Read Timugon Murut MATIUS 9 Bible Online

MATIUS 9 - Timugon Murut bible

MATIUS 9

¹Sakoi i Jisus ra parau i am laup Io ra tasik no uli' ra pekan Nano galama'.[20]

²Giu' no kukula' ngaulun namandas ra sangulun ondo' kalo makalulu'. Ilai' ri Jisus ra maikang pangintapatan nilono, Io pana mindagu ra ulun ondo' kalo makalulu' no, “Kaikango' noyo guang muno, alii ra anak Kuno! Inampun noyo tula muno.”

³Kukula' ngaulun mangingila' ra Ukum ri Musa mindagu ra ralalom ru guang nilo, “Ulun ragitio magasab ri Aki Kapuuno'!”

⁴Napandayan ri Jisus atan guangon nilono, Io pana mindagu, “Kua ramuyun ti mangkara' ayuk ra baal ondo' malaat no?

⁵Ati matasu' raguon, ‘Tula muno inampun noyo,’ kapoam ‘Sukal am ugar no’?

⁶Mampainono' Aku ramuyun ra Anak ru Ulun makakuasa' ra tana' ti mangampun ra tula.” I Jisus pana mindagu ra ulun ondo' kalo makalulu' no, “Sukal no, kayango' tilam muno am uli' no!”

⁷Io pana tirong am uli' ra baloi nano.

⁸Pakakito ulun-ulun i ra nasauk koson raginio, nalaa' ilo am pongompor ilo ri Aki Kapuuno' sabap ra nanaak Io ra kuasa' ondo' maayo toojo ra ulun.

⁹Iruani' ri Jisus intok raginio. Tatanga' ra Io nangkiralan, kakito No sangulun mampalulur ra cukai, ioginio i Matius, nanturung ra baloi ru cukai no. Indagu i Jisus riso, “Baya' Raki'!” Bigor i Matius am baya' io ri Jisus.

¹⁰Giu' ra baloi ri Matius i,[21] nangakan i Jisus am maamaya'-maamaya' Nano magugulung ra masuang ulun mampalulur ra cukai am ulun ondo' karaan ra malaat no ra rondo' mija'.

¹¹Kukula' ngaulun ru Parisi nakakito ra baal raginio. Kuati' nilo maamaya'-maamaya' ri Jisus, “Kua ra mangingila' mino mangkan magugulung ra mampalulur ra cukai am ulun ondo' karaan ra malaat?”

¹²Nokorongog i Jisus ra pangkuatan nilono am taam Io, “Ulun maligag kalo muma' ra duktur; Kaa' ondo' ayuk ulun marualan.

¹³Uyumo' min noyo atan arati' tinulisan ra Buuk Kitab ti: ‘Marara' Aku ra taak simbalui min kaa' masaga' Aku ra makaasi' kau ra ulun bokon.’ Aku minatong sala' ka mampiau ra ulun ondo' moonsoi rokokoon, kaa' mampiau ra ulun ondo' karaan ra malaat.”

¹⁴Maamaya' ri Juanis Mampariu' timinuum ri Jisus am pangkuot ilo, “Kua ramon am ulun ru Parisi masalok mampali kaa' maamaya' Muti kalo igondo' pampali?”

¹⁵Taam i Jisus, “Malansan kau kia ra tambului ondo' minaya' ra ungkuyon uatin no mampali ra io soroi ayuk poyo risilo? Maaru' kalo! Kaa' masuku' niayuk orou ungkuyon uatin no alapon intor risilo am bagu no mampali ilo.

¹⁶Kolondo' sangulun pana mangangkup ra bayang lairon ra sabinsang konoon baguon, sabap ra pangangkup raginio mamparilak ra bayang no, saboi marilak toojo.

¹⁷Koson niayuk ra kolondo' sangulun pana mambuli ra wain[22] baguon ralalom kantungan kungkung lairon. Sabap ra maaru' marilak kantungan no am wain no matuntuar. Anggur ra nakabagu no maaru' buliin ralalom kantungan ra baguon niayuk, maa' raginio kalo boo marilak am matuntuar.”

