Read Timugon Murut MATIUS 28 Bible Online

MATIUS 28 - Timugon Murut bible

MATIUS 28

¹Pakasail orou Sabat, paat ra tumawang ra orou minggu', i Maria Magdalina am i Maria ra bokon ongoi pagilong ra lobong no.

²Pulali' uyog tana' ti ra makalalaa' am sangulun malaikat timinuun intor ra suruga', nampaluir ra batu pinaangob ra lobong am panturung ra rasawat no.

³Baal ru malaikat no koson ra ganit am bayang nano mapulak koson ra kanawai.

⁴Saujor-saujor nalaa' kaga' saboi nonontol am baal nilono koson ra baangkai.

⁵Indagu malaikat no ra ruandu'-ruandu' no, “Pai' kau kalaa'! Nakapandai aku maguyum kau ri Jisus ondo' sinalip i.

⁶Kalio Io ragiti, naayag noyo saguli' koson ra rinagu Nali. Ibok am ilai' intok napabantaan Riso no.

⁷Ribaki' ugar no raino am balai' maamaya'-maamaya' Nano, ‘Binayag Io saguli' intor ra kapatayan, am raino sumigulu Io ramuyun mongoi ra Galilia. Giu' no makakito kau Riso.’ Karaa' atan rinagu kuno ramuyun.”

⁸Kabalu' pana naansukan ilo nalaa' piboo kakaga' am indibok ingkual intor ra lobong no am simbul ilo ongoi pambala' ra maamaya'-maamaya' Nano.

⁹Pulusat ri Jisus uma' ra ruandu'-ruandu' no am indagu, “Kaansayan Ku ramuyun.” Inggaar ilo Riso, guut ra kalayam Nano am samba Riso.

¹⁰“Pai' kano kalaa',” ragu ri Jisus risilo, “Ugar kano susubo' pabukat-pabukat Kuno mongoi ra Galilia, am giu' no makakito ilo Raki'.”

¹¹Tatanga' ruandu'-ruandu' no marayus mugar, kukula' saujor ondo' nantamung ra lobong i, saguli' ra bandar Jirusalim am pambala' ra tingganai-tingganai imam Jaudi ra ngaangai' ondo' nasauk ni.

¹²Tingganai-tingganai imam Jaudi no nantitimung ra tingganai-tingganai ru ulun ru Jaudi am namatas ilo mangani' ra ruit masuang ra saujor-saujor no,

¹³bala' nilo, “Pambala' kau toojo, ra paat ra akau nombolong i maamaya'-maamaya' Nano minatong pantakou ra baangkai no.

¹⁴Akau kalo pana magalabo ra potoyon amon ru makaining gabenor no ra baal ragitio, paintopoton mai io no.”

¹⁵Alapo' ru saujor-saujor ruit no am gagayaa' nilo susuban ru tingganai-tingganai no. Ginio niayuk boo pabalaan ru ulun ru Jaudi saboi raino.

¹⁶Koopor am rondo' maamaya' ri Jisus no minongoi ra bulur ru Galilia ondo' intok binilinan ri Jisus risilo.

¹⁷Paat ra nakito nilo i Jisus, samba ilo Riso, ondo' pana kukula' ngaulun intor risilo kalo nangintopot toojo.

¹⁸Inggaar i Jisus risilo am indagu, “Ngaangai' kuasa' ra suruga' am ra tana' ti pinataak noyo Raki'.

¹⁹Ongoi kano ra ngaangai' bansa' ra titikop ru tana' ti am sauko' ilo no ra maamaya' Kuno. Riwo' ilo no ralalom inggalan ri Ama', Anak, am Ambiluo ri Aki Kapuuno'.

²⁰Ilaa' ilo ti mampagagaya' ra atan ondo' panusuban Kuli. Karaa' noyo, soroi Aku mabaya' ramuyun saboi ra orou pupus ru tana' ti.”