Read Timugon Murut LUKAS 12 Bible Online

LUKAS 12 - Timugon Murut bible

LUKAS 12

¹Liliwa' ra kukula' ngaribu ngaulun nagigisok, saboi mangakinjangan nilo kalayam ru rondo' am bokon, indagu galing i Jisus ra maamaya' Nano, “Ilalai' min pangilaan ru ulun-ulun ru Parisi, ioginio pagabawan nilai.

²Atan ondo' nolopot bungkalaron am moonong ondo' kalo igondo' pinabala' pasalulaan.

³Atan ondo' raguon min ra intok molondom, maining ra intok matawang, am atan ondo' konoson min ra talingo ru ulun ra lamin naaput, pabalaan ra ulun masuang.”

⁴“Pabukat kau ngaangai', karaa' min, pai' kau kalaa' risilo ondo' mamatoi ra inan, kaa' malupus raginio kolondo' kuasa' mambaal ra atan ondo' malaat poyo.

⁵Tuluin takamin osoi kalaanin. Kalaa' kano ri Aki Kapuuno' sabap ra mopongo mamatoi, makakuasa' poyo mamatir ra ambiluo ru ulun ra naraka! Balain takamin toojo, kalaa' kano Riso!

⁶Kalo kia limo ngainan pilit talanon ra logo ruo ngausin? Kaa' kolondo' sanginan pana lilianin ri Aki Kapuuno'.

⁷Sotopot no inuntob noyo ngaangai' abuk ra ulu mino. Ginio ra pai' kau kalaa'. Mologo kau poyo intor ra masuang pilit ra pagilangan ri Aki Kapuuno'!”

⁸“Mindagu Aku ramuyun, osoi mangiou ra saang ru ulun ra mangintopot io Raki', Anak ru Ulun pana mangiou ra ulun no ra saang ru malaikat-malaikat ri Aki Kapuuno'.

⁹Kaa' osoi magali' Raki' ra saang ru ulun, Anak ru Ulun niayuk magali' ra ulun no ra saang ru malaikat-malaikat ri Aki Kapuuno'.

¹⁰Osoi ayuk magasab ra Anak ru Ulun, ampunon niayuk; kaa' osoi ayuk magasab ra Ambiluo ri Aki Kapuuno', kalo ampunon.

¹¹Paat ra salasayon kau ra saang ru gabenor, kapoam giu' ra baloi sambayangan, pai' kau pagalabo ra ati kulaan akau tumaam kapoam atan paraguon mino.

¹²Sabap ra paat raginio ilaan kau ru Ambiluo ri Aki Kapuuno' ra atan pataamon min.”

¹³Indagu sangulun intor ra ulun masuang no ri Jisus, “Mangingila', susubo' maayo kuno ra ungkuyon no mantayar ra rapu' patungkuson ru ama' maili.”

¹⁴Indagu i Jisus riso, “Kua rirun ti, pai' ru Aku inanian ra kuasa' sumauk ra akim, kapoam mantayar ra rapu' patungkuson mino!”

¹⁵Indagu poyo i Jisus risilo ngaangai', “Karaa' min, am ilalain kalit mino. Sabap ra sotopot no, sala' ka kuliamos ondo' maatang ra kaayagan ru ulun, kabalu' pana langkaya' io kakaga'.”

¹⁶Tunungo' boo ri Jisus abig ragitio risilo; “Sangulun langkaya' mokoondo' ra tana' ondo' maulian ra moonsoi.

¹⁷Mangkara' io, ‘Kolondo' boo intok pambulian ku ra ampos ru tatanom kutu. Atan kia baalon kutu?

¹⁸Mambaal aku koson ragitio; lunsayon ku boo gudang-gudang kuno am mambaal aku ra maayo poyo, koson papasuangan ku ra ampos ru tana' am ngaangai' kuliamos kuno ra bokon.

¹⁹Kopongo raginio bagu mampaguang aku, pakaansuk no! Masuang toojo kuliamos kuno ondo' sama' saboi kukula' ngambilor. Matasu' aku boo! Pangakan, panginum, am pakaansuk no!’

