Read Timugon Murut LUKAS 16 Bible Online

LUKAS 16 - Timugon Murut bible

LUKAS 16

¹Indagu i Jisus ra maamaya' Nano, “Mokoondo' sangulun langkaya' mampagaji' ra sangulun manijor magalung ra rapu' nali. Binalaan io ra manijor ti nampaluung ra ruit nano.

²Piawo' no manijor i am indagu, ‘Atan nua' norongog ku ra tunung intor rirun? Pataaki' raki' buuk panguntaban intor ra ngaangai' rapu' kuno, sabap ra intor raino polonggoon tokou.’

³Manijor ti nangkara', ‘Atan boo nua' baalon kutu? Polonggoon aku ru tuan kutu. Kalo makalulu' aku manangkul am mauyu' aku makikitaak.

⁴Nakapandai aku ra atan baalon kutu, koson paat ra aku polonggoon mokoondo' rangan mangapu raki' ra baloi nilono.’

⁵Ginio ra piawo' no boo ngaangai' ulun ondo' nagira' ra tuan nali. Indagu io ra ulun kasaa' i, ‘Kula' suang ru ira' muno ra tuan kuli?’

⁶Taam ulun no, ‘Maatus ngalunggau umau jaitun.’ Indagu manijor no riso, ‘Gitio buuk panguntaban mutu; ribaki' panturung, am tulisi' limo ngoopor.’

⁷Indagu io ra ulun bokon i, ‘Okou, kula' ira' muli?’ Taam ulun no, ‘Saribu ngangkarung gandum.’ Indagu manijor i, ‘Gitio buuk panguntaban mutu; tulisi' balu' ngaatus ayuk.’

⁸Inompor ru ulun langkaya' i manijor ondo' kalo kalalansanan no sabap ra mapintar io. Sabap ra ulun ru tana' ti mapintar toojo maguyum ra rangan ka ulun ondo' makaulig ri Aki Kapuuno'.”

⁹“Balain takamin: Paguyum kau ra rangan mampakai ra ruit, koson paat ra kalangkayaan mapuso, apuon kau ra ayanan mantilayun.

¹⁰Osoi kalansanin ra baal kalo maatang, kalansanin niayuk ra baal maatang. Kaa' osoi mamparuung ralalom baal kalo maatang, mamparuung io niayuk ralalom baal maatang poyo.

¹¹Amon ru kalo boo kalansanin kou ra okou mampakai ra kalangkayaan ru tana' ti raino, atan kosonon ra kalangkayaan ondo' mantilayun?

¹²Amon ru akau kalo boo kalansanin mampakai ra kuliamos ru ulun, osoi masaga' mangani' ramuyun ra atan ayuk pana?

¹³Kolondo' sangulun ulipon pana makapangandoi ra ruo tuan. Amon ru koson raginio, tagamin no sangulun am kasisangin no sangulun, kapoam gagayaan no sangulun am kalo rongogon no sangulun. Koson niayuk ramuyun ra kalo makapangandoi kau toojo ri Aki Kapuuno' magampan maguyum ra kalangkayaan.”

¹⁴Paat ra ulun-ulun ru Parisi nokorongog ra ngaangai' ragu ragitio, nangiis ilo ri Jisus sabap ra ruit ayuk karaan nilo.

¹⁵Indagu i Jisus risilo, “Paliso mino koson moonsoi ayuk ra pagilangan ru ulun, kaa' suang ru guang mino napandayan ri Aki Kapuuno'. Atan ondo' kinara' ru ulun ra mokologo, kolondo' logo ra pagilangan ri Aki Kapuuno'.

¹⁶Sotopot no Ukum ri Musa am kitab ru nabi-nabi pinataak polos ra paat ri Juanis Mampariu' ayuk. Intor ragili, Tanou Moonsoi intor ati kulaan i Aki Kapuuno' mamarinta pinabala' noyo, am ulun gumogot masauk ra ulun ri Aki Kapuuno'.

¹⁷Kaa' maluoi poyo toojo limbowon am tana' ti mapuso intor ra rondo' urup pana ralalom Ukum ri Musa luluon.

¹⁸Osoi mangali ra andu' nano am maguot ra ruandu' bokon, lumapau io. Koson niayuk ra ungkuyon ondo' maguot ra ruandu' ondo' nangali ra ralaki, io ti pana lumapau.”

¹⁹“Mokoondo' sangulun langkaya', bayang nano mongologo am maayag io ralalom kalangkayaan ra moonong orou.

²⁰Mokoondo' poyo sangulun makikitaak, makainggalan ri Lajarus. Napuu inan nali ra ruruko. Maindalom i Lajarus ibiton ra tuma' ru baloi ru langkaya' no

²¹am malansan io makaalap ra akanon ondo' napulayat ru langkaya' i. Tilain poyo ru uku' ruruko nali.

²²Patoi i Lajarus am inibit ru malaikat ra kinamatuaan nali, i Abragam, giu' ra suruga'. Ulun langkaya' no pana minatoi am linobong.

²³Liliwa' io imboloon giu' ra naraka,[36] nantingaa' io ra rasawat am nakito no intor ra maalur i Abragam am i Lajarus nagumbir.

²⁴Golok io, ‘Aki Abragam! Pakaasi' no raki'! Susubo' i Lajarus mompososop ra tutulu' nano ra timug pampasalui ra rila' kutu, sabap ra maimbolo' aku toojo ralalom ru apui ti!’

²⁵Kaa' taam i Abragam, ‘Aki, karaa', paat ra okou naayag inanian kou ra ngaangai' ondo' moonsoi, am i Lajarus nakaalap ra ngaangai' ondo' malaat. Kaa' raino makaansuk i Lajarus ragiti, am okou maimbolo' toojo.

²⁶Suai poyo intor raginio, mokoondo' poyo rondo' lolot ritakau, saboi ulun ru giti kalo mokoongoi ra giu' no, am ulun ru giu' no kalo mokoongoi ragiti!’

²⁷Indagu ulun langkaya' no, ‘Aki, amon ru koson poyo raginio, makitaak aku rirun ra poongoyo' raki' i Lajarus ra baloi ri apa'.

²⁸Lakat poyo soroi limo ngaulun pinongkotob kuno ra giu' i. Polosoon io no mongoi pansawai risilo, koson pinongkotob kuno kalo makasuku' ra intok pangimbalaan ti.’

²⁹Taam i Abragam riso, ‘Sala' ka kia mokoondo' Ukum ri Musa am kitab ru nabi-nabi mampakara' risilo? Polosoon noyo pinongkotob muno gumagaya' ra kaintutunan raginio.’

³⁰Kaa' indagu ulun langkaya' no, ‘Aki Abragam, kalo mampaguang ilo toojo, kaa' amon ru mokoondo' sangulun maayag saguli' intor ra kapatayan am matong risilo, maaru' tumalikur ilo intor ra tula nilo.’

³¹Kaa' taam i Abragam riso, ‘Amon ru kalo mangkirongog ilo ra kaintutunan ri Musa am nabi-nabi, kalo niayuk mangintopot ilo kabalu' pana mokoondo' maayag saguli' intor ra kapatayan.’ ”