Read Timugon Murut MATIUS 16 Bible Online

MATIUS 16 - Timugon Murut bible

MATIUS 16

¹Kukula' ngaulun ru Parisi am ulun ru Saduki minatong ri Jisus. Masaga' ilo mangkinam Riso. Nakitaak ilo ri Jisus mambaal ra kaimuagan koson mampainono' ra Io minatong intor ri Aki Kapuuno'.

²Kaa' taam i Jisus, [“Paat ra mato ru orou no tumolop, mindagu kau, ‘Kalo rumasam sabap ra nangkalamia'.’

³Paat ra susuab ti, mindagu kau, ‘Rumasam orou raiti', sabap ra nangkalamia' am majuut!’ Magilong kau ra limbowon no maaru' mapandayan min baal ru orou ti, kaa' tatandu' ondo' mambala' ra Orou Pupus no kalo maratian min!][37]

⁴Mumpara' boo laat am puka' ru ulun ra raiti'! Makitaak kau Raki' mambaal ra kaimuagan? Kalo! Rondo' ayuk kaimuagan paintutunon Kuno ramuyun ioginio kaimuagan ri nabi Junus.” Kopongo minindagu koson raginio, iruani' ilo ri Jisus am ugar Io.

⁵Paat ra maamaya' ri Jisus no siminandaup ra tasik no, nalilianan nilo magibit ra ruti'.

⁶Indagu i Jisus risilo, “Tataani' am ilalai' min ragi ru ulun ru Parisi am ulun ru Saduki.”

⁷Tumalimpuun ilo galama' mansusunur, “Mindagu Io kon raginio sabap ra kalo nakapagibit takau ra ruti'.”

⁸Nakapandai i Jisus ra atan sunuron nilono. Indagu Io, “Kua pansusunur kau ra kalo nakapagibit kau ra ruti'? Mumpara' boo lawo ru pangintapatan mino!

⁹Lakat kau ayuk poyo kia kalo nakarati'? Kalo kia nakara' min ra ati kulaan Aku namimilang ra limo ngampila' ruti' ondo' pinataakan Kuli ra limo ngaribu ngaulun ungkuyon i? Kula' ngambakul suwo ondo' linulur mini?

¹⁰Ati kulaan ra tulu' ngampila' ruti' ondo' pinaakan Ku ra apat ngaribu ungkuyon i? Kula' ngambakul suwo ondo' linulur mini?

¹¹Kua pai' kau pakarati' sala' ka mapakara' Aku ramuyun ra ruti'? Tataani' am ilalai' min ragi ru ulun ru Parisi am ulun ru Saduki!”

¹²Bagu no maamaya'-maamaya' ri Jisus nakarati' ra kon ri Jisus ni sala' ka mangkara' ra ragi ondo' porotokon mambaal ra ruti', kaa' koson ra pangilaan ru ulun ru Parisi am ulun ru Saduki.

¹³Ongoi i Jisus ra libung mamaar ra pekan Kaisaria Pilipi. Giu' no nangkuot Io ra maamaya'-maamaya' Nano, “Kon ru ulun, osoi sotopot no Anak ru Ulun no?”

¹⁴Taam ilo, “Mokoondo' mindagu i Juanis Mampariu'. Mokoondo' niayuk mindagu nabi Ilia. Bokon poyo mindagu nabi Jirimia kapoam sangulun nabi ra bokon.”

¹⁵“Kaa' akau,” kon ri Jisus, “Osoi Aku ti?”

¹⁶Taam i Simon Pitrus, “Okou no Mamamayag ondo' sinusub i,[38] Anak ri Aki Kapuuno' Ondo' Maayag.”

¹⁷“Pakaansuk no Simon, anak ri Juanis!” kon ri Jisus, “sabap ra katapatan ragitio sala' ka intor ra ulun, kaa' gitio pinabala' rirun ri Ama' Kuno giu' ra suruga'.

¹⁸Ginio ra balain Tokou: okou no i Pitrus, koson ra batu maikang, am tampak ru batu ti mampabigor Aku ra pasimpungan Kuno. Kuasa' ru kapatayan pana kalo makagula' raginio.

¹⁹Aniin Tokou ra kunsi' ru Tana' Bagu ri Aki Kapuuno'. Atan ondo' sawayon muno giti ra tana' ti, sawayon niayuk giu' ra suruga'. Atan ondo' iowon muno ra tana' ti, iowon niayuk ra suruga'.”

²⁰I Jisus pana manusub boo ra maamaya'-maamaya' Nano ra kalo mantunung ra osoi ayuk pana ra Io no Mamamayag ondo' sinusub ri Aki Kapuuno'.[39]

²¹Intor boo raginio pambala' boo toojo i Jisus ra maamaya'-maamaya' Nano, “Mongoi Aku ra Jirusalim am imboloon Aku ru tingganai ru ulun ru Jaudi, tingganai imam ru Jaudi am mangingila' ra Ukum ri Musa. Potoyon nilo Aku, kaa' malupus kataluan bayagon Aku saguli' intor ra kapatayan!”

²²Ibito' ri Pitrus i Jisus ra sangkiingan am sawayo' no. Kono, “I Aki Kapuuno' mapainggalur ra baal raginio, Tuhan! Kalo masauk baal raginio Rirun Tuhan!”

²³Pangkaili i Jisus am indagu Io boo ri Pitrus, “Pagiru' intor Raki', okou Tingganai ru riwato! Okou mongompong ra ralan Kuno. Pamaguangan muno pamaguangan ru ulun, sala' ka pamaguangan ri Aki Kapuuno'!”

²⁴I Jisus pana mindagu boo ra maamaya'-maamaya' Nano, “Moonong ulun ondo' masaga' maya' Raki', lilianin no kasagaan nano galama', mansaan io ra salip nano am maya' Raki'.

²⁵Sabap ra osoi ayuk kalo masaga' mampataak ra kaayagan no, io no matatakan ra kaayagan ondo' motopot. Kaa' osoi ayuk mampataak ra kaayagan sabap ra Aku makaalap ra kaayagan ondo' motopot.

²⁶Atan onong ru ulun makaalap ra ngaangai' ru tana' ti amon ru matatakan io ra painawo nano? Maaru' kolondo'! Sabap atan kia pangangalig ra painawo nano?

²⁷Sabap ra Anak ru Ulun no mamaar noyo rumatong ralalom katulayan ru Ama' Nano sumbayaan ru malaikat-malaikat Nano. Paat raginio mambalos Io ra moonong ulun maya' ra ondo' binaal nali.

²⁸Karaa' min! Mokoondo' kukula' ngaulun ragiti kalo matoi suku' ilo makakito ra Anak ru Ulun no rumatong koson ra raja'.”