²⁰Kaa' indagu i Aki Kapuuno' riso, ‘Ulun sasambungon! Rondom ra raiti' niayuk patayan muno! Osoi mangalap ra ngaangai' ondo' tinimung muno galama'?’ ”

²¹Pupusi' boo ri Jisus, “Gitio noyo pinambalos ra ulun ondo' lumuntuk ayuk manimung ra kuliamos, kaa' sotopot no musikin io ra pagilangan ri Aki Kapuuno'.”

²²Indagu i Jisus ra maamaya' Nano, “Ginio ra mindagu Aku ramuyun: Pai' kau pagalabo ra kaayagan min koson atan akanon kapoam bayangon mino.

²³Kaayagan maatang poyo intor ra akanon, am inan maatang poyo intor ra bayang mino.

²⁴Ilai' min ayuk susuit bangkaak no! Kalo mantanom ilo ra sampug kapoam mangkumos, kolondo' intok pampaulian nilo ra akanon, kaa' paakanon ilo ri Aki Kapuuno'! Mologo kau poyo intor ra susuit no!

²⁵Osoi intor ramuyun no maalap maayag mabuoi[30] ru maimamang io raginio?

²⁶Amon ru kolondo' kuasa' min mambaal raginio, kua pagalabo kau ra baal ra bokon?

²⁷Ilai' min ati kulaan busak tumuu' giu' ra limayak. Kalo mangandoi ilo kapoam manalur ra konoon. Kaa' mindagu Aku ramuyun, kabalu' pana langkaya' kaga' Raja' Salomo, kalo nambayang io koson ra kinoonsoi ru busak no!

²⁸Amon ru mamparamai i Aki Kapuuno' ra sakot giu' ra limayak, ondo' orou raiti' tumuu' kaa' susuab talason am solobon ra apui, mulu' poyo boo ramuyun. Topot-topot kalo maikang pangintapatan mino!

²⁹“Ginio ra sala' ka magalabo kau ayuk mangkara' ra atan akanon am inumon.

³⁰(Sabap ra ginio ondo' masalok karaan ru ulun ondo' kalo mangintopot ri Aki Kapuuno'.) I Ama' min giu' ra suruga' nakapandai ra kitaakon min.

³¹Kaa' pirot kano ra i Aki Kapuuno' mamarinta ra kaayagan mino, bagu aniin kau ra ngaangai' raginio.”

³²“Pai' kau kalaa', kabalu' pana kalo masuang kau, sabap ra i Ama' min masaga' mangani' ramuyun ra barakat ru pamarintaan Nano.

³³Talano' ngaangai' rapu' mino, am ruit no tatayaro' ra ulun-ulun musikin. Baalo' min rumpit pambulian ra ruit ondo' kalo maapu', ioginio rapu' giu' ra suruga' ondo' mantilayun, kalo matakou am kalo niayuk mokokot ru lipos.

³⁴Sabap ra ati ayuk pana rapu' mino, giu' niayuk guang mino!”

³⁵“Tampos kano manguma' ra atan ayuk ondo' maaru' masauk, koson ra ulun mambayang am mansikit ra lampung.

³⁶Tilu kau ra ulipon ondo' maginaa ra tuan nilai muli' intor ra bunsag ru paguguatan. Paat ra tuan nilai makiukab ra kulobon, ukabin nilo ra mataki'.

³⁷Mumpara' boo bonsoi ru ulipon-ulipon ondo' nangkuliman am nakatampos paat ra tuan nilai matong! Balain takamin, rumalin boo tuan no, susubon no ulipon-ulipon nano manturung am sulungin no ilo.

³⁸Mumpara' boo bonsoi ru ulipon-ulipon no, amon ru ilai' ru tuan nilai ra nangkuliman am nakatampos ilo, kabalu' pana matong io ra tanga' ru rondom kapoam mabuoi intor raginio!

³⁹Karaa' min gitio! Amon ru napandayan ru tatangan ra baloi no sanggilan ratangan ru mantatakou, kalo polosoon no mantatakou no sumubol ra baloi.

⁴⁰Akau pana, pangkuliman am tampos kau, sabap ra Anak ru Ulun no sumaguli' ra orou kalo guangon min.”

