Read Timugon Murut MATIUS 20 Bible Online

MATIUS 20 - Timugon Murut bible

MATIUS 20

¹“Paat ri Aki Kapuuno' mamarinta, baal no koson sangulun tatangan ra umo ru anggur. Rumondom io mingkual maguyum ra mangngandoi ra umo nano.

²Mangiou io mambayar risilo ra rondo' ruit pirok sangulun songorou ondo' masaga' mangandoi. Ilo pana pinatalimpuun paat ragili niayuk.

³Paat ra jam kasiam iosusuab, tatangan ra umo i minongoi poyo ra pasar am kakito no kukula' ngaulun kolondo' kandoi nanturung ra giu' i.

⁴Kono risilo, ‘Ongoi kau pangandoi ra umo kuno. Aniin takamin ra gaji' ru kuli'.’

⁵Ilo pana minongoi boo pangandoi. Paat ra tanga' ru orou am poyo jam katalu ra iomamai', ongoi poyo tatangan ra umo i ra pasar am tiluo' no niayuk koson ra ongoi galing nani.

⁶Mamaar jam kalimo ra iomamai' ongoi io poyo ra pasar i, am pakakito io mokoondo' poyo kukula' ngaulun kolondo' kandoi sabibigor ra giu' i. Pangkuot io risilo, ‘Kua ponsongorou kau sabibigor am kolondo' atan-atan kondoyon?’

⁷Taam ulun-ulun i, ‘Sabap ra kolondo' ulun mangkimait ramon mangandoi.’ ‘Amon ru koson raginio,’ kon ru tatangan ra umo i, ‘Ongoi kau pangandoi ra umo kuno.’

⁸Paat ra lumondom, indagu tatangan ra umo i ra mandur ru ulun-ulun mangngandoi i, ‘Piawo' ngaangai' mangngandoi am gajii' noyo, intor ra piniau ku mangandoi ra mamai' ti saboi ra ondo' nangandoi intor ra susuab i!’

⁹Ulun ondo' nangandoi intor ra jam kalimo ra mamai' i ngaangai' nakaalap rondo' ruit pirok sangulun.

¹⁰Ratong boo ondo' nangandoi intor ra susuab i, guang nilo makaalap ra gaji' mologo koborok. Kaa' ngaangai' ilo ti inanian rondo' ruit pirok ayuk.

¹¹Paat ra ilo nangapu ra gaji' nilo, bubutok ilo ayuk ra tatangan ru umo i.

¹²Konilo, ‘Nangandoi ra pupus ti sanjam ayuk, am akai nonsongorou nangandoi ra orou mapangit, kaa' nanaak kou risilo nogondo' niayuk ramon!’

¹³Tatangan ra umo ru anggur ti timinaam ra sangulun intor ra nangkuot no: ‘Rangan, pai' ru namparuung aku ramuyun. Sala' ka kia nangiou kou ra gaji' rondo' ruit pirok songorou?

¹⁴Alapo' gaji' muno am uli' no. Amon ru masaga' aku, manaak aku ra nangandoi ra pupus ti nogondo' niayuk rirun.

¹⁵Maaru' makapanaak aku maya' ra guang kuno am ruit kuno galama'! Kua sangit kau ra kinataau ru guang kuno?’ ”

¹⁶Indagu boo poyo i Jisus, “Koson niayuk ra ulun ondo' kalo maatang, masauk ilo ra maatang: am ulun ondo' maatang masauk ilo ra kalo maatang.”

¹⁷Paat ri Jisus minongoi ra bandar Jirusalim, ibito' No koopor am ruo maamaya' Nano tumuliar, am tatanga' ilo nangkiralan indagu i Jisus risilo,

¹⁸“Rongogo' min, itakau raino sumaguli' ra bandar Jirusalim am maagu no Anak ru Ulun pataakin ra tingganai imam Jaudi am mangingila' ra Ukum ri Musa no. Ukumin nilo Io ra potoyon, am pataakin Io no ra ulun sala' ka Jaudi.

¹⁹Ilo ti magagasab Riso, mampalapos Riso am salipon nilo Io. Kaa' malupus kataluan, bayagon Io saguli'.”

²⁰Kopongo ragili andu' ri Jibidius ilo sangangaina' minuma' ri Jisus am igulatur Riso ra mokoondo' kitaakon nano.

²¹Pangkuot i Jisus, “Atan pakiindanganan muno Raki'?” Taam io, “Makitaak aku Rirun ra paat ra Okou masauk ra raja', karuo anak kutu panturungon Mu koson ragitio; sangulun ra pamiris am sangulun ra kait Muno.”

²²Indagu i Jisus risilo, “Akau kalo nakapandai ra atan kinitaak mino. Makakau' kau kia manginum ra sangkir kaimbalaan ondo' maaru' inumon Ku?” Taam ilo, “Makakau' akai.”

²³Indagu poyo i Jisus, “Maaru' manginum kau ra sangkir kaimbalaan Kuno. Kaa' manturung ra pamiris am kait Kutu sala' ka Aku ra kuasa'. Intok raginio mokoondo' noyo ulun inaru' ri Ama' Kuno.”

²⁴Paat ra mopor ngaulun maamaya' ri Jisus ra bokon nokorongog ra baal raginio, sangit ilo ra ruo magaka' ti.

²⁵Ginio ra piawo' ri Jisus ngaangai' maamaya' Nali am indagu, “Nakapandai kau ra panguasa'-panguasa' ru ulun sala' ka Jaudi ondo' kalo mulig ri Aki Kapuuno' magingkaut ra mamagun. Tingganai-tingganai no mokotog mamarinta risilo.

²⁶Kaa' akau pai' ru koson raginio. Amon ru sangulun intor ramuyun masaga' sumauk ra maatang, moonsoi masauk io ra ulipon min.

²⁷Amon ru mokoondo' intor ramuyun masaga' sumauk ra kasaa', moonsoi maangun io ra ulipon min.

²⁸Koson niayuk ra Anak ru Ulun minatong sala' ka makiindangan, kaa' mangindangan, am mampataak ra painawo Nano am mamayag ra masuang ulun.”

²⁹Paat ri Jisus am ngaangai' maamaya' Nano nangiruan ra bandar Jiriko, masuang ulun miniku' ri Jisus.

³⁰Kiing ru ralan i, mokoondo' ruo ngaulun bolou nanturung. Pakaining ilo ra i Jisus mansail risilo, golok ilo ruo, “Anak ru raja' Daut, pakaasi' no ramon!”

³¹Ulun masuang miniku' ri Jisus i siminangit am nanusub risilo mongkoror. Kaa' kosongowo' ru karuo-ruo bolou i golok nilo, “Tuan, Anak ru raja' Daut, pakaasi' no ramon!”

³²I Jisus pana uog boo am piawo' No. “Atan kia kasaga' min intor Raki'?” kuot ri Jisus.

³³Taam ilo, “Tuan, masaga' akai makakito.”

³⁴Makaasi' boo i Jisus risilo. Papuyayo' No kalindu' Nano ra mato ru karuo ulun bolou i, am paat ragili niayuk makakito ilo. Ilo pana baya' boo ri Jisus.