Read Timugon Murut MARKUS 14 Bible Online

MARKUS 14 - Timugon Murut bible

MARKUS 14

¹Pangiantakan ra Ruti' Kalo Linatakan ra Ragi am Pangiantakan ra Paska, karuaan poyo am tumalimpuun. Tingganai imam Jaudi am mangingila' ra Ukum ri Musa maguyum ra ralan koson mamparakop am mamatoi ri Jisus, koson kalo mapandayan ru ulun ra bokon.

²Kaa' konilo, “Pai' takau sasati' ra paat ru pangiantakan, sabap ra mamagun no kumuliangi-angi lair.”

³Paat ragili i Jisus soroi ra Bitania, giu' ra baloi ri Simon ondo' ra galing i makamaruol ra kungkung ondo' maaja'. Paat ra ilo nagagakan, ratong sangulun ruandu' nagibit ra butul pualam makasuang ra umau maamis owou narwastu[34] ondo' mologo kaga'. Kopongo namabak ra liog ru butul no, pabuuro' no umau i ra ulu ri Jisus.

⁴Ra giu' i, mokoondo' kukula' ngaulun siminangit am nagindagu ra rondo' am bokon, “Kua lubato' umau maamis owou no?

⁵Sabap ra umau raginio maalap katalan masailan poyo talu ngaatus ruit pirok,[35] am tatayaron ra ulun musikin.” Sangiti' nilo boo ruandu' no.

⁶Kaa' indagu i Jisus, “Polosoo' min io no. Kua sangit kau riso? Nambaal io ra kandoi moonsoi Raki'.

⁷Ulun musikin masalok soroi ramuyun am makapangindangan kau risilo ra sasanggilan ayuk, kaa' Aku kalo boo masalok mababaya' ramuyun.

⁸Ruandu' ti nambaal ra atan malulu' no kabaal. Nampabuur io ra umau no ra inan Kutu koson namintor ra pampalabangan Raki'.

⁹Balain takamin: Ati ayuk papatanawan ra Tanou Moonsoi ra tana' ti, ondo' binaal ru ruandu' ti patunungon niayuk koson mangkara' riso.”

¹⁰Ugar boo i Judas Iskariot, sangulun intor ra mopor am ruo ngaulun maamaya' ri Jisus no, tumuum ra tingganai imam Jaudi sabap ra guang nano mampataak ri Jisus risilo.

¹¹Naansukan kaga' tingganai imam Jaudi paat ra nangkirongog am bantu' nilo mangani' riso ra ruit. Kopongo ragili mampaguang io ra orou moonsoi pataakon no i Jisus risilo.

¹²Paat ra orou kasaa' ra Pangiantakan ra Ruti' Kalo Linatakan ra Ragi, paat ra ulun manimbalui ra anak domba ru Pangiantakan Paska, maamaya' ri Jisus no mindagu Riso, “Ati intok kasagaan Muno ra pagakanan ru Paska?”

¹³Panusub Io boo ra ruo ngaulun maamaya' Nano am bilini' No, “Ongoi kau ra bandar. Makatuum kau ra sangulun ungkuyon ondo' muli' nansagou am baya' kano riso.

¹⁴Paat io sumubol ra baloi kuati' min tatangan ra baloi no, kamin, ‘Bilin ru Mangingila', Ati kia lamin sinadia' Raki' koson pagakanan ru Paska mababaya' ra maamaya' Kuno?’

¹⁵Tuluin kau boo ru ulun no rondo' lamin ra rasawat ondo' maayo, ondo' sinadiaan ra ngaangai' kuliamos. Ra giu' no sadiaa' min noyo ngaangai' ritakau!”

¹⁶Pintor noyo boo ruo ngaulun maamaya' no am pakasuku' ilo ra bandar. Kakito nilo ngaangai' koson ra rinagu ri Jisus risilo. Sadiaa' nilo boo pagakanan ru Paska no.

¹⁷Io rondom, ratong i Jisus nabaya' ra koopor am ruo ngaulun maamaya' Nali.

