Read Timugon Murut MATIUS 17 Bible Online

MATIUS 17 - Timugon Murut bible

MATIUS 17

¹Kopongo onom ngoorou ibito' ri Jisus i Pitrus, i Jakubus am pinongkotob nano i Juanis, pagaloi ra rondo' gunung.

²Paat ra ilo magilong ri Jisus, minalui baal Nano; bulos Nano makabinusasal koson ra mato ru orou am bayang Nali mapulak kaga', kukuliat ayuk.

³Maamaya'-maamaya' Nano pana nakakito boo ri nabi Ilia am i nabi Musa makimansunur ri Jisus.

⁴Indagu i Pitrus ri Jisus, “Tuhan, moonsoi toojo itakau soroi ragiti. Amon ru masaga' kou ayuk Tuhan, manirong aku ra talu kalukub; rondo' Rirun, rondo' ri nabi Musa am rondo' poyo ri nabi Ilia.”

⁵Tatanga' ri Pitrus mindagu, ratong gaun ondo' makabinusasal no nangulumput risilo, am bolos intor ra gaun no mindagu, “Gitio noyo Anak Kuno ondo' tagamin Kuno, mapakatasu' Io ra guang Kuno. Rongogo' min Io no!”

⁶Paat ra maamaya'-maamaya' Nano nokorongog ra bolos no, nalaa' ilo kaga', saboi nakakubu ilo ra tana'.

⁷Kaa' ratong i Jisus am kombongo' No ilo. “Bigor kano,” kon Nano, “Pai' kano kalaa'!”

⁸Pakabigor ilo ayuk am kolondo' osoi-osoi nakito nilo, ondo' ak am i Jisus.

⁹Paat ra ilo nambusul intor ra gunung no, panusub i Jisus risilo; “Pai' min tunungo' ra osoi ayuk pana ondo' nakito mini, suku' Anak ru Ulun bayagon saguli' intor ra kapatayan.”

¹⁰Maamaya'-maamaya' Nano nangkuot Riso, “Kua risilo mangingila' ra Ukum ri Musa no minindagu ra i nabi Ilia matong pagulu am bagu no Anak ru Ulun?”

¹¹Taam i Jisus, “Topot, nabi Ilia matong pagulu koson momongo ra ngaangai' no.

¹²Kaa' balain takamin: Nabi Ilia nakaratong noyo, kaa' ulun-ulun kalo nakaulig riso, am pinamakuan nilo riso maya' ra atan ayuk kasaga' nilo. Ondo' binaal nilo ri nabi Ilia, koson niayuk raginio baalon nilo ra Anak ru Ulun.”

¹³Bagu no nakarati' ilo ra nabi Ilia ondo' kon ri Jisus ni, io no i Juanis Mampariu'.

¹⁴Paat ri Jisus am katalu maamaya' Nano siminaguli' ra ulun masuang no, mokoondo' sangulun minatong am igulatur ra saang ri Jisus.

¹⁵Kono, “Tuan, pakaasi' no ra lalaing kuno! Io ti masalok mamumukat. Paat ra maruol no matong masalok io mokororop ra timug am makasubol ra apui.

¹⁶Inibit ku io noyo ra maamaya'-maamaya' Muno kaa' kalo maalap nilo ra babas.”

¹⁷Taam i Jisus, “Mumpara' boo kalo mangintopot am liminayau kau! Kula' poyo buoi no Aku sumimpung mayan ramuyun? Kula' poyo buoi no Aku tumaan ramuyun? Ibito' ragiti lalaing no!”

¹⁸Susubo' ri Jisus riwato no mingkual intor ra lalaing no am riwato no pana miningkual. Paat ragili niayuk nababas boo lalaing i.

¹⁹Maamaya'-maamaya' Nano minatong Riso ra ilo ayuk ngaangai' am pangkuot, “Kua pai' kaalap mai ra anjau riwato no?”

²⁰Taam i Jisus, “Sabap ra kalo mangintopot kau toojo. Karaa' min! Amon ru makapangintapatan kau koson ra gayo ru sangunor puun mustard, makaindagu kau ra bulur ti, ‘Banding no intor ragiti ongoi ra giu' no!’ am maaru' manding io! Makapambaal kau ra atan ayuk! [

²¹Kaa' riwato koson ragitio maalap ayuk ra anjau amon ru makiasi' am mampali kau.]”[40]

²²Paat ra ngaangai' maamaya' Nano nakatimung giu' ra libung Galilia, indagu i Jisus risilo, “Kalo boo mabuoi, Anak ru Ulun pataakon ralalom kakuasaan ru ulun.

²³Potoyon Io ru ulun. Kaa' malupus kataluan, bayagon Io saguli' intor ra kapatayan.” Mangiluk boo toojo guang ru maamaya'-maamaya' Nano.

²⁴Paat ri Jisus am maamaya' Nano nakasuku' ra pekan Kapirnaum, ilo mampalulur ra cukai ru Baloi ru Tuhan minatong ri Pitrus am pangkuot, “Mambayar kia mangingila' mino ra cukai ru Baloi ru Tuhan?”

²⁵Taam i Pitrus, “Maaru' mambayar.” Pakasubol i Pitrus ra baloi, am kalo poyo nakaindagu io, pagulu i Jisus pangkuot riso, “Simon Pitrus, atan pamaguangan muno? Osoi mambayar ra cukai ru raja' ru tana' ti? Mamagun galama' kia kapoam ulun bansa' ra bokon?”[41]

²⁶“Ulun bansa' ra bokon,” kon ri Pitrus. “Amon ru koson poyo raginio,” kon ri Jisus, “Mamagun galama' kalo pana mambayar.

²⁷Kaa' pai' takau sinduali' guang ru ulun-ulun raginio. Ongoi pagapon ra tasik. Intor ra kabang ru papait ra kasaa' maapon muno, makatuum kou ra ruit makaukop pambayar ra cukai tano. Alapo' ruit no am bayari' cukai tano.”