Read Timugon Murut MARKUS 4 Bible Online

MARKUS 4 - Timugon Murut bible

MARKUS 4

¹Paat ra rondo' orou, tumalimpuun i Jisus mangila' giu' ra kiing ru Tasik Galilia. Ratong boo ulun masuang kakaga' liminimpu Riso, saboi mainsi' Io ra kiing ru timug no. Sakoi Io boo ayuk ra rondo' parau am loyog ra malalandom no am panturung. Ulun masuang no soroi ra lantur no.

²Mangila' Io risilo ra masuang igigilaan ralalom ru abig. Ralalom pangilaan Nano risilo indagu Io,

³“Rongog kau! Mokoondo' sangulun minongoi papatias.

⁴Paat ra io napatias, mokoondo' sampug naratu' ra ralan. Ratong boo susuit am tinduko' suku' nakai'.

⁵Mokoondo' niayuk naratu' ra tana' makabatu, ondo' kalo masuang tana' nano. Sampug no mataki' timinuu' sabap ra tana' no manipis.

⁶Kaa' pakasirang boo mato ru orou no, kapua' am kolonot boo sabap ra mariwa' bakat nano.

⁷Mokoondo' poyo naratu' ra tanga' ru bulungkut makaruui no, ondo' timinuu' am pinisi' io saboi kalo nangkawa'.

⁸Kaa' mokoondo' naratu' ra tana' malabung. Malabung tuu' nano am nangkawa' io. Sampug ti mokoondo' nangkawa' talu ngoopor ruli', mokoondo' onom ngoopor ruli' am poyo maatus ruli'.”

⁹Indagu boo i Jisus, “Amon ru makatalingo kau, pangkirongog toojo!”

¹⁰Paat ra Io misasangulun, ratong kukula' ngaulun ondo' nokorongog ra pangilaan Nano nababaya' ra koopor am ruo maamaya' Nano mangkuot Riso ra arati' ru abig no.

¹¹Taam Io, “Binalaan kano ondo' kalo igondo' pinabala' ra ati koson i Aki Kapuuno' mamarinta,[12] kaa' ulun ra bokon nansalinut posoboyon ralalom ru abig,

¹²maa' raginio: ‘Magilong ilo pana, kalo mauligan; mangkirongog ilo pana, kalo mapandayan, maa' raginio kalo sumaguli' ilo ri Aki Kapuuno' am ampunon.’ ”

¹³Indagu Io boo risilo, “Kalo kia nakarati' kau ra abig ragitio? Amon ru koson raginio ati kulaan min makarati' ra ngaangai' abig ra bokon?

¹⁴Ulun no mapatias ra Tanou Moonsoi.

¹⁵Mokoondo' niayuk ulun koson ra sampug naratu' ra ralan. Kaa' pokorongog ilo ayuk ra Tanou ti, ratong boo Tingganai ru riwato nangalap ra Tanou no ondo' bagu rinongog nilo i.

¹⁶Mokoondo' poyo ulun koson ra sampug naratu' ra tana' makabatu-batu, am pokorongog ilo ra Tanou ti naansayan ilo no nangapu.

¹⁷Kaa' kalo riminondon ra guang nilo am sangkinolor ilo ayuk. Katiu' ilo ra imbolo' am kapaganan sabap ra Tanou ti, mataki' ilo kalo boo mangintopot.

¹⁸Mokoondo' poyo ulun koson ra sampug nakatias ra bulungkut makaruui. Ilo ti nangkirongog ra Tanou no,

¹⁹kaa' kaimamangan ru bayag ti, kasagaan lumangkaya' am nansalinut lilipok poyo, mamisi' ra Tanou no saboi kalo mangkawa'.

²⁰Kaa' mokoondo' poyo ulun koson ra sampug nakatias ra tana' malabung. Mangkirongog am mangapu ilo ra Tanou ti suku' nangkawa'. Mokoondo' nangkawa' talu ngoopor ruli', mokoondo' onom ngoopor ruli' am poyo maatus ruli'.”

²¹Indagu poyo i Jisus risilo, “Kolondo' ulun magibit ra lampung am tingkapin ra pasu', am kolondo' mampasusut ra papangkau. Maaru' patampakon no ra tampakan ru lampung.

²²Atan ayuk ondo' nakasibuni paintalangon, am atan ayuk ondo' nolopot bungkalaron.

²³Amon ru makatalingo kau, pangkirongog tojojo!”

²⁴Indagu poyo i Jisus, “Talinaasi' min noyo ondo' norongog min ti! Atan ayuk pangukum min ra ulun, ginio niayuk pambabalos ri Aki Kapuuno' ramuyun — am janjain No poyo.

²⁵Osoi mokoondo', ruangin poyo; kaa' osoi kolondo', ondo' sanganu soroi riso no alapon niayuk.”

²⁶Indagu poyo i Jisus, “Koson noyo ragitio i Aki Kapuuno' mamarinta; koson ra ulun mapatias ra sampug giu' ra umo.

²⁷Paat ra rondom mombolong io. Paat ra matawang makarat io, kaa' sampug ra pinatias nali timinuu' am siminawat. Kalo napandayan no ati kulaan io timinuu'.

²⁸Tana' ti noyo mapatuu' ra puun sumawat am mangkawa'. Manangumbus io galing, mangantian boo am pupus no mangkawa'.

²⁹Paat ra kawa' nano maansak, indibakin tantabo' ru ulun no, sabap ra nasuku' noyo pangkumasan.”

³⁰Indagu i Jisus, “Ati koson baal nano ra i Aki Kapuuno' mamarinta? Atan pagabigan nano?

³¹Sauk nano nogondo' ra sangunor puun mustard[13] ondo' tonomon ra tana'. Naaru' unor no boborok kaga' intor ra nansalinut unor ra tana' ti.

³²Kaa' kalo mabuoi, tumuu' io am masauk maayo kaga' intor ra nansalinut puun tonomon ra bokon, am mananraan makalu saboi matong susuit manabunsut ra raan ondo' masindungan no.”

³³Nambala' i Jisus risilo ra masuang abig koson ragitio, koson mampaintutun risilo polos ru kapandayan nilo.

³⁴Ondo' nangilaan Nano ra ulun masuang abig ayuk, kaa' paat ilo-ilo ayuk, nambala' Io toojo ra maamaya' Nano ra arati' nano.

³⁵Paat ra mamai' orou ragili indagu i Jisus risilo, “Ibok kano, laup takano ra sandaup ru tasik no!”

³⁶Iruani' nilo ayuk ulun masuang no am maamaya' Nano siminakoi ra parau ondo' nanturungan ri Jisus, am lumaup ilo nabaya' Riso. Mokoondo' niayuk parau ra bokon ra giu' i.

³⁷Pulali' ru bagiu' mapuor am kinulun ru timug lumapos suang ra parau, suku' parau no maar mapanu' ra timug.

³⁸Paat ragili nokororot i Jisus ra ulin ru parau. Minulun Io ra rondo' ulunan. Maamaya' Nano nangkarat Riso am pangkuot, “Mangingila', kalo lioon Mu amon ru molosor takau?”

³⁹Kakarat Io, am susubo' No bagiu' mapuor no am indagu ra tasik no, “Pongkoror! Linos no!” Bagiu' no pana limininos am tasik no pana liminiuk.

⁴⁰Indagu Io risilo, “Kua kalaa' kau koson raginio? Kua pai' kau pangintopot Raki'?”

⁴¹Malaa' ilo boo kaga' am mindagu ilo sangulun am bokon, “Osoi kia nua' ulun ti, saboi bagiu' mapuor am kinulun pana gumagaya' Riso?”