Read Timugon Murut LUKAS 11 Bible Online

LUKAS 11 - Timugon Murut bible

LUKAS 11

¹Paat ra sangarawan, nakiasi' i Jisus giu' ra rondo' intok. Kakai' nakiasi', indagu sangulun intor ra maamaya' Nano, “Tuhan, ilaa' akai makiasi' koson i Juanis nangila' ra maamaya' nano nakiasi'.”

²Indagu i Jisus risilo, “Pakiasi' kano ri Aki Kapuuno' koson ragitio, ‘Ama', omporon inggalan Muno. Gama' ru Okou mamarinta giti ra tana' ti.

³Anii' akai no ra akanon ra moonong orou.[27]

⁴Ampuno' noyo tula mai sabap ra akai pana mangampun ra moonong ulun ondo' makatula ramon. Am palabuso' akai no ra pangkinaman.’ ”

⁵Pagabig i Jisus ra maamaya' Nano, “Amon ru sangulun intor ramuyun mongoi ra baloi ru rangan ra iotanga' rondom, am mindagu io, ‘Rangan, pairaa' aku talu ngampila' ruti',

⁶sabap ra mokoondo' sangulun rangan kuno ralalom pangkiralanan minapit ra baloi kuno am kolondo' akanon pasulungon kuno riso!’

⁷Ati koson amon ru tumaam rangan muno intor ra ralalom, ‘Pai' pantipagon raki'! Inangaban ku noyo kulobon no. Aku am anak-anak kuti nombobolong noyo, boboon aku sumukal mangani' rirun ra atan ayuk pana.’ ”

⁸Indagu i Jisus, “Ati kulaan? Kabalu' pana marara' io sumukal mangani' ra kitaakon muno, sabap ra io rangan muno, sumukal io niayuk am mangani' rirun, sabap ra kalo mauyu' kou makikitaak.

⁹Ginio ra mambala' Aku ramuyun: Pakitaak kano am aniin kau; paguyum kano am makaalap kau; titiko' min kulobon no am ukabin kau.

¹⁰Sabap ra moonong ulun ondo' makitaak makaalap, ondo' maguyum makatuum am kulobon ukabin ra ulun ondo' manitik.

¹¹Kalo noyo lair sangulun ama' mangani' ra anak nano ra kukuo amon ru papait kitaakon nano!

¹²Kapoam mangani' ra lingait amon ru makitaak io ra talu'!

¹³Kula' pana laat mino, mapandai kau mangani' ra moonsoi ra anak mino. Mulu' poyo i Ama' giu' ra suruga'! Io pana mangani' ra Ambiluo Nano[28] risilo ondo' makitaak Riso!”

¹⁴Paat ra sangarawan nampagiru' i Jisus ra riwato ondo' nompokobobou. Pakapagiru' riwato i, tumalimpuun ulun no mindagu. Nangimuag ngai' ulun.

¹⁵Kaa' mokoondo' minindagu, “Makapampagiru' Io ra riwato sabap ra inanian Io ri Biiljibul, Tingganai ru ngaangai' riwato no, ra kuasa'.”

¹⁶Mokoondo' ulun ra bokon i masaga' mangkinam ri Jisus. Susubo' nilo i Jisus mambaal ra kaimuagan koson tatandu' ra iniou Io ri Aki Kapuuno'.

¹⁷Kaa' napandayan ri Jisus atan guangon nilai. Indagu Io risilo, “Rondo' pagun ondo' nakapantutuliar sabap ra mansasangor ilo ra rondo' am bokon, maaru' mapuso. Sambaloi ondo' nansusuai sabap ra mansasangor ilo ra rondo' am bokon, maaru' mabintas.

¹⁸Amon ru natatayar pamarintaan ru Tingganai ru riwato no sabap ra mansasangor ilo ra rondo' am bokon, ati kulaan ilo tumaan? Mindagu kau nampagiru' Aku ra riwato sabap ra inanian Aku ri Biiljibul ra kuasa'.

