Read Timugon Murut MATIUS 22 Bible Online

MATIUS 22 - Timugon Murut bible

MATIUS 22

¹Igondo' poyo i Jisus minindagu ra abig paat ra nambala' ra ulun masuang i.

²Indagu Io, “Paat ri Aki Kapuuno' mamarinta, baal no koson ra sangulun raja' mampatampos ra bunsag paguatan ra anak ungkuyon nano.

³Raja' ti panusub ra ulipon-ulipon nano mongoi pambala' ra tambului ra binalaan nali matong ra bunsag ti. Kaa' ulun-ulun raginio kalo masaga' matong.

⁴Raja' no pana panusub poyo ra ulipon-ulipon no ra bokon i mongoi pambala'. Bilin no risilo, ‘Balai' noyo ondo' binalaan kuli ra akanon ra bunsag ti nakatampos noyo. Sapi' am anak ru sapi' mongoonsoi kuno, nasimbalui noyo. Ngaangai' ti nopongo noyo. Ibok, ratong kano ra bunsag paguatan ti!’

⁵Kaa' tambului ra binalaan ti kalo nampalio. Mongoi ilo boo pangandoi ra umo am mokoondo' niayuk mongoi ra kadai nilo galama';

⁶am bokon i poyo namparakop ra ulipon-ulipon ru raja', linamba' am pinatoi nilo ulipon-ulipon i.

⁷Paat ra raja' ti nokorongog ra baal raginio, siminangit io kaga'. Panusub io ra saujor-saujor nano mongoi pamatoi risilo am ponolob ra bandar nilono.

⁸Kopongo ragili piawo' no ulipon-ulipon nali, am indagu, ‘Bunsag paguatan ti nakatampos noyo, kaa' tambului ondo' binalaan kalo maaya'.

⁹Raino ongoi kano ra ralan mangaayo am porotongo' min noyo osoi ayuk matuum min ra bunsag ti.’

¹⁰Ulipon-ulipon no pana ugar boo. Ongoi ilo ra ralan mangaayo am timungo' nilo ngaangai' ulun ra nauma' nilo ra giu' ni, ondo' moonsoi kapoam malaat. Nososok boo intok ru bunsag paguatan i ra tambului.

¹¹Paat ra raja' ti sumubol magilong ra tambului-tambului no, kakito no mokoondo' sangulun kalo nambayang ra bayang moonsoi.

¹²Kuati' no boo ulun no, ‘Rangan, ati kulaan nakasubol kou ra kalo mambayang kou ra bayang moonsoi toojo?’ Ulun ti nongkoror.

¹³Indagu boo raja' ti ra ulipon-ulipon nano, ‘Bangkilo' kalayam am kalindu' nano am patiri' io ti ra lisar ondo' intok molondom. Giu' no mantangi' io am manguritot boo ripon nano.’ ”

¹⁴Pupusi' boo ri Jisus abig raginio, indagu Io, “Masuang piawon, kaa' kalo masuang pilion.”

¹⁵Ulun ru Parisi naguguum koson mangkinam ri Jisus ra kukula' pangkuatan.

¹⁶Panusub ilo ra kukula' ngaulun maamaya' ru Parisi am ulun bala ri Irodis tumuum i Jisus. “Mangingila',” konilo, “Makapandai akai mabanis guang Muno. Mangila' Kou ra ulun ra kasagaan ri Aki Kapuuno' ondo' motopot. Okou niayuk kalo babaya' ra atan ayuk pangkaraan ru ulun am kalo mampili' ra osoi ayuk ulun.

¹⁷Ginio ra, balai' akai atan koson pangkaraan Muno. Amon ru mambayar takau ra cukai ra Kaisar Roma, makasala takau kia ra Ukum ri Musa, kapoam kalo?”

¹⁸I Jisus nakapandai ra pangkaraan malaat nilono, am indagu Io, “Akau no kalo mangintopot ri Aki Kapuuno'! Kua pangkinam kau Raki'?

¹⁹Pakitono' Aku ra ruit pambabayar min ra cukai no!” Ibito' nilo boo ruit ni ri Jisus.

²⁰Pangkuot boo i Jisus risilo, “Bulos am inggalan ru osoi gitio?”

²¹Taam ilo, “I Kaisar.” Indagu i Jisus risilo, “Amon ru koson raginio, pasagulio' ra Kaisar ondo' longgom nano am pasagulio' niayuk ri Aki Kapuuno' ondo' longgom Nano.”

