Read Timugon Murut LUKAS 1 Bible Online

LUKAS 1 - Timugon Murut bible

LUKAS 1

¹Tiopilus ondo' urumaton kuno, Masuang noyo ulun nopongo nanulis ra pambalaan motopot koson ra atan ondo' nasauk ra tatanga' takau.

²Nanulis ilo maya' ra tinunung ramon i ru ulun ondo' nakakito galama' ra atan ondo' nasauk intor ra puun i am tauli nampatanou ra bala' i.

³Kopongo ngaangai' no naimumuyan ku toojo intor ra puun i, aku pana nampaguang ra moonsoi mamatik aku rirun ra rondo' pambalaan ondo' masusui toojo.

⁴Binaal ku gitio koson makatutun kou ra ngaangai' atan ondo' nangilaan rirun i motopot toojo.

⁵Paat ra i Irodis raja' ru Judia,[1] mokoondo' sangulun imam Jaudi makainggalan ri Jakaria. Io sangulun papag ru imam Jaudi, tayar ru Abia. Inggalan ru andu' nano am i Ilisabit, am niayuk papag ru imam.

⁶Kaayagan ru mansawo ti mapabansuk ra guang ri Aki Kapuuno'. Ilo karuruo gumagaya' toojo ra ngaangai' susuban am ukum ru Tuhan.

⁷Kaa' kolondo' anak nilo sabap ra i Ilisabit ti tabanang am matutuo ilo no karuruo.

⁸Paat ra sangarawan, i Jakaria nampaugar ra kandoi nano koson ra imam ra saang ri Aki Kapuuno', maya' ra paat ru tayar Abia no.

⁹Sumugut ra pampilian, ondo' masalok baalon ru imam-imam, napili' io sumubol ra Baloi Tuhan am monolob ra kaminyan.

¹⁰Liliwa' monolob i pinaugar, ulun masuang makiasi' giu' ra liwar.

¹¹Paat ragili, pulusat malaikat ru Tuhan ri Jakaria. Minigor malaikat no tampilon ra pamiris ru panalaban, intok nanalaban ra kaminyan.

¹²Paat ri Jakaria nakakito ra malaikat no, naliangan am nalaa' io.

¹³Kaa' indagu malaikat no, “Pai' kalaa', Jakaria! Norongog noyo ri Aki Kapuuno' pinakiasian muli. I Ilisabit, andu' muno maganak ra sangulun anak ra ungkuyon. Inggalani' io ri Juanis.

¹⁴Maansukan kou kaga' am masuang ulun maansukan ra io maanak lalaing no!

¹⁵Masauk io ra sangulun maatang maya' ra pagilangan ru Tuhan; ginio nai ra kalo makainum io ra anggur kapoam inumon ra bokon ondo' makagauk am kuasaan io ru Ambiluo ri Aki Kapuuno'[2] intor ra io kakaanak ayuk poyo.

¹⁶Masuang ulun ru Israil ibiton no sumaguli' ri Aki Kapuuno', Tuhan nilai.

¹⁷Momongo io ra ralan ru Tuhan am maikang am makakuasa' io koson ra nabi Ilia. Mopobonsoi io ra ama' am anak, magibit ra ulun ondo' kalo gumagaya' sumaguli' ra pangkaraan motopot. Koson raginio boo, momongo io ra ulun tumampos manguma' ra Tuhan.”

¹⁸Kuati' ri Jakaria malaikat no, “Ati kulaan aku makapandai ginio masauk? Akai mansawo matutuo noyo.”

¹⁹Taam malaikat no, “I Gabriil aku. Mangandoi aku ri Aki Kapuuno'. Io nanusub raki' mampasaboi ra pambalaan moonsoi ti rirun.

²⁰Atan ondo' rinagu kutu, masauk toojo ra orou inaru' no. Kaa' kalo mangintopot kou, kalo makaindagu kou saboi masauk atan ondo' rinagu kuli.”

²¹Liliwa' raginio, ulun masuang no naginaa ayuk ri Jakaria. Nangimuag ilo sabap ra nabuoi io kaga' giu' ra ralalom ru Baloi Tuhan i.

²²Paat ra io miningkual, kalo boo makaindagu io risilo, mambaal io ayuk ra tatandu' ra kalindu' mambala' risilo. Ilo pana nakapandai boo ra i Jakaria ti nakakito ra rondo' pagilangan intor ri Aki Kapuuno' ralalom ru Baloi Tuhan i.

²³Kopongo kandoi no ra giu' i, uli' i Jakaria ra baloi.