¹⁹Koson poyo raginio, osoi ra kuasa' inalap ru maamaya' mino mampagiru' ra riwato? Ilo galama' mapaintutun ra akau noyo galama' kalo motopot!

²⁰I Aki Kapuuno' nangani' Raki' ra kuasa' mampagiru' ra riwato am gitio noyo tatandu' ra timinalimpuun noyo i Aki Kapuuno' mamarinta ramuyun.

²¹Amon ru sangulun maikang ondo' makailang magalung ra baloi nano galama', ngaangai' kuliamos nano kalo matakou.

²²Kaa' amon ru sangulun ondo' maikang poyo intor riso no, mongoi pakimansangor riso, maaru' kalo maanggal no. Gaawo' ru ulun no kinandoi mangayou nali ondo' pinagalung no ra kuliamos nali, am ondo' tinakou nali tatayaron no.

²³Osoi kalo maya' Raki', sotopot no manggal Raki'. Osoi kalo mangindangan Raki' manimung, sotopot no mampatuliar!”

²⁴“Paat ra riwato mangiruan ra sasangulun, mangkakayat riwato no ra intok masiluk maguyum ra intok tangusan. Amon ru kolondo' matuum no, mindagu io, ‘Moonsoi sumaguli' aku subol ra intok ondo' tinatang kuli.’

²⁵Saguli' io am ilai' no mapasau am moonsoi baloi i.

²⁶Ingkual riwato no am pangkimait ra tulu' riwato ra bokon ondo' malaat poyo intor riso, am ongoi ilo ayan ra inan ru ulun no. Baal ru ulun no malaat poyo toojo intor ra galing i.”

²⁷Paat ri Jisus minindagu raginii, indagu boo Riso sangulun ruandu' intor ra tatanga' ru ulun masuang, “Pakaansuk noyo ruandu' ondo' naganak am nampatiti' rirun!”

²⁸Kaa' taam i Jisus, “Sotopot no, pakaansuk noyo ilo ondo' mangkirongog ra ragu ri Aki Kapuuno' am gumagaya'!”

²⁹Tatanga' ru ulun masuang liminimpu ri Jisus, tungguli' No ragu Nali, “Mumpara' boo laat ru ulun ra raiti'! Mompogogot ilo ra kaimuagan. Kolondo' rondo' pana kaimuagan taakin risilo kaa' kaimuagan intor ri nabi Junus ayuk.

³⁰Koson ri nabi Junus nasauk ra rondo' tatandu' ra ulun ru bandar Niniwi ra galing i, Anak ru Ulun pana masauk ra tatandu' ra ulun ra raiti'.

³¹Paat ra Orou Pupus no, Raja' ruandu' ru pagun Syiba migor am manguu' ra ulun ra raiti', sabap ra maalur ugar nali mongoi pangkirongog ra pangilaan matanda' intor ra Raja' Salomo i. Mindagu Aku ramuyun, giti raino mokoondo' sangulun maatang poyo intor ra Raja' Salomo!

³²Paat ra Orou Pupus no, mamagun ru Niniwi migor am manguu' ramuyun, sabap ra timinalikur ilo no intor ra tula nilo paat ra ilo nangkirongog ra ragu ri Junus. Kaa' giti raino mokoondo' sangulun ondo' maatang poyo intor ri Junus!”

³³“Kolondo' sangulun pana mansikit ra lampung am pasibunion kapoam tingkapin ra pasu'.[29] Maaru' patampakon no ra tampakan ru lampung, maa' raginio makito ru ulun sinda nano paat ra ilo mumpos.

³⁴Mato muno koson ra lampung ru inan muno. Amon ru mato muno moonsoi, ngaangai' inan muno matawangan ru sinda no. Kaa' amon ru mato muno malaat, ngaangai' inan muno molondom.

³⁵Ginio ra ilalai', pai' masaboi sinda ru inan muno lumondom!

