Read Timugon Murut LUKAS 17 Bible Online

LUKAS 17 - Timugon Murut bible

LUKAS 17

¹Indagu i Jisus ra maamaya' Nano, “Maaru' mokoondo' niayuk pangkinaman saboi ulun mambaal ra tula pana kaa' aibui boo ra ulun ondo' mangkinibit ra tula ti!

²Moonsoi poyo amon ru pobongkoson batu maayo no ra liog nano, am papatiron io ra raat, kalo boo mangkinibit io ra ulun ondo' malawo pangintapatan makatula.

³Ilalai' min! Amon ru makatula pabukat muno, sawayo' io. Amon ru tumalikur io, ampuno' noyo io.

⁴Amon ru intulu' io makatula rirun ralalom songorou no am moonong io matong rirun am mindagu, ‘Makiampun aku toojo,’ ampuno' noyo io.”

⁵Indagu rasul-rasul ri Jisus, “Tuhan, iroto' pangintapatan mai ti.”

⁶Taam i Jisus, “Amon ru mokoondo' kau sanganu ayuk pangintapatan koson ra gayo ru unor ru mustard pana, bagu makaindagu kau ra puun ru ara ti, ‘Kabubul no am pakatanom giu' ra raat!’, io pana gumagaya' ra susuban muno.”

⁷“Amon ru mokoondo' ramuyun sangulun ulipon ondo' mamparagus kapoam magalung ra domba, mindagu kau kia riso ra io minuli' intor ra umo, ‘Ibok no, ribaki' mangakan?’

⁸Maaru' kalo! Kaa' mindagu kou riso ra, ‘Pongoono' akanon kuno, ralin no, am sulungin mu aku ra akanon am inumon; mopongo raginio okou bagu mangakan.’

⁹Sangulun ulipon kalo pana omporon ra io gumagaya' ra susuban ru tuan nano.

¹⁰Koson niayuk ramuyun; amon ru nabaal min noyo ngaangai' nanusuban, raguo' min, ‘Akai ti ulipon ayuk, nambaal akai ayuk ra kandoi maili.’ ”

¹¹Paat ri Jisus nangkiralan minongoi ra Jirusalim, minaya' Io ra lolot ru pagun ru Samaria am Galilia.

¹²Tatanga' Io sumubol ra rondo' pamagunan, natuum Io ru mopor ngaulun makamaruol ra kungkung ondo' maaja'. Minigor ilo intor ra maalur

¹³am golok, “Jisus! Tuan! Pakaasi' no ramon!”

¹⁴Kakito ilo ri Jisus, indagu Io, “Ongoi kano ra imam Jaudi am polosoo' io mangiou ra akau nababas noyo.” Liliwa' ilo nangkiralan i, nababas ilo.[37]

¹⁵Katutuni' ru sangulun intor risilo i ra nababas io, saguli' io liliwa' nongongompor ri Aki Kapuuno' ra bolos mosongou.

¹⁶Igulatur io ra tuma' ru kalayam ri Jisus am naringkuanang io. Ulun io ru Samaria.[38]

¹⁷Indagu i Jisus, “Sala' ka kia mopor ngaulun binabas i? Ati boo siam ngaulun i?

¹⁸Kua ulun bansa' ru bokon ti ayuk siminaguli' mongompor ri Aki Kapuuno'?”

¹⁹Indagu boo i Jisus ra ulun no, “Sukal no, am ugar no; pangintapatan muno namabas rirun.”

²⁰Pangkuot kukula' ngaulun ru Parisi ri Jisus sanggilan i Aki Kapuuno' matong mamarinta. Taam i Jisus, “Kolondo' tatandu' makito ra pamarintaan ri Aki Kapuuno' no matong.

²¹Kolondo' sangulun pana makaindagu, ‘Ilai', gitio io!’ kapoam ‘Ginio, giu' no!’ Sotopot no timinalimpuun noyo i Aki Kapuuno' mamarinta ramuyun.”[39]

²²Kopongo ragili indagu i Jisus ra maamaya' Nano, “Masuku' paat ra akau moogot makakito ra orou ru Anak ru Ulun, kaa' kalo makakito kau.

²³Mokoondo' mindagu ramuyun, ‘Ilai', giu' io no!’ kapoam ‘Ilai', giti io no!’ Pai' kau pagibaya'.

²⁴Nogondo' koson ra ganit mainpiat giu' ra limbowon, masilau intor ra sirangon polos ra kalasaan, koson raginio niayuk ra orou ratangan ru Anak ru Ulun.

²⁵Kaa' imboloon Io toojo galing am kalo apuon Io ru ulun ra raiti'.

²⁶Koson ra paat ru nabi Nuu ra galing i, koson niayuk raginio ra orou ru Anak ru Ulun:

²⁷Moonong ulun nagagakan am nagiginum ayuk; naguguot ilo saboi ra orou sinubalan ri Nuu ra kapal maayo no. Ratong boo rosob am naluus boo ngaangai' ulun ra bokon i.

²⁸Koson niayuk ra paat ri Lot. Moonong ulun nagagakan am nagiginum, nantatalan am nambabali, nagitatanom am natatambaloi.

²⁹Kaa' kasuku' orou ri Lot ilo sambaloi nangiruan ra bandar Sodom, ratu' boo apui am balirang intor ra suruga' am naumpo ngaangai' ulun ru bandar i.

³⁰Koson niayuk raginio orou ru Anak ru Ulun paintalangon.

³¹Paat orou raginio, ulun ondo' soroi ra tampak ru baloi nano, pai' noyo subol mongoi pangalap ra kuliamos. Koson niayuk ra ulun ondo' soroi giu' ra umo, pai' saguli' ra baloi.

³²Karaa' atan ondo' nasauk ra andu' ri Lot!

³³Osoi ayuk kalo masaga' mampataak ra kaayagan no, io no matatakan ra kaayagan ondo' motopot; kaa' osoi ayuk mampataak ra kaayagan no makaalap ra kaayagan ondo' motopot.”

³⁴Mindagu Aku ramuyun, paat ra rondom raginio, ruo ngaulun narulug nombolong ra rondo' pambalangan; sangulun ibiton am sangulun tatangon.

³⁵Ruo ngaulun ruandu' manginsar ra gandum; sangulun ibiton am sangulun tatangon.” [

³⁶Ruo ngaulun ungkuyon mangandoi ra umo; sangulun ibiton am sangulun tatangon.][40]

³⁷Pangkuot maamaya' ri Jisus no Riso, “Ati, Tuhan?” Taam i Jisus risilo, “Ati mokoondo' ra baangkai, giu' no timungan ru susuit mangakan ra baangkai.”