²²Paat ra ilo nokorongog ra pambalaan raginio, nangimuag ilo am ugar ilo mangiruan ri Jisus.

²³Paat ra orou raginio niayuk kukula' ngaulun ru Saduki minatong ri Jisus. Ilo ti noyo ondo' mangkara' ra malupus matoi kolondo' kaayagan saguli'.

²⁴“Mangingila',” konilo, “Nabi Musa nangila'; Amon ru sangulun ungkuyon matoi ra kolondo' anak, pongkotob no musiti' manangandu' ra napuor no, am makaalap ilo ra anak koson manungkus ra sayat ru minatoi i!

²⁵Mokoondo' nasauk ra tulu' ngaulun sangkaaka' ra galing i minayan ragiti. Ondo' katuaan ti nanangandu' kaa' minatoi am kolondo' anak. Ginio ra tatango' napuor nati ra pinongkotob nano.

²⁶Baal ondo' nogondo' nasauk niayuk ra pinongkotob nano ra karuo, katalu saboi ra pupusan no ra katulu' ti.

²⁷Pupus ti boo, ruandu' ti minatoi.

²⁸Paat ra orou ulun minatoi bayagon saguli', ruandu' ti masauk ra andu' ri osoi? Ngaangai' pinongkotob ti nakapanangandu' riso.”

²⁹Taam i Jisus, “Mumpara' boo layau ru pangkaraan mino! Akau kalo makarati' ra Buuk Kitab kapoam kuasa' ri Aki Kapuuno'.

³⁰Sabap ra paat ra ulun minatoi bayagon saguli', ilo ti masauk koson ra malaikat ru suruga', kalo maguguot ilo.

³¹Kaa' intor ra baal ulun minatoi bayagon saguli', kalo kia igondo' kau pambasa' ra atan ondo' pinatanou ri Aki Kapuuno'? Indagu Io,

³²‘Aku noyo i Aki Kapuuno' ondo' sambaan ri Abragam, i Isak am i Jakub.’ Arati' no i Aki Kapuuno' sambaan ru ulun maayag, sala' ka sambaan Io ru ulun minatoi.”

³³Paat ra ulun masuang nokorongog ra pambalaan ri Jisus ni, nangimuag ilo ra pangilaan ni.

³⁴Paat ra ulun ru Parisi nokorongog ri Jisus nambaal ra ulun ru Saduki ti kalo makakau' mangkuot Riso, timung ilo.

³⁵Sangulun intor ilo ngaangai' ti, ioginio sangulun mangingila' ra Ukum ri Musa, mangkinam mampalandak ri Jisus ra rondo' pangkuatan.

³⁶“Mangingila',” kono, “Ati rondo' panusuban maatang intor ra ngaangai' Ukum ri Musa?”

³⁷Taam i Jisus, “ ‘Tagami' noyo i Aki Kapuuno' Tuhan muno ra totopot ru guang, kaayagan am pangkaraan muno.’

³⁸Gitio noyo panusuban ondo' maatang kaga' am kasaa' toojo intor ra bokon no!

³⁹Panusuban maatang ra karuo nogondo' koson ra kasaa' i; ‘Tagami' noyo ulun ra bokon koson ra kaayagan muno galama'.’

⁴⁰Karuruo panusuban ti puun ru ngaangai' Ukum ri Musa am pangilaan ru nabi-nabi i.”

⁴¹Paat ra ulun ru Parisi timinimung pangkuot i Jisus risilo,

⁴²“Atan kia pampaguangan min ra Mamamayag ondo' sinusub ri Aki Kapuuno'? Papag ru osoi kia Io ti?” Taam ilo, “Papag ru raja' Daut!”

⁴³“Amon ru koson poyo raginio,” taam ri Jisus, “Kua Ambiluo ri Aki Kapuuno' nampaliman ri Daut ra mampiau Riso ‘Tuhan’? Sabap ra raja' Daut minindagu,

⁴⁴‘I Aki Kapuuno' minindagu ra Tuhan Kuno: Panturung no ra pamiris Kutu, saboi baalon Ku pantula'-pantula' Muli kumuku' ngai' Rirun.’

⁴⁵Amon ru i Daut mampiau Riso ‘Tuhan’, ati koson Mamamayag ondo' sinusub ri Aki Kapuuno' masauk ra papag ri Daut?”

⁴⁶Kolondo' sangulun pana makataam ri Jisus ra rondo' ragu pana. Intor ra orou raginio, kolondo' sangulun pana boo makakau' mangkuot Riso ra rondo' pangkuatan ayuk pana.