⁴¹Indagu i Pitrus, “Tuhan, Okou nantunung ra abig ti, pasukuon ayuk kia ramon kapoam ra ngaangai' ulun?”

⁴²Taam ru Tuhan, “Osoi ulipon ra gumagaya' am matanda' toojo? Io no ondo' susubon ru tuan nano maningganai ra ulipon ra bokon, am mangani' risilo ra akanon paat ra inaru' noyo.

⁴³Mumpara' boo bonsoi ru ulipon matanda' no amon ru muli' tuan nali, am ilai' no binaal ngaangai' nanusuban nali!

⁴⁴Balain takamin, ulipon matanda' no lansanin ru tuan nano magalung ra ngaangai' rapu' nano.

⁴⁵Kaa' amon ru kon ru guang ru ulipon no, ‘Mabuoi sagulian ru tuan kuli,’ am tumalimpuun io mampalamba' ra ulipon ra bokon, ungkuyon am ruandu', mangakan am manginum io saboi magauk,

⁴⁶am paat boo ra kalo kinara' am kalo napandayan ru ulipon no, pulusat ru tuan nali minuli'. Totokon[31] io ru tuan nano am patiluon ra ukum ru ulun ondo' kalo gumagaya' ra panusuban ri Aki Kapuuno'.

⁴⁷Ulipon ondo' nakapandai noyo ra kasagaan ru tuan nano, kaa' kalo tumampos io mambaal, loposon io ra maruol toojo.

⁴⁸Kaa' ulipon ondo' kalo nakapandai ra kasagaan ru tuan nano, am makasala niayuk, loposon io ra kalo kula' ruol. Ulun ondo' inanian ra masuang no, masuang niayuk sikaan intor riso no. Amon ru masuang poyo pinalansan ra sangulun no, mulu' poyo suang ru kitaakon intor riso.”

⁴⁹“Minatong Aku ra tana' ti magibit ra apui ru ukum ri Aki Kapuuno'. Malansan Aku kaga' ra napaangan noyo apui no!

⁵⁰Mokoondo' kaimbalaan masauk Raki' am mumpara' boo labo Kuno saboi ngaangai' no mopongo!

⁵¹Guang min rinatangan Kutu magibit ra pababansayan ra tana' ti kia? Balain takamin, sala' ka pababansayan, kaa' pantutulaan.

⁵²Intor raino, sambaloi makasuang limo ngaulun mantutula', talu ngaulun mantula' ra ruo ngaulun kapoam ruo ngaulun mantula' ra talu ngaulun.

⁵³Ama' mantula' ra anak ungkuyon nano, am anak ungkuyon mantula' ra ama' nano. Ina' mantula' ra anak ruandu' nano, am anak ruandu' mantula' ra ina' nano. Iwan ra ruandu' mantula' ra anak mangiwan ra ruandu' nano, am anak mangiwan ra ruandu' mantula' ra iwan ra ruandu' nano.”

⁵⁴Indagu poyo i Jisus ra ulun masuang no, “Paat ra makito min gaun giu' ra tampilon ra kalasaan, mindagu kau, ‘Rumasam orou raiti',’ am totopot rumasam.

⁵⁵Paat ra makaliman kau ra angin intor ra rabugus sumoyob, mindagu kau, ‘Mapangit orou raiti',’ am totopot malasu'.

⁵⁶Akau maabau-abau! Mapandai kau magilong ra tatandu' ru limbowon am tana', kua pai' kau pakarati' ra tatandu' ra orou raiti'.”

⁵⁷“Kua pai' kau pakapandai ra atan motopot baalon min?

⁵⁸Amon ru mokoondo' sasangulun manguu' rirun giu' ra saang ru akim, kinami' salasayo' baal ragitio ra akau kalo poyo makasuku' ra akim. Amon ru kalo, pataakin kou ru akim no ra pulis am pasubolon kou ralalom ru lamin pangaputan.

⁵⁹Mindagu Aku ramuyun, kalo makaingkual kou intor ra lamin pangaputan no ru kalo bayarin mu ngaangai' tagi' muno.”