²⁴Kalo nabuoi ragili, andu' nali i Ilisabit pana maapang. Nagaput io ra baloi buoi limo ngambulan.

²⁵Indagu io, “Pupus nali, inindangan aku ru Tuhan ra Io namuso ra asab kutu!”

²⁶Paat ri Ilisabit maapang onom ngambulan noyo, panusub i Aki Kapuuno' ra malaikat Nano, i Gabriil mongoi ra Nasarit, rondo' pekan ru libung Galilia.

²⁷Sinusub i Gabriil mongoi ra sangulun ralaa, makainggalan i Maria. Ralaa ti makatamung makainggalan i Jusup, am io ti intor ra papag ru raja' Daut ra galing i.

²⁸Ratong malaikat no ri Maria am indagu, “Kaansayan rirun, okou no totopot kaansayin ru Tuhan! Tuhan mabaya' rirun!”

²⁹Naliangan kaga' i Maria nakaining ra ragu ru malaikat i, saboi nampaguang io, atan arati' ru ragu ni.

³⁰Indagu poyo malaikat riso, “Maria, pai' kalaa', sabap ra maansayan i Aki Kapuuno' no rirun.

³¹Maapang kou am maganak kou ra sangulun anak ungkuyon. Inggalani' anak no i Jisus.

³²Masauk Io ra sangulun ondo' maatang kaga' am Io ti sabiton Anak ru Tuhan Ondo' Masawat Kaga'. Saukon Io ri Aki Kapuuno' ra sangulun raja', koson ra kinamatuaan Nali, i raja' Daut.

³³Mantilayun Io mamarinta ra papag ri Jakub am pamarintaan Nano kolondo' pupus.”

³⁴Indagu i Maria ra malaikat no, “Aku ti ralaa am kalo igondo' lampit ra ungkuyon. Ati kulaan masauk baal raginio?”

³⁵Taam malaikat no, “Matong Ambiluo ri Aki Kapuuno' rirun am kuasa' ri Aki Kapuuno' sumoroi rirun. Ginio sabap ra anak ondo' anakon muno sabiton Anak ri Aki Kapuuno' ondo' matulai.

³⁶Ilai', i Ilisabit pabukat muno, maapang io onom ngambulan noyo, kabalu' pana matutuo io no am ulun mindagu ra tabanang io.

³⁷Kaa' kolondo' kalo mabaal ri Aki Kapuuno'.”

³⁸Indagu i Maria, “Aku ti ulipon ru Tuhan. Polosoon noyo masauk raki' koson ra rinagu muni.” Liot boo malaikat no nangiruan ri Maria.

³⁹Kopongo ayuk raginii, parayus i Maria ra rondo' pekan ra Judia, giu' ra kabuluran.

⁴⁰Minongoi io ra baloi ri Jakaria, am paat ra io minumpos, indagu io ri Ilisabit, “Kaansayan rirun.”

⁴¹Kaining ayuk ri Ilisabit ragu ri Maria ni, lalagang tininai' nali pana minimbuir. Kinuasa' i Ilisabit ru Ambiluo ri Aki Kapuuno',

⁴²am taam io ra mosongou, “Okou no binarakat toojo intor ra ngaangai' ruandu'! Am binarakat niayuk anak ondo' anakon muno!

⁴³Osoi niayuk aku ti saboi ina' ru Tuhan kuno matong raki'.

⁴⁴Kaining ku ayuk ragu muni, lalagang tininai' kutu pana minimbuir naansukan.

⁴⁵Mumpara' bansuk muno, sabap ra nangintopot kou ra rinagu ru Tuhan rirun no masauk!”

⁴⁶Indagu i Maria, “Mongompor aku ra Tuhan ra sotopot-topot ru guang kutu.

⁴⁷Maansukan aku kaga' sabap ra i Aki Kapuuno' Mamamayag kuno.

⁴⁸Nangkara' Io raki', kabalu' pana aku ti ulipon Nano ondo' musikin! Intor raino aku ti sabiton ru ngaangai' ulun ra aku binarakat ru Tuhan.

⁴⁹Mongompor aku ri Aki Kapuuno' Ondo' Maayo Kaga' Kuasa' sabap ra binaal Nano raki' baal ondo' maatang kaga'. Matulai inggalan Nano.

⁵⁰Makaasi' i Aki Kapuuno' ra ulun ondo' mangurumat Riso intor ra rondo' papag suku' ra papag ra bokon.

⁵¹Mampakito Io ra kuasa' Nano am mampatuliar ra ulun-ulun mangasumbung.

