Read Timugon Murut MATIUS 4 Bible Online

MATIUS 4 - Timugon Murut bible

MATIUS 4

¹I Jisus pana inibit boo ru Ambiluo ri Aki Kapuuno' giu' ra tana' kaagisan koson kinamin Io ru Tingganai ru riwato.

²Kopongo i Jisus nampali buoi apat ngoopor ngoorou am apat ngoopor ngorondom, naitilan Io.

³Pulusat Tingganai ru riwato no am indagu, “Amon ru Anak Kou ri Aki Kapuuno', susubo' batu-batu ti masauk ra ruti'!”

⁴Kaa' taam i Jisus, “Mokoondo' tinulisan ra Buuk Kitab, ‘Ulun kalo maayag intor ra ruti' ayuk, kaa' mangkirongog ra moonong ragu ri Aki Kapuuno'!’ ”

⁵Tingganai ru riwato no pana nagibit boo ri Jisus giu' ra bandar Jirusalim, suku' ra tampak ru Baloi Tuhan,

⁶am mindagu Riso, “Amon ru Anak Kou ri Aki Kapuuno', tindak no. Sabap ra mokoondo' tinulisan ra Buuk Kitab, ‘I Aki Kapuuno' manusub ra malaikat-malaikat Nano mangindangan Rirun, am niayuk kaangin Kou ra kalindu' nilono, koson kalo mapilatan Kou ra batu.’ ”

⁷Taam i Jisus, “Kaa' mokoondo' poyo tinulisan ra Buuk Kitab, ‘Pai' pangkinam ra Tuhan, i Aki Kapuuno' muno!’ ”

⁸Tingganai ru riwato no pana nagibit boo ri Jisus ra rondo' gunung ondo' masawat toojo, am pinakito no Io ra ngaangai' pamarintaan ru tana' ti am kalangkayaan nilono.

⁹Indagu Tingganai ru riwato no ri Jisus, “Ngaangai' ti taakin ku Rirun amon ru migulatur Kou am sumamba raki'.”

¹⁰Taam i Jisus, “Pagiru' no, okou Tingganai ru riwato. Mokoondo' tinulisan ra Buuk Kitab, ‘Sambaa' ayuk Tuhan, i Aki Kapuuno' muno, am pangandoi kou ayuk Riso!’ ”

¹¹Tingganai ru riwato no pana nangiruan boo ri Jisus am pulusat boo ru malaikat-malaikat matong pangindangan Riso.

¹²Pakaining i Jisus ra i Juanis ti inaput, ugar Io ongoi ra libung ru Galilia.

¹³Kalo minayan Io ra pekan Nasarit kaa' minongoi Io ayan ra pekan Kapirnaum, io ti rondo' pekan kiing ru Tasik Galilia ra libung ru Jibulon am Naptali.

¹⁴Koson raginio nasauk sumugut ra ragu ru nabi Jisaya,

¹⁵“Libung ru Jibulon am Naptali, sandaup ru Sungoi Jordan pansailan mongoi ra raat, Galilia, libung ru ulun sala' ka Jaudi.

¹⁶Ulun ondo' soroi ralalom kalandaman makakito ra sinda matawang. Ra ondo' mayan ra intok kapatayan silawon ilo ra binusasal.”

¹⁷Intor ragili timinalimpuun i Jisus mampabala' ra Tanou Moonsoi, kon Nano, “Talikur kano intor ra tula mino, sabap ra mamaar noyo i Aki Kapuuno' mamarinta!”

¹⁸Paat ri Jisus nangkiralan ra kiing ru Tasik Galilia, kakito No ruo ngaulun magaka', ioginio i Simon (ondo' poyo ininggalanan ri Pitrus) am boborok nano, i Andrias. Ilo ti namparalo ra tasik no.

¹⁹Indagu i Jisus risilo, “Baya' kano Raki'. Ilaan takamin mangkimait ra ulun mangintopot Raki'.”

²⁰Indibok iruani' nilo ralo nilono am baya' ilo boo ri Jisus.

²¹Paginjul poyo i Jisus, am kakito No poyo ruo ngaulun magaka', ioginio i Jakubus am i Juanis, anak ri Jibidius. Ilo am ama' nilono soroi ralalom ru parau momongo ra ralo. Piawo' ilo ri Jisus.

²²Indibok iruani' nilo ayuk parau am ama' nilono am baya' ilo ri Jisus.

²³Sinuku' ri Jisus titikop libung ru Galilia. Nangila' Io ralalom ru baloi sambayangan am nampatanou Io niayuk ra Tanou Moonsoi ra mamarinta i Aki Kapuuno'.[7] Namabas Io ra ngaangai' maruol ru ulun masuang.

²⁴Tanou ri Jisus nakatabual noyo giu' ra titikop pagun ru Siria, saboi masuang ulun nagibit ra ulun marualan am poyo ulun mokoondo' ra nansalinut kapaganan tumuum Riso: ulun sinubol ru riwato, am ondo' mamumukat, am poyo ulun kalo makalulu'. Ilo ngaangai' ti binabas ri Jisus.

²⁵Masuang toojo ulun minaya' Riso, ilo intor ra libung ru Galilia, libung ru Mopor Pekan, bandar Jirusalim, Judia am poyo intor ra libung ru sandaup Jordan.