³⁶Amon ru natawangan inan muno ra sinda am kolondo' malandaman, ngaangai' inan muno matawang, koson sinilau kou ru lampung ondo' mapaang kaga'.”

³⁷Kakai' ayuk i Jisus minindagu raginii, pangkimait sangulun ru Parisi no Riso mangakan giu' ra baloi nano. Ongoi i Jisus am panturung am tumalimpuun mangakan.

³⁸Nangimuag ulun-ulun ru Parisi no nagilong ri Jisus nangakan am kalo nambagu' galing ra kalindu' maya' ra kaulayan nilai.

³⁹Kaa' indagu Tuhan riso, “Akau ulun-ulun ru Parisi! Mampaliung kau ra ralimbou ru galas am piring mino, kaa' ralalom ru guang mino masuang puka' am kalaatan.

⁴⁰Sasambungon kau! Karuo-ruo ralimbou am niayuk ralalom, binaal ri Aki Kapuuno'.

⁴¹Pataaki' noyo suang ru galas am piring mino ra ulun musikin, bagu maya' ra pagilaian ri Aki Kapuuno', ngaangai' no mapasau ramuyun.

⁴²Mumpara' boo usung mino ulun ru Parisi! Kabalu' pana taakin min ri Aki Kapuuno' mopor piatus ra selasih, inggu am ngaangai' apa' pampagamis ra akanon ra bokon, kaa' inimpayan min katimpakan am togom ri Aki Kapuuno'. Baalo' min karuo-ruo am pai' impayi' bokon no.

⁴³Mumpara' boo usung mino ulun ru Parisi! Masaga' kau ayuk ra panturungan pinabatang ra saang ra baloi sambayangan am urumaton ru ulun giu' ra pasar.

⁴⁴Mumpara' boo usung mino! Koson kau ra lobong kolondo' tatandu' ondo' kinjangin ru ulun kaa' kalo mapandayan nilo.”

⁴⁵Indagu sangulun intor ra mangingila' ra Ukum ri Musa no ri Jisus, “Mangingila', amon ru koson raginio ragu Muno, akai pana asabin Mu niayuk!”

⁴⁶Taam i Jisus, “Akau pana mangingila' ra Ukum ri Musa, mumpara' boo usung mino! Pangilaan min ra maagat no pasaanin min ra ulun, kaa' akau galama' kalo masaga' mangindangan risilo.

⁴⁷Mumpara' boo usung mino! Mambaal kau ra lobong ra moonsoi ru nabi-nabi ondo' pinatoi ru kinamatuaan mini.

⁴⁸Binaal min ti mangiou niayuk ra kandoi ru kinamatuaan mini. Ilo namatoi ra nabi-nabi no am akau mambaal ra lobong nilai!

⁴⁹Ginio nai kon ru Kapintaran ri Aki Kapuuno', ‘Manusub Aku ra nabi am rasul Kuno mongoi risilo, kaa' sampiruo intor risilo no potoyon nilo am bokon no imboloon!’

⁵⁰Ginio boo ra ulun ra raiti' ukumin sabap ra namatayan ra ngaangai' nabi intor ra tana' ti binaal.

⁵¹Io ginio intor ra namatayan ri Abil saboi ra namatayan ri Jakaria. Pinatoi io ra lolot ru altar am Intok Matulai. Balain takamin, ulun ra raiti' ukumin sabap ra namatayan ra ngaangai' nabi no.

⁵²Akau mangingila' ra Ukum ri Musa, mumpara' boo usung mino! Binuni min kunsi' ru kulobon kapandayan. Akau galama' marara' sumubol kaa' manginga' kau ra ulun bokon ondo' mapirot mumpos!”

⁵³Pakaugar i Jisus intor ra giu' i, sigain ragu Nali ru mangingila' ra ukum ri Musa am ulun-ulun ru Parisi. Masuang pangkuatan nilai Riso,

⁵⁴koson maguyum ilo ra sala ralalom raguon Nali, maa' raginio makaalap ilo ra panguwan mamparakop Riso.