Read Timugon Murut MARKUS 16 Bible Online

MARKUS 16 - Timugon Murut bible

MARKUS 16

¹Kopongo orou Sabat, i Maria Magdalina, Maria ina' ri Jakubus am i Salomi minongoi pambali ra apa' maamis owou koson pakupilon ra baangkai ri Jisus.

²Paat ra orou minggu' i, nakasirang mato ru orou, minongoi ilo ra kalabangan.

³Paat ra ilo nangkiralan nansusunur ilo, “Osoi nua' mangindangan ritakau mampaluir ra batu pinaangob ra lobong i?” (Sabap ra batu i maayo toojo.) Kaa' pakasuku' ayuk ra giu' i, kakito nilo batu i naluir noyo.

⁵Umpos ilo ra lobong i. Ralalom i tampilon ra pamiris, nakito nilo mokoondo' sangulun ungkuyon mamulok nanturung, nambayang ra sukub ondo' mapulak, ginio ra ilo nakatigog.

⁶Ungkuyon i mindagu risilo, “Pai' kalaa'! Nakapandai aku maguyum kau ri Jisus ulun ru Nasarit ondo' sinalip i. Kalio Io ragiti. Binayag Io saguli'! Ilai', gitio intok napabantaan ra baangkai Nali.

⁷Raino ongoyo' min balai' maamaya' Nali am i Pitrus niayuk. Balai' min, ‘Nagulu Io intor ramuyun mongoi ra Galilia. Giu' no makatuum kau Riso, koson ra rinagu Nali ramuyun.’ ”

⁸Ingkual ilo intor ra lobong i am pasimbul ilo sabap ra nakatigog am nalaa'. Kalo nagindagu ilo ra osoi ayuk pana sabap ra nangalaa' ilo. [

⁹[41]Kopongo ra i Jisus binayag noyo saguli', ra iosusuab ra orou minggu', minintalang Io galing ri Maria Magdalina. (Intor ri Maria ti, igondo' i Jisus napaingkual ra tulu' riwato.)

¹⁰I Maria Magdalina minongoi pambala' ra rangan-rangan ri Jisus ra atan nasauk. Nanulaboi am nangulir ilo.

¹¹Kaa' paat ra ilo nokorongog ra i Jisus naayag noyo am ra i Maria nakakito Riso, kalo nangintopot ilo.

¹²Kopongo ragili, minintalang i Jisus ra ruo ngaulun maamaya' Nali am minalui Io. Gitio nasauk paat ra ilo nangkiralan mongoi ra rondo' pamagunan.

¹³Saguli' ilo am pambala' ra baal ti ra rangan nilo. Kaa' ilo pana kalo nangintopot.

¹⁴Pupus no, minintalang i Jisus ra koopor am rondo' maamaya' Nali paat ra ilo nangakan. Giu' i sinawai No ilo sabap ra kolondo' pangintapatan am mokotog ulu nilo saboi kalo nangintopot ilo ra ulun ondo' nakakito galama' ra Io naayag.

¹⁵Indagu Io risilo, “Ugar kano ra titikop ru tana' ti, balai' min moonong ulun ra Tanou Moonsoi.

¹⁶Osoi ayuk mangintopot am riwon, io no bayagon; kaa' osoi ayuk kalo mangintopot, io no ukumin.

¹⁷Tatandu' ragitio sumumbaya' ra ulun ondo' mangintopot: Mampagiru' ilo ra riwato ralalom inggalan Kuno, mansusunur ilo ra ragu kalo maratian nilo.

¹⁸Amon ru mampaguut ilo ra kukuo kapoam manginum ilo ra tuwo, kolondo' karaat masauk risilo. Pabantaan nilo kalindu' nilo ra ulun marualan am ulun no mababas.”

¹⁹Kopongo ayuk ragu ri Jisus risilo, kayango' Io no ra suruga', am panturung Io ra pamiris ri Aki Kapuuno'.

²⁰Ilo pana ugar mampabala' ra Tanou Moonsoi ra ati-ati ayuk, am Tuhan maya' pangandoi am mampainono' ra tanou no motopot ralalom ru tatandu' ondo' binaal nilo.] [PUPUS RU INJIL MARKUS SUMUGUT RA NASKHAH NAKALAIR RA BOKON [42] Tuum ruandu'-ruandu' no ri Pitrus am rangan-rangan nali am ontoso' nilo tunungo' ngaangai' ondo' pinabala' ru ungkuyon mamulok i risilo. Kopongo raginio, intor ra sirangon mongoi ra kalasaan, pinabala' galing ra maamaya' Nano, i Jisus galama' nampabala' ra tanou ondo' mapasau am mantilayun, ioginio pamayagan ondo' sabuoi-buoi no.]