⁵²Patuunon No raja' ondo' nanguasa', kaa' pasingkoton No ulun ondo' musikin.

⁵³Basugon No ulun nangaitilan ra ngaangai' ondo' moonsoi, kaa' paugaron No ulun langkaya' ra kolondo' taakin risilo.

⁵⁴Mangindangan Io ra ulun ru Israil, ulipon Nano, sabap ra mangkara' Io ra asi' Nali.

⁵⁵Koson ondo' binantu' Nano ra kinamatuaan takali, i Abragam am papag nano ra sabuoi-buoi no.”

⁵⁶Talu ngambulan buoi i Maria siminimpung ri Ilisabit, am minuli' boo ra baloi nano galama'.

⁵⁷Kasuku' orou paganakan ri Ilisabit, am naganak io ra sangulun lalagang ungkuyon.

⁵⁸Pakaining pinasambalayan am pabukat-pabukat nano ra ati kulaan gayo ru asi' ru Tuhan ri Ilisabit i, minaya' ilo niayuk riso maansukan.

⁵⁹Balu' ngoorou noyo buoi ru lalagang i, ratong ilo koson mongoi panunat riso. Masaga' ilo manginggalan ra lalagang no i Jakaria, paansangayon ra ama' nano.

⁶⁰Kaa' indagu ina' nano, “Kalo! Inggalan nano i Juanis.”

⁶¹Indagu ilo riso, “Kolondo' sangulun pana intor ra pabukat-pabukat muno makainggalan koson raginio.”

⁶²Pambaal ilo boo ra tatandu' ru kalindu' koson mangkuot ri Jakaria ra osoi painggalanon ra anak nano.

⁶³Pakitaak i Jakaria ra rondo' papan pamatikan am panulis io, “I Juanis inggalan nano.” Nangimuag ilo ngaangai'.

⁶⁴Paat ragili niayuk makaindagu boo saguli' i Jakaria am pongompor io ri Aki Kapuuno'.

⁶⁵Nangalaa' ngaangai' pinasambalayan nano am tanou raginio nakatabual ra ngaangai' pamagunan ru kabuluran ru Judia.

⁶⁶Ngaangai' ulun ondo' nakaining ra tanou raginio nampaguang, “Atan nua' kasaukan ru lalagang no ra tauli no?” Sabap ra kuasa' ru Tuhan sumoroi riso.

⁶⁷I Jakaria, ama' ru lalagang no, kinuasa' ru Ambiluo ri Aki Kapuuno' am nampasaboi io ra pambalaan ru Tuhan. Indagu io,

⁶⁸“Omporo' takau no i Aki Kapuuno', Tuhan ru ulun ru Israil, sabap ra minatong Io mangindangan am mampalabus ra ulun Nano.

⁶⁹Nanusub Io ra Mamamayag ondo' maikang matong ritakau, intor ra papag ru raja' Daut, ulipon Nali.

⁷⁰Sumugut ra nabi-nabi ondo' pinili' Nano ra galing i, nangani' Tuhan ra bantu' Nano

⁷¹koson mamayag ritakau intor ra pantula' takano, am niayuk intor ra kuasa' ru ulun mangasisang ritakau.

⁷²Koson mampakito ra asi' Nano ra kinamatuaan takali am suguton No bantu' Nali ra matulai i.

⁷³Nagibot am nambantu' Io ri Abragam, kinamatuaan takali, mamayag Io ritakau intor ra pantula' takano, maa' raginio makakau' takau mangandoi Riso,

⁷⁴

⁷⁵am mambaal ra kasagaan Nano am mangandoi Riso ayuk,[3] buoi itakau maayag ra tana' ti.

⁷⁶Okou anak kuno, piawon ra nabi ri Aki Kapuuno' Ondo' Masawat Kaga'. Sumigulu kou ra Tuhan koson momongo ra ralan Nano.

⁷⁷Koson mambala' ra ngaangai' ulun Nano ra bayagon ilo paat ra ampunon tula nilono.

⁷⁸Tuhan takano mataau am makaasi' kaga' am matong Io mamayag ritakau. Koson niayuk ra mato ru orou sumirang paat ra susuab,

⁷⁹mangani' Io ra sinda ra ulun ondo' mayan ra kalandaman am malaa' ra kapatayan, am maningganai ritakau ra ralan sumuku' ra kaansayan.”

⁸⁰Anak ri Jakaria i siminukor am kinuasa' io poyo toojo ri Aki Kapuuno'. Minayan io giu' ra tana' kaagisan suku' ra orou pambalaan nano ra ulun ru Israil osoi io sotopot no.