¹⁸Tatanga' i Jisus mindagu koson raginio risilo, sangulun tingganai baloi sambayangan minatong igulatur ra saang Nano am indagu, “Anak ruandu' kuno minatoi noyo. Kaa' ongoi kombongo' am maayag io saguli'.”

¹⁹Ongoi i Jisus nababaya' ra ama' ru lalaing i am maamaya'-maamaya' Nano.

²⁰Sangulun ruandu' ondo' mopor am ruo ngambilor noyo naimbolo' ra liniuran, ioginio maruol ru ruandu', mininggaar ra timbakulungon ri Jisus am kambong io ra pompor ru sukub Nano.

²¹Indagu ruandu' no ralalom ru guang nano, “Amon ru makakambong aku ayuk ra sukub Nano maaru' mababas aku.”

²²Pangkaili i Jisus am kakito No ruandu' i. Indagu Io riso, “Kaikango' noyo guang muno, anak Kuno! Sabap ra okou nangintopot nababas kou noyo!” Paat niayuk ragili nababas ruandu' i.

²³Paat ri Jisus nakasuku' ra baloi ru tingganai i, ilai' no ulun-ulun manulali am posongonsol maya' ra kaulayan ru pampalabangan ru ulun ru Jaudi.

²⁴Indagu Io, “Ingkual kau ngaangai'! Anak ruandu' ti sala' ka minatoi; io ti nombolong ayuk.” Tumalimpuun ilo mangiis ri Jisus.

²⁵Kaa' pakaingkual ayuk ulun-ulun no, subol i Jisus ralalom ru lamin ru anak ruandu' no am guuto' no kalindu' no. Anak ruandu' i pana liminuat.

²⁶Tanou ragitio nakasuku' ra ati-ati libung ru pagun raginio.

²⁷Iruani' ri Jisus intok raginio. Tatanga' ra Io nangkiralan, mokoondo' ruo ngaulun bolou siminunu' Riso. Golok ilo, “Anak ru raja' Daut, pakaasi' no ramon.”

²⁸Pakasubol ayuk i Jisus ra rondo' baloi, inggaar boo ruo ngaulun bolou i Riso, am kuati' ilo ri Jisus, “Mangintopot kau kia ra maalap takamin ra babas?” “Iou, Tuan!” konilo.

²⁹I Jisus nangambong boo ra mato nilono am indagu Io, “Kasauk noyo maya' ra pangintapatan mino!”

³⁰Ilo pana makakito boo. Pinsono' ilo boo ri Jisus, “Pai' kau pambala' ra baal ragitio ra osoi ayuk pana.”

³¹Kaa' ugar ilo am papatanou ra baal ti giu' ra titikop ru libung ru pagun no.

³²Tatanga' ruo ngaulun no mugar, kukula' ngaulun nagibit ra sangulun bobou ondo' sinubalan ru riwato paumaan ri Jisus.

³³Indibaki' pagiruo' ri Jisus riwato no am makaindagu boo saguli' ulun no. Moonong ulun nangimuag nakakito raginio. Konilo, “Kalo poyo igondo' akai pakakito ra kaimuagan koson ragitio ra pagun ru Israil ti!”

³⁴Kaa' ulun-ulun ru Parisi minindagu, “Tingganai ru riwato no nanaak Riso ra kuasa' koson mampagiru' ra riwato.”

³⁵Minongoi i Jisus ra ngaangai' pekan am pamagunan. Nangila' Io giu' ra baloi sambayangan am nampatanou ra Tanou Moonsoi ra i Aki Kapuuno' mamarinta.[23] Namabas Io ra ulun-ulun intor ra nansalinut maruol nilono.

³⁶Paat ra Io magilong ra ulun masuang no, makaasi' Io toojo risilo, sabap ra ilo ti mangalaa' am mangalawo koson ra domba kolondo' magagalung.

³⁷Indagu i Jisus ra maamaya'-maamaya' Nano, “Kumoson ti mauli' kaga', kaa' ulun mangkumos kalo masuang.

³⁸Pakiasi' kano ra tatangan ru kumoson no maa' raginio manusub io ra ulun mangkumos ra tinanom nano.”