun manambaloi ayuk? Sala' ka kia i Maria no ina' Nano, am pabukat Nano i Jakub, i Jusup, i Simon am i Judas?

⁵⁶Sala' ka kia pabukat Nano ra ruandu' no soroi ritakau? Ati intor am naalapan No ra ngaangai' ragitio?”

⁵⁷Ginio ra ilo kalo nangapu Riso. Indagu i Jisus risilo, “Sangulun nabi omporon ra ati-ati intok, kaa' kalo omporon io ru mamagun am pabukat nano galama'.”

⁵⁸Kalo nambaal i Jisus ra masuang kaimuagan ra giu' no sabap ra kalo nangintopot ilo Riso.