Read Timugon Murut MATIUS 24 Bible Online

MATIUS 24 - Timugon Murut bible

MATIUS 24

¹Ugar i Jisus intor ra Baloi Tuhan. Tatanga' Io mingkual ra intok no, maamaya'-maamaya' Nano ratong uma' Riso am panulu' Riso ra baloi-baloi ru Baloi Tuhan ondo' maginggaar.

²“Iou,” ragu ri Jisus, “Ilai' noyo ngaangai' ti! Balain takamin: Kolondo' rondo' batu pana intor ragitio soroi ra intok nano; ngaangai' ti lunsayon.”

³Paat ri Jisus nanturung giu' ra bulur Jaitun, maamaya'-maamaya' Nano simininok pangkuot Riso, “Balai' akai, sanggilan ngaangai' baal ti masauk? Baal ra atan kia masauk no koson manulu' ra nasuku' noyo ratangan Muno am pamupusan ru tana' ti?”

⁴Taam i Jisus, “Ilalai', am pai' min polosoo' osoi ayuk pana mamparuung ramuyun.

⁵Sabap ra masuang ulun matong sumalu Raki' am mindagu, ‘Aku noyo Mamamayag ondo' sinusub ri Aki Kapuuno'!’ Mamparuung ilo ra masuang ulun.

⁶Mokorongog kau bolos ru pampatayan ra mamaar kaga', am tanou pangayawan giu' ra intok mangaalur. Kaa' rongogo' min, pai' kau kalaa'! Baal ragitio musiti' masauk, kaa' pai' ru nasuku' noyo orou pamupusan.

⁷Pagun mangayou ra pagun ra bokon am parinta mantula' ra parinta ra bokon. Ati ayuk intok mokoondo' bitilan makalalaa' am tana' mogonggon.

⁸Ngaangai' ragitio matong koson ra maruol ra maganak.

⁹“Akau pana rokopon boo am imboloon am potoyon. Ngaangai' ru ulun masisang ramuyun sabap ra akau maya' Raki'.

¹⁰Paat raginio masuang ulun kalo boo mangintopot Raki'. Ilo ti mampataak ra rondo' am bokon ra pantula' am mansisang rondo' am bokon.

¹¹Masuang migiangku ra nabi matong am mamparuung ra ulun masuang.

¹²Kalaatan lumanja' suang saboi ulun kalo motogom ra rondo' am bokon.

¹³Kaa' osoi ayuk tumaan saboi ra pupus no bayagon.

¹⁴Tanou Moonsoi ra i Aki Kapuuno' mamarinta posoboyon ra ngaangai' ulun ru tana' ti koson ra sasi' mampaintutun risilo. Mopongo ginio bagu no matong pamupusan ru tana' ti.”

¹⁵“Makakito kau ra Karaat Makalalaa', ondo' rinagu ri nabi Danil, migor ra Baloi Tuhan. (Pangkaraan ra mambabasa': Aratio' min atan pambalaan ragitio!)

¹⁶Osoi ayuk pana soroi ra Judia musiti' magiru' ra kabuluran.

¹⁷Ulun ondo' soroi giu' rasawat ru baloi nano kalo pana tumuun mongoi pangalap ra kuliamos intor ragana' ru baloi nano.

¹⁸Ulun ondo' soroi ra umo kalo pana rumuli' mangalap ra sukub nano.

¹⁹Mumpara' boo lalaat orou raginio ra ruandu' mangaapang am ina' ondo' mampatiti' ra lalagang nilai.

²⁰Pakiasi' kano ri Aki Kapuuno' maa' raginio pagiruan min ti kalo masauk ra bulintok masimu' kapoam paat ra orou Sabat.

²¹Sabap ra kalaatan ru paat raginio kalo igondo' nasauk intor ra tana' ti biningkal saboi raino am kalo boo masauk saguli'.

²²Kaa' kinariwa' ri Aki Kapuuno' orou raginio; amon ru kalo, kolondo' sangulun pana ra ulun ti maayag. Kaa' sabap ra ulun-ulun pinili' no, kinariwa' ri Aki Kapuuno' orou raginio.

²³“Osoi ayuk mindagu ramuyun, ‘Ilai', gitio Mamamayag ondo' sinusub ri Aki Kapuuno'!’ kapoam, ‘Ginio Io, giu' no!’ Pai' kau pangintopot ra ulun no.

²⁴Sabap ra ulun migiangku ra mamamayag am nabi rumatong. Ilo ti mambaal ra baal kaimuagan ra mampalayau ra ulun ri Aki Kapuuno' amon ru maalap nilo.

²⁵Rongogo' min! Nakaindagu Aku noyo ramuyun paat ra kalo poyo nasuku' baal ti.

