Read Timugon Murut MARKUS 7 Bible Online

MARKUS 7 - Timugon Murut bible

MARKUS 7

¹Kukula' ngaulun ru Parisi am mangingila' ra Ukum ri Musa intor ra bandar Jirusalim liminimpu ri Jisus.

²Nakakito ilo ra maamaya' ri Jisus nangakan ra kalindu' nilo kalo mapasau, ioginio kalo mambagu' galing ra kalindu' sumugut ra kaulayan ru ugama Jaudi.

³Sabap ra ulun ru Parisi nogondo' niayuk ra ulun ru Jaudi ra bokon, sumugut toojo ra kaulayan ru kinamatuaan nilo. Kalo igondo' ilo pangakan ru kalo poyo makapambagu' galing sumugut ra kaulayan ondo' inaru'.

⁴Atan balion nilo intor ra pasar, kalo igondo' ilo pangakan ru kalo baguin poyo galing.[20] Masuang poyo kaulayan binaya' nilo intor ra kinamatuaan nilo koson ra mampaliung ra sangkir, pinggan am kakamot tambaga'.[21]

⁵Ginio ra ulun ru Parisi am mangingila' ra Ukum ri Musa nangkuot ri Jisus, “Kua ra maamaya' Muno kalo maya' ra kaulayan ru kinamatuaan takali? Kua ilo mangakan kalo mambagu' galing ra kalindu'?”

⁶Taam i Jisus risilo, “Motopot tupo kon ru nabi Jisaya ramuyun, akau ti ulun maabau-abau! Koson tinulisan ru nabi Jisaya, kon ri Aki Kapuuno', ‘Bansa' ragitio mongompor Raki' ralalom ru ragu nilo, kaa' guang nilono maalur intor Raki'.

⁷Papalo nilo sumamba Raki', sabap ra mangila' ilo ra kaulayan ru ulun, koson ayuk boo ginio pangilaan Kuno.’

⁸Inimpayan min pangilaan ri Aki Kapuuno' am gagayaan min boo toojo kaulayan ru ulun.”

⁹Indagu poyo i Jisus, “Mapandai kau mampaalig ra pangilaan ri Aki Kapuuno' ra kaulayan min galama'.

¹⁰Sabap ra nakaindagu i Musa ra galing i, ‘Urumato' noyo ama' am ina' mino! Osoi ayuk mampaluta' ra ama' kapoam ina' nano, maaru' ukumin ra potoyon!’

¹¹Kaa' mangila' kau, ‘Amon ru ulun mindagu ra matuo nano, atan ondo' musiti' taakin kuno ramuyun, nakapampataak aku noyo ri Aki Kapuuno'.’

¹²Nompoloso kau ra ulun ti intor ra kandoi nano mangindangan ra ama' am ina' nano.

¹³Ginio sabap ra paat akau mangila' ra kaulayan min ra ulun ra bokon, luluon min bala' ri Aki Kapuuno' am masuang poyo koson raginio binaal mino.”

¹⁴Piawo' boo ri Jisus igondo' poyo ulun masuang no, “Akau ngaangai', rongogo' am pakarati' kano ra ragu Kuno.

¹⁵Kolondo' rondo' intor ra lisar sumubol ralalom ru sasangulun mampajamol riso, kaa' atan ondo' mingkual intor ra sasangulun, ginio noyo mampajamol riso. [

¹⁶Amon ru makatalingo kau, pangkirongog tojojo!]”[22]

¹⁷Paat ri Jisus nangiruan ra ulun masuang no am subol ra rondo' baloi, maamaya' Nano nangkuot Riso arati' ru abig ni.

¹⁸Taam i Jisus risilo, “Akau niayuk koson ra ulun ra bokon. Kalo kia nakarati' kau? Kolondo' rondo' pana sumubol ra sasangulun intor ra lisar ru inan nano topot-topot mampajamol riso.

¹⁹Sabap ra ondo' sumubol kalo maya' ra guang nano, kaa' sumubol ra tinai' nano am tauli mingkual poyo intor ra inan nano.” (Ragu-ragu ondo' rinagu ri Jisus ni, nambala' Io ra ngaangai' akanon maakan.)

²⁰Tungguli' poyo ri Jisus ragu Nano, “Atan ondo' mingkual intor ra guang ru sasangulun, ginio noyo mampajamol riso.

²¹Sabap ra intor ra guang nano mingkual pangkaraan malaat ondo' mangayat riso mambaal ra kalaatan: koson mansasawa', mantakou, mampatoi,

²²lumapau, kumaluluung, mambaal ra makauyuyu', mamparuung, mangusolon, manimbaal ra ragu, malilimbau, bungas am atan ayuk kalaatan.

²³Baal ondo' malaat ni, mingkual intor ra guang am ginio noyo ondo' mampajamol riso.”

²⁴Ugar boo i Jisus intor ra giu' no am ongoi ra libung mamaar ra bandar Tirus. Subol Io ra rondo' baloi, sabap ra kalo masaga' Io ra ulun makatutun ra ayanan Nano. Kaa' rinatangan Nali kalo naalap ra ali'.

²⁵Ati ka ratong boo sangulun ina' ondo' anak ruandu' nano sinubol ru riwato, naala' ra ondo' binaal ri Jisus. Io pana ratong am igulatur ra tuma' ru kalayam ri Jisus.

²⁶Kitaakon no i Jisus mampagiru' ra riwato intor ra inan ru anak nano. Ruandu' no sangulun bansa' ru bokon intor ra Siria ondo' inanak ra libung Pinisia.

²⁷Kaa' taam i Jisus riso, “Polosoo' noyo lalaing-lalaing ti magulu kaasug, sabap ra kalo moonsoi akanon ru lalaing alapon am papatiro' ra uku'.”

²⁸Kaa' taam ruandu' no, “Topot, tuan. Kaa' uku' ondo' saau ru mija' no mangakan niayuk ra tipopol ondo' ratuin ru lalaing-lalaing no!”

²⁹Indagu boo i Jisus ra ruandu' no, “Sabap ra taaman muni, ugar no raino sabap ra riwato no miningkual noyo intor ra anak muno!”

³⁰Uli' ruandu' no ra baloi am ilai' no anak nano liminuya' ra kaalangan no am motopot riwato i miningkual noyo intor ra anak i.

³¹Kopongo ragili iruani' ri Jisus libung ru Tirus am pansail Io ra bandar Sidon am libung ru Mopor Pekan mongoi ra Tasik Galilia.

³²Giu' ra Mopor Pekan kukula' ngaulun nangaak ra sangulun bobou am nabarat patuumon ri Jisus. Kitaakon nilo i Jisus mapabanta' ra kalindu' Nano ra ulun no.

³³Patuliaro' ri Jisus ulun no intor ra ulun masuang, pasilongo' no tutulu' Nano ra karuo-ruo talingo ru ulun no. Pantiwog boo i Jisus am tiwog Nano pinapiir No ra rila' ru ulun no.

³⁴Kopongo raginio pantingaa' am pampalaa i Jisus am indagu ra ulun no, “Effata!” Ondo' arati' no “Kaukab no!”

³⁵Paat ragili niayuk ulun no mokorongog am kalo boo mokotog rila' nano am makasail io boo toojo mindagu.

³⁶Pangampol boo i Jisus ra ulun-ulun no, kalo mantunung ra ondo' nasauk no ra osoi ayuk pana. Kaa' mampagaai-gaai ayuk risilo mantutunung.

³⁷Ngaangai' ondo' nokorongog no nangimuag kaga'. Konilo, “Moonsoi toojo baalon Nano, ondo' barat mokorongog am bobou makaindagu.”