¹⁸Paat ra ilo nagagakan indagu i Jisus, “Balain takamin: pataakon Aku ru sangulun intor ramuyun ra pantula' — sangulun ondo' raino ti mangakan gumulung Raki'.”

¹⁹Maamaya' Nali mangiluk boo guang nilo. Rorondo' ilo nangkuot ri Jisus, “Sala' ka aku, kon Muno?”

²⁰Taam i Jisus, “Akau mopor am ruo ngaulun, io no sangulun intor ramuyun. Gumulung io ra akanon am papatunjakan Kuno ra ruti' ti.

²¹Maaru' Anak ru Ulun matoi koson ra tinulisan ralalom ru Buuk Kitab; Kaa' mumpara' boo pagon ra maagu no ru ulun ondo' mampataak Riso ra pantula'! Moonsoi poyo amon ru kalo inanak ulun raginio!”

²²Paat ri Jisus am maamaya' Nali magagakan, alapo' ri Jisus ruti' am indagu Io paringkuanangan ri Aki Kapuuno'. Pipilango' No boo am taaki' No risilo, indagu Io, “Alapo' noyo, gitio noyo inan Kutu.”

²³Kopongo ragili, alapo' No sangkir am indagu Io ra paringkuanangan ri Aki Kapuuno'. Taaki' No boo risilo, am ngaangai' nilo nanginum intor ra sangkir no.

²⁴Indagu i Jisus risilo, “Gitio noyo raraa' Kutu, raraa' nabantuan ri Aki Kapuuno' ondo' pasasaron ra masuang ulun.

²⁵Balain takamin: Sotopot no kalo boo manginum Aku ra anggur saboi Aku manginum saguli' ra anggur baguon giu' ra Tana' Bagu ri Aki Kapuuno'.”[36]

²⁶Kopongo ilo narimbai ra rondo' rimbai mongompor ri Aki Kapuuno', ongoi ilo boo ra Bulur Jaitun.

²⁷Indagu i Jisus risilo, “Akau ngaangai' magiru' manatang Raki'. Sabap ra tinulisan noyo ra Buuk Kitab, ‘Potoyon ri Aki Kapuuno' magagalung no, am ngaangai' domba nano mantutuliar.’

²⁸Kaa' mopongo Aku bayagon saguli', sumigulu Aku ramuyun mongoi ra Galilia.”

²⁹Indagu i Pitrus, “Polosoon noyo ngaangai' ilo manatang Rirun, kaa' aku ti kalo.”

³⁰Kon ri Jisus, “Balain tokou: Rondom ra raiti' niayuk, ra kalo poyo minduo paningkuluuk manuk tandaa' no, intalu kou no pagali' ra okou kalo nakaulig Raki'.”

³¹Kaa' ansang i Pitrus, kono, “Ati kulaan mindagu aku ra kalo nakaulig Rirun? Matoi aku pana marumar ayuk Rirun!” Ngaangai' maamaya' ra bokon no pana minindagu koson raginio.

³²Pakasuku' ilo ra rondo' intok ininggalanan ra Gitsimani, indagu i Jisus ra maamaya' Nali, “Panturung kau ragiti buoi Aku mongoi pakiasi'.”

³³Kimaiti' boo ri Jisus i Pitrus, Jakubus am i Juanis mabaya' Riso. Magalabo am mangiluk toojo guang Nali.

³⁴“Mangiluk kaga' guang Kutu, koson matoi pampalimanan Kuno. Paginaa kau ragiti am pai' kau pombolong,” ragu Nano ra katalu ngaulun pinaaya' Nali.

³⁵Ongoi i Jisus ra maalur koborok i am kubu Io ra tana' am pakiasi'. Nakitaak Io amon ru maalap ayuk, pasailon Io ra orou kaimbalaan no.

³⁶Indagu Io, “Ama', O Ama'! Kolondo' rondo' pana ondo' kalo mabaal Muno. Painggaluro' noyo sangkir kaimbalaan ti intor Raki', kaa' pai' noyo gagayaa' kasagaan Kutu, kaa' kasagaan Muno ayuk.”

