Read Timugon Murut MATIUS 2 Bible Online

MATIUS 2 - Timugon Murut bible

MATIUS 2

¹I Jisus inanak giu' ra pekan Bitligim ra pagun ru Judia paat ra Irodis nasauk ra raja'. Kalo boo nabuoi ragili, kukula' ngaulun magugulig ra butitin riminatong intor ra Sirangon mongoi ra Jirusalim

²am pangkuot ilo, “Ati naganakan ra lalagang ondo' masauk ra raja' ru ulun ru Jaudi? Nakito mai butitin Nano siminirang giu' ra intok mai tampilon ra sirangon am nakasuku' akai ragiti mongoi samba Riso.”

³Pakaining raja' Irodis ra tanou ragitio kalo boo mororo' guang nano, koson niayuk ra ngaangai' namagun ra Jirusalim.

⁴Piawo' boo ru raja' Irodis ngaangai' tingganai imam Jaudi am niayuk mangingila' ra Ukum ri Musa am kuati' no ilo, “Ati paganakan ra Mamamayag ondo' sinusub ri Aki Kapuuno'?”[4]

⁵Taam ilo, “Giu' ra pekan Bitligim, pagun ru Judia. Maya' ra tinulisan ru sangulun nabi,

⁶‘Okou noyo Bitligim, pekan maatang kaga' intor ra ngaangai' pekan giti ra Judia; intor rirun matong sangulun tingganai ondo' maningganai ra ulun Kuno Israil.’ ”

⁷Raja' Irodis pana simininok boo nampiau ra ulun ondo' intor ra Sirangon tumuum riso. Pangkuot io risilo sanggilan nakito nilo butitin no siminila'.

⁸Io pana nanusub boo risilo mongoi ra Bitligim am bilini', “Piroto' min toojo maguyum ra Anak no, am amon ru matuum min Io pambala' kau raki', am mokoongoi aku niayuk pakasamba Riso!”

⁹Magugulig ra butitin no pana minugar. Giu' ra tanga' ru ralan butitin ra nakito nilo ragili makito nilo minsur magulu risilo. Paat ra ilo nakakito ra butitin no naansukan ilo toojo. Butitin i minuog ra tuma' ru baloi intok ru Anak no.

¹¹Umpos ilo ra baloi i am pagilong ra Anak no am ina' Nano i Maria. Igulatur ilo am samba ra Anak no. Ilo pana nangukab boo ra kaban ru rapu' nilono am patalango' ra Anak no ioginio; mas, kaminyan am mur,[5] am pinataak ngaangai' taak no Riso.

¹²Ralalom rondo' inupi, magugulig ra butitin no pinakara' ri Aki Kapuuno' maa' raginio kalo sumaguli' ilo ra raja' Irodis. Ginio ra saguli' ilo ra pagun galama' baya' ra ralan ra bokon.

¹³Pakaugar magugulig ra butitin no am paginupi i Jusup. Pulusat ru sangulun malaikat ru Tuhan am indagu riso, “Sukal no, ibito' magina' no magiru' mongoi ra pagun ru Misir. Ayan kano ra giu' no saboi aku mambala' ramuyun saguli'. Uyumon ru raja' Irodis lalaing no koson potoyon no!”

¹⁴Lakat ayuk poyo iorondom sukal i Jusup, ibito' no magina' no magiru' mongoi ra pagun ru Misir.

¹⁵Minayan ilo ra giu' saboi raja' Irodis minatoi. Ginio nasauk sumugut ra ragu ru Tuhan ondo' pinasaboi ru sangulun nabi, iono, “Piawon Ku anak Kuno intor ra pagun ru Misir.”

¹⁶Paat ri raja' Irodis nakatutun ra rinuung io ru magugulig ra butitin no siminangit io toojo. Sumugut ra bala' ru magugulig ra butitin no koson buoi ru butitin nakito nilo i siminila', nanusub i raja' Irodis ra potoyon ngaangai' lalaing ungkuyon giu' ra pekan Bitligim ondo' bagu inanak suku' ruo ngambilor.

¹⁷Koson ragitio nasauk noyo ragu ru nabi Jirimia,

¹⁸“Giu' ra pekan Rama, morongog tinangian am sulaboi. Naupus i Ragil ra anak-anak nali, mangiluk toojo guang nano am marara' io simoyoon, sabap ra anak-anak nali minatoi ngai'.”

¹⁹Kopongo raja' Irodis minatoi giu' ra pagun ru Israil, i Jusup ilo sambaloi lakat ayuk poyo soroi ra pagun ru Misir.

²⁰Paginupi i Jusup am pulusat sangulun malaikat ru Tuhan riso am indagu io, “Sukal no, ibito' magina' no sumaguli' ra pagun ru Israil. Sabap ra io ondo' nangkinam mamatoi ra lalaing ti minatoi noyo.”

²¹I Jusup pana sukal am ibito' no magina' i sumaguli' ra pagun ru Israil.

²²Pakaining i Jusup ra anak ungkuyon ru raja' Irodis, i Arkilaus nasauk ra raja' ru Judia, malaa' io muli' mayan ra tampilon ra giu'. Io ti am binalaan poyo paat ra io naginupi ra mongoi ra libung ru Galilia

²³am mayan ra pekan Nasarit. Koson raginio nasauk ondo' rinagu ru nabi-nabi, “Io ti piawon ra ulun ru Nasarit.”