²⁶“Kaa' amon ru ulun mindagu ramuyun, ‘Ilai' soroi Io giu' ra tana' kaagisan!’, pai' kano ongoi ra giu'. Kapoam, amon ru mindagu ilo ramuyun, ‘Ilai', nansibuni Io ragiti!’, pai' kano pangintopot.

²⁷Sabap ra Anak ru Ulun rumatong koson ra ganit suminda ra ngaangai' limbowon intor ra sirangon suku' ra kalasaan.

²⁸“Ati mokoondo' ra baangkai, ginio timungan ru susuit mangakan ra baangkai no.”

²⁹“Kalo mabuoi malupus bulintok kapaganan raginio, mato ru orou lumondom, bulan kalo boo sumila' am butitin-butitin rumatu' intor ra limbowon, am ikang ru limbowon uyogon.

³⁰Bagu no tatandu' ra Anak ru Ulun no makito ra limbowon am bagu no ulun ra tana' ti mantatangi', am makito nilo Anak ru Ulun matong ra gaun mabaya' ra ikang am katulayan Nano ra maayo.

³¹Bujung maayo samputin kosongowon am manusub Io ra malaikat-malaikat Nano mongoi ra ngaangai' pamagunan ru tana' ti, am manimung ilo ra ulun pinili' intor ra titikop ru tana' ti.”

³²“Igigila' noyo ra pangilaan intor ra puun ru ara. Paat ra raan nano masansam am malami' am tumalimpuun manangumbus, napandayan min mamaar noyo manampio.

³³Koson niayuk paat ra makito min ngaangai' baal ragitio, napandayan min orou nano mamaar noyo kapoam tumalimpuun ra mataki'.[53]

³⁴Karaa' min! Ngaangai' baal raginio masauk ra kalo poyo matoi ngaangai' ulun ondo' maayag ra raino ti.

³⁵Limbowon am tana' ti mapuso, kaa' ragu Kutu mantilayun.”

³⁶“Kaa' koson pana raginio, kolondo' sangulun makapandai ra orou kapoam paat nano, malaikat-malaikat giu' ra suruga' pana kapoam Anak Nano.[54] I Ama' ayuk makapandai.

³⁷Ratangan ru Anak ru Ulun masauk koson ra atan nasauk ri nabi Nuu.

³⁸Koson niayuk paat ra kalo poyo rosob i, ulun mangakan am manginum, ungkuyon am ruandu' maguot saboi i Nuu siminubol ralalom ru kapal i.

³⁹Kalo nakapandai ilo atan ondo' nasauk saboi rosob i nangabas risilo. Koson niayuk raginio paat ra Anak ru Ulun rumatong.

⁴⁰Paat ra orou raginio, ruo ngaulun ungkuyon tatanga' mangandoi ra umo. Sangulun ibiton, am sangulun patatangon.

⁴¹Mogondo' niayuk ra ruo ngaulun ruandu' tatanga' mangandoi ra panginsaran ra gandum. Sangulun ibiton am sangulun patatangon.

⁴²Ilalai' min, sabap ra kalo napandayan orou ra atan Tuhan mino rumatong.

⁴³Karaa' min gitio! Amon ru ampu' ru baloi nakapandai sangulun mantatakou no matong, kalo mombolong io am kalo polosoon no mantatakou no sumubol ra baloi nano.

⁴⁴Ginio ra akau pana musiti' tumampos, sabap ra Anak ru Ulun matong paat ra orou kalo guangon min.”

⁴⁵“Osoi kia ulipon ondo' gumagaya' am mapintar? Io noyo ulun ondo' paningganayon ru tuan nano am manusub mapaakan ra ulipon-ulipon ra bokon paat ra inaru' i.

⁴⁶Mumpara' boo bonsoi ru ulipon no paat tuan nano sumaguli' am nakito ra ulipon nati giminagaya' ra nanusuban nali.

⁴⁷Balain takamin: Mampalansan toojo tuan ti ra ngaangai' rapu' nano ra ulipon ragitio.

⁴⁸Kaa' amon ru ulipon ti ulun malaat, mampaguang io, ‘Mabuoi tuan kuli sumaguli'.’

⁴⁹Io pana tumalimpuun boo mampalamba' ra ulipon-ulipon ra bokon no am mangakan am manginum io ra ulun gagaukon.

⁵⁰Tuan ru ulipon ragitio pana muli' boo ra paat kalo kinara' am kalo natutunan nano.

⁵¹Tuan no pana monotok[55] boo ra ulipon ti am poongoyon no intok ra ulun mangalaat. Giu' no mantangi' io am manguritot ripon nano.”