Read Timugon Murut LUKAS 10 Bible Online

LUKAS 10 - Timugon Murut bible

LUKAS 10

¹Pampili' boo i Jisus ra tulu' ngoopor am ruo[23] ngaulun poyo maamaya'. Susubo' No ilo tumaruo sumigulu intor Riso mongoi ra moonong bandar am intok apitan Nano.

²Indagu i Jisus risilo, “Kumoson no mauli' kaga' kaa' ulun mangkukumos no kalo masuang. Pakiasi' kano ri Aki Kapuuno' ondo' tatangan ra kumoson ti koson manusub Io poyo ra ulun mangkumos ra umo no.

³Ugar kano! Susubon takamin koson ra anak domba ra tatanga' ru taani.

⁴Pai' kau pagibit ra rumpit kapoam katia' pakitaakan kapoam kasut. Pai' kau uog tumabi' ra osoi ayuk pana matuum min giu' ra ralan.

⁵Ati ayuk pana baloi umpasan min, indagu kau ra, ‘Kaansayan sumoroi ra baloi ragitio.’

⁶Amon ru mamagun no masaga' ra kaansayan, polosoo' noyo tabi' mino soroi riso. Amon ru kalo, tabi' no sumaguli' ramuyun.

⁷Ayan kau ra baloi no. Atan ayuk akanon am inumon pasulungon ramuyun, apuo' min ayuk. Sabap ra sangulun mangangandoi maaya' makaalap ra ampos ru kandoi nano. Pai' pababanding ra ayanan.

⁸Amon ru sumubol kau ra rondo' bandar am apuon kau ru mamagun no, akano' min ayuk ondo' pasulungon ramuyun no.

⁹Babaso' min ulun marualan ra giu' no am pambala' risilo, ‘Mamaar noyo i Aki Kapuuno' tumalimpuun mamarinta ramuyun.’

¹⁰Kaa' amon ru sumubol kau ra rondo' bandar am kalo apuon, ongoi kau ra ralan maayo am indagu ra;

¹¹‘Kaau pana ru bandar min ti ondo' siminokot ra kasut mai ti, kabulin mai ra saang min. Kaa' karaa' min, mamaar noyo i Aki Kapuuno' tumalimpuun mamarinta ramuyun.’

¹²Balai' takamin, paat Orou Pupus no, maayo poyo guang ri Aki Kapuuno' makaasi' ra ulun bandar Sodom intor ra bandar raginii!”

¹³“Mumpara' boo laat ru bandar Korajin! Mumpara' boo laat ru bandar Bitsaida! Amon ru kaimuagan ondo' binaal ra tatanga' min nabaal noyo giu' ra bandar ru Tirus am Sidon, lair poyo ulun ru giu' i timinalikur intor ra tula nilai am nangulir!

¹⁴Paat ra Orou Pupus no, maayo guang ri Aki Kapuuno' makaasi' ra ulun Tirus am ulun Sidon ka akau!

¹⁵Am okou, pekan Kapirnaum! Kara' muno, painsawaton kou kia saboi ra suruga'? Patirin kou nai ra naraka!”[24]

¹⁶Indagu i Jisus ra maamaya' Nano, “Osoi ayuk mangkirongog ra raguon mino, mangkirongog niayuk Raki'. Kaa' osoi ayuk manggal ramuyun, manggal niayuk Raki'. Osoi ayuk manggal Raki', manggal niayuk Riso ondo' nanusub Raki'.”

¹⁷Katulu' ngoopor am ruo[25] ngaulun ondo' sinusub ri Jisus i naansukan kaga' ra ilo siminaguli' tuum Riso. Konilo, “Tuhan, riwato-riwato pana giminagaya' paat sinabit mai inggalan Muno ra akai nampagiru' risilo!”

¹⁸Indagu i Jisus risilo, “Nakito Ku Tingganai ru riwato naratu' intor ra limbowon koson ra ganit.

¹⁹Rongogo' min! Inanian takamin ra kuasa' manginjang ra kukuo makabisa' am lingait am niayuk kuasa' makaanggal ra ikang ru pantula' mino. Kolondo' mampakaruol ramuyun.

²⁰Kaa' kabalu' pana koson raginio, pai' kau pakaansuk sabap ra riwato-riwato gumagaya' ramuyun, kaa' pakaansuk kano sabap ra inggalan mino tinulisan noyo ra suruga'.”