³⁷Saguli' boo i Jisus, ilai' No katalu ngaulun pinaaya' Nali nombobolong. Indagu Io ri Pitrus, “Simon, nombolong kou kia? Kalo kia makapaginaa kou saboi sanjam?”

³⁸Indagu boo i Jisus risilo, “Ilalai' min am pakiasi' kau koson kalo maratu' kau ra pangkinaman. Sotopot no, ambiluo mino masaga' mambaal ra motopot kaa' kalo gumagaya' kau sabap ra paliso ru ulun malawo.”

³⁹Igondo' poyo i Jisus minongoi pakiasi' am nogondo' ayuk ra pakiasian No ra raitii' ni.

⁴⁰Saguli' Io poyo ra intok ru maamaya' Nali am ilai' No nombobolong ilo po saguli'. Matikoolong ilo kaga' am kalo nakapandai ilo ra atan boo paraguon nilo ri Jisus.

⁴¹Paat ra kaintalu Io siminaguli', indagu i Jisus, “Lakat ayuk poyo mombolong am tumangus kau kia? Sama' noyo! Nasuku' noyo ra Anak ru Ulun pataakin ra kuasa' ru ulun makatula.

⁴²Tirong kano am ugar takau. Ilai', io ondo' mampataak Raki' nakaratong noyo!”

⁴³Lakat ayuk poyo i Jisus mindagu, ratong i Judas. Io ti sangulun intor ra koopor am ruo ngaulun maamaya' ri Jisus. Minatong io nababaya' ra ulun masuang ondo' nagibit ra ilang am tataun lalamba'. Sinusub ilo ru tingganai imam Jaudi, mangingila' ra Ukum ri Musa am tingganai ru ulun ru Jaudi no.

⁴⁴Ulun nampataak Riso nambaal kalalair ra rondo' tatandu' risilo: “Ulun ondo' umaan am alakin kuno, Io ginio. Rokopo' am ibito' min Io am alungi' toojo,” kono risilo.

⁴⁵Ratong i Judas, parayus io ongoi ri Jisus am indagu, “Mangingila'!” Alaki' no boo i Jisus.

⁴⁶Ulun-ulun ondo' minatong nababaya' ri Judas i namparakop ri Jisus am guuto' nilo toojo.

⁴⁷Kaa' sangulun ondo' soroi ragili nampaakang ra ilang nali am piriso' no talingo ru ulipon ru Tingganai Maayo Imam Jaudi i.

⁴⁸Indagu i Jisus risilo, “Ulun malaat Aku kia, saboi akau minatong nagibit ra ilang am tataun lalamba' koson mamparakop Raki'?

⁴⁹Moonong orou nangila' Aku giu' ra Baloi Tuhan ra tatanga' min, am kalo rinakop min Aku. Kaa' inaru' noyo masauk atan ondo' tinulisan ra Buuk Kitab.”

⁵⁰Ngaangai' maamaya' ri Jisus nangiruan Riso.

⁵¹Mokoondo' sangulun tuu'-bagu siminunu' ri Jisus, nansabuk ayuk ra sampila' konoon. Kinamin nilo rokopo'

⁵²kaa' labaso' no konoon i am nagibabaang ayuk io nagiru'.

⁵³Inibit i Jisus giu' ra baloi ru Tingganai Maayo Imam Jaudi. Giu' i, ngaangai' tingganai imam Jaudi, tingganai ru ulun ru Jaudi am mangingila' ra Ukum ri Musa no timinimung.

⁵⁴Siminunu' i Pitrus ri Jisus intor ra maalur polos nakasubol ra liliut baloi ru Tingganai Maayo Imam Jaudi i. Giu' i, nanturung io am riminarang nababaya' ra saujor-saujor.

⁵⁵Tingganai imam Jaudi am ngaangai' Majlis Ugama mirot toojo maguyum ra kaintutunan ondo' mampasala ri Jisus maa' raginio maukuman nilo Io ra potoyon. Kaa' kolondo' rondo' naalap nilo.

