Read Timugon Murut MATIUS 7 Bible Online

MATIUS 7 - Timugon Murut bible

MATIUS 7

¹“Pai' kau pangakim ra ulun bokon, koson kalo niayuk akimin kau ri Aki Kapuuno',

²sabap ri Aki Kapuuno' mangakim ramuyun koson akau mangakim ra ulun bokon. Panuku' ondo' alapon mino koson mangakim ra ulun bokon, panuku' raginio niayuk alapon ri Aki Kapuuno' koson mangakim ramuyun.

³Kua kakito min tipolon ru tataun ra mato ru ulun bokon, kaa' akau galama' kalo makatutun ra mokoondo' tataun makalu ra mato mino galama'?

⁴Kua pai' kau kalalaa' mindagu ra ulun bokon, ‘Ibok, paingkualo' ku tipolon ru tataun intor ra mato muno,’ kaa' mokoondo' tataun makalu ra mato mino galama'.

⁵Oi ulun maabau-abau! Ingkualo' poyo galing tataun makalu intor ra mato mino galama', bagu no makakito kau toojo am maalap min kaingkual tipolon no intor ra mato ru ulun bokon.

⁶“Pai' min pataaki' ondo' matulai no ra uku'; uku' no sumaguli' am mongokot ramuyun. Pai' min pataaki' ondo' maatang kaga' no ra bauwi; kikinjangin ayuk boo ru bauwi no.”

⁷“Pakitaak kano am aniin kau. Paguyum kano am makatuum kau. Titiko' min kulobon no am ukabin kau.

⁸Moonong ulun makitaak, aniin; moonong ulun maguyum, makatuum; moonong ulun manitik ra kulobon, ukabin io.

⁹Kolondo' sangulun ama' mangani' ra anak nano ra batu amon ru makitaak io ra ruti'.

¹⁰Kapoam aniin ra kukuo amon ru makitaak io ra papait?

¹¹Kabalu' pana malaat kau, mapandai kau niayuk mangani' ra moonsoi ra anak mino. Ama' min giu' ra suruga' pana masaga' mangani' ra moonsoi no ramuyun amon ru makitaak kau.

¹²“Baalo' min noyo ra ulun ra bokon, atan ondo' kasagaan min ilo mambaal ramuyun. Gitio noyo suang ru Ukum ri Musa am pangilaan ru nabi-nabi.”

¹³“Subol kano ra kulobon ondo' mapisok no, sabap ra malangka' kulobon am malimparang ralan mongoi ra naraka! Masuang ulun maya' ra ralan ragitio.

¹⁴Kaa' mapisok kulobon am mapagon ralan ondo' sumuku' ra kaayagan motopot. Kalo masuang ulun mokoowot ra kaayagan ragitio.”

¹⁵“Ilalai' min ulun-ulun ondo' migiangku ra nabi. Rumatong ilo ramuyun tumilu ra domba, kaa' sotopot no ilo ti koson ra taani masangit.

¹⁶Mauligan min ilo ti intor ra binaal nilono. Bulungkut ra makaruui kalo manangkawa' ra anggur, am kusingan no kalo manangkawa' ra ara.

¹⁷“Koson niayuk ra puun ondo' malabung no, manangkawa' io ra moonsoi; am puun ondo' kalo malabung no, manangkawa' ra malaat.

¹⁸Puun malabung no kalo manangkawa' ra malaat kapoam puun ondo' kalo malabung no kalo manangkawa' ra moonsoi.

¹⁹Puun ondo' kalo manangkawa' ra moonsoi tagaron am suruin.

²⁰Koson raginio mauligan min ulun-ulun ondo' migiangku ra nabi intor ra binaal nilono.”

²¹“Sala' ka ngaangai' ulun ondo' mindagu ra Aku Tuhan nilo masauk ra ulun ri Aki Kapuuno', kaa' ilo ayuk ondo' sumugut ra kasagaan ru Ama' Kuno giu' ra suruga'.

²²Paat ra Orou Pupus no masuang ulun mampiau Raki', ‘Tuhan, sala' ka kia ralalom inggalan Muno nampatanou akai no ra Tanou Moonsoi; am ralalom inggalan Muno nampagiru' akai ra riwato-riwato, am niayuk nambaal ra masuang kaimuagan?’

²³Kaa' tumaam Aku risilo, ‘Kalo nakaulig Aku ramuyun! Pagiru' kano intor Raki', akau ulun malaat!’ ”

²⁴“Moonong ulun ondo' mangkirongog am gumagaya' ra raguon Kuno, io ti koson ra ulun mapintar ondo' mambaal ra baloi nano ra rasawat ru batu.

²⁵Paat ra rumasam maawas, mampaliur am masiob ru bagiu' mapuor, baloi ti kalo matungkob sabap ra pinatampak ra batu.

²⁶“Moonong ulun ondo' mangkirongog ra raguon Kuno kaa' kalo gagayaan no, io ti koson ra ulun bungas ondo' nambaal ra baloi nano ra tampak ru agis.

²⁷Paat ra rumasam maawas, mampaliur am masiob ru bagiu' mapuor, baloi no pana matungkob am malunsai boo toojo.”

²⁸Kopongo i Jisus minindagu raginio, ulun masuang no nangimuag ra pangilaan Nano,

²⁹sabap ra Io nangila' mabaya' ra kuasa', sala' ka koson mangingila'-mangingila' ra Ukum ri Musa.