²¹Paat ragili niayuk naansukan i Jisus ra kinuasa' Io ru Ambiluo ri Aki Kapuuno',[26] indagu Io, “Ama', Tuhan ru limbowon am tana'! Paringkuanangan Kuno Rirun sabap ra pinakito Mu noyo ra ulun kolondo' kapandayan ondo' pinasibuni Muno intor ra ulun mapintar. Ama', ginio noyo kasagaan Muno.

²²Pinataakan ri Ama' ngaangai' Raki'. I Ama' ayuk rondo' makaulig ra Anak am Anak ayuk rondo' makaulig ra Ama'. Am osoi ayuk kasagaan ru Anak no mambala' am mampaulig ra Ama' Nano.”

²³Pangkaili boo i Jisus ra maamaya' Nano am indagu risilo ayuk, “Mumpara' boo bonsoi min ondo' makakito ra inilayan mino raino ti!

²⁴Balai' takamin, intor noyo ra galing i masuang nabi am raja' masaga' milong ra nakito min ti, kaa' kalo nakakito ilo. Masaga' ilo rumongog ra naining min ti, kaa' kalo nakaining ilo.”

²⁵Ratong sangulun mangingila' ra Ukum ri Musa ri Jisus koson mangkinam Riso. Pangkuot io, “Tuan! Atan kia baalon kutu koson makaalap ra kaayagan mantilayun?”

²⁶Taam i Jisus, “Atan kon ru Buuk Kitab? Atan pamaguangan muno raginio?”

²⁷Taam ulun i, “ ‘Tagami' noyo Tuhan i Aki Kapuuno' muno, ra ngaangai' ru guang muno, saliguor muno, ikang muno am pangkaraan muno’; am ‘Tagami' noyo ulun ra bokon koson okou niayuk monogom ra kaayagan muno galama'.’ ”

²⁸Indagu i Jisus riso, “Motopot taam muno. Baalo' noyo ginio, am maayag kou.”

²⁹Kaa' mangingila' ra Ukum ri Musa no masaga' mampakito ra io motopot. Pangkuot io, “Osoi ulun ra bokon ondo' tagamin kuno?”

³⁰Taam i Jisus, “Mokoondo' sangulun intor ra Jirusalim mongoi ra Jiriko. Inawangan io ru ulun malaat am ginaawan ra kuliamos am linamba' io ru giali am pinoloso io nalausan.

³¹Nakainamot ragili nansail sangulun imam Jaudi ra giu' i. Kakito no ulun nalausan i, pagiliu io.

³²Koson niayuk ra sangulun papag ru Liwi, mangingindangan ra imam, nansail ra giu' i. Inggaari' am ilai' no ulun i, kaa' saili' no ayuk am ugar.

³³Kaa' mokoondo' sangulun intor ra libung ru Samaria nansail ra giu' i. Kakito no ulun i, makaasi' io kaga' riso.

³⁴Inggaari' no ulun i, tapisi' no pipilat nali ra umau am wain am bongkoso' no. Posokoyo' no boo ulun i ra kaladai nano am ibito' no ra baloi siwa' am alungi' no ra giu' i.

³⁵Io suabon, anii' no tatangan ra baloi siwa' i ra ruo ngampila' ruit pirok am ragui' no, ‘Alungi' ulun no am paat ra aku sumaguli' ragiti, bayarin tokou poyo ra atan ayuk pinaruang muno ra ondo' kalo naukop no.’ ”

³⁶Pupusi' boo ri Jisus, “Guang muno, osoi intor ra talu ngaulun ti motogom ra ulun tinakawan i?”

³⁷Taam mangingila' ra Ukum ri Musa i, “Ulun ondo' makaasi' riso no.” Indagu boo i Jisus, “Ugar am bayaa' noyo paliso koson raginio!”

³⁸Paat ri Jisus am maamaya' Nano nangkiralan, minapit ilo ra rondo' pamagunan. Giu' i, mokoondo' sangulun ruandu' makainggalan ri Marta nangapu risilo ra baloi nali.

³⁹I Marta ti mokoondo' sangulun pongkotob ra ruandu' makainggalan ri Maria. Nanturung i Maria ra tuma' ru kalayam ru Tuhan Jisus mangkirongog ra pangilaan Nali.

⁴⁰Kaa' magalabo i Marta sabap ra masuang kandoi baalon nano. Inggaari' no i Jisus am indagu, “Tuhan, polosoon Mu ayuk kia pongkotob kutu kalo mangindangan raki'? Susubo' io mangindangan raki'!”

⁴¹Taam i Jisus, “Marta, magalabo am maimamang kou ra masuang baal.

⁴²Kaa' sotopot no rondo' ayuk maaru' baalon muno. Ondo' pinili' ri Maria ti motopot, am tumilayun ginio riso.”