⁵⁶Masuang sasi' magabau piniau, kaa' ragu nilo kalo nogogondo' ra rondo' am bokon.

⁵⁷Bigor kukula' ngaulun sasi' am nangani' ra kaintutunan magabau ri Jisus.

⁵⁸Konilo, “Nokorongog akai ra ulun ti minindagu, ‘Lunsayon Ku Baloi Tuhan ondo' binaal ru ulun, am mopongo talu ngoorou, baalon Ku sagulio' Baloi Tuhan ra bokon ondo' sala' ka baalon ru ulun.’ ”

⁵⁹Kaa' kaintutunan ru ulun-ulun raginio niayuk nansasala' ra rondo' am bokon.

⁶⁰Bigor Tingganai Maayo Imam Jaudi no ra tatanga' ru Majlis am pangkuot ri Jisus, “Kolondo' kia pataamon Muno ra ragu manguu' Rirun?”

⁶¹Nongkoror ayuk i Jisus am kalo tinaam No. Kuati' poyo ru Tingganai Maayo Imam Jaudi i, “Okou kia Mamamayag ondo' sinusub i,[37] Anak ri Aki Kapuuno' Ondo' Matulai Kaga' i?”

⁶²Taam i Jisus, “Iou, akau ngaangai' makakito ra Anak ru Ulun manturung ra pamiris ri Aki Kapuuno' ondo' Maayo Kaga' Kuasa'. Makito min niayuk Io matong ralalom ru gaun giu' ra limbowon.”

⁶³Rilako' ru Tingganai Maayo Imam Jaudi i bayang nali galama', sabap ra nakatigog am siminangit io toojo nakaining ra ragu ri Jisus ni am indagu, “Kalo pana rongogon sasi' ra bokon!

⁶⁴Nakaining kano galama' ra ragu magasab Nani. Raino atan boo ukum min?” Ilo ngaangai' nangiou ra makasala i Jisus, am musiti' ukumin ra potoyon.

⁶⁵Nantiwog boo kukula' ngaulun ri Jisus. Mokoondo' poyo nanili ra mato Nano am linamba' nilo. Konilo, “Kinami' sabito', osoi nampalamba' Rirun?” Saujor-saujor pana minaya' panampiling Riso.

⁶⁶Lakat ayuk poyo i Pitrus soroi ra liliut ru baloi i, ratong sangulun ruandu' ulipon ru Tingganai Maayo Imam Jaudi.

⁶⁷Kakito no i Pitrus riminarang ra giu' i, uligi' no toojo bulos ri Pitrus am indagu, “Okou niayuk masalok maya' ri Jisus, ulun ru Nasarit no.”

⁶⁸Kaa' pagali' i Pitrus, kono, “Atan rinagu muni? Kalo nakarati' aku.” Ingkual boo i Pitrus minongoi ra susubalan ru baloi no. [Paat ragili naningkuluuk manuk tandaa' i.][38]

⁶⁹Ulipon ruandu' i nakakito poyo ri Pitrus. Balai' no ulun ra giu' i, “Ulun ragitio maaru' sangulun intor ra maamaya' ri Jisus no!”

⁷⁰Kaa' alio' poyo ri Pitrus. Kalo nabuoi ragili, ngaangai' ulun ra giu' no mindagu ri Pitrus, “Pai' pagali', maaru' okou sangulun intor risilo, sabap ra okou ulun ru Galilia!”

⁷¹Pagibot boo i Pitrus, kono, “Amon ru topot aku po nakaulig ra ulun ti, kaluus aku no!”

⁷²Paat ragili niayuk kainduo ru manuk tandaa' i naningkuluuk. Kakara' boo ri Pitrus ragu ri Jisus riso, “Kalo poyo minduo paningkuluuk manuk tandaa' no, intalu kono indagu kalo makaulig Raki'.” Pantatangi' boo i Pitrus.