Read Timugon Murut LUKAS 18 Bible Online

LUKAS 18 - Timugon Murut bible

LUKAS 18

¹Pantunung boo i Jisus ra abig ragitio koson mangila' ra maamaya' Nano maa' raginio kalo lumonggo' makiasi'.

²Indagu Io, “Giu' ra rondo' bandar mokoondo' sangulun akim. Kalo malaa' io ri Aki Kapuuno' am kalo mangurumat ra ulun bokon.

³Giu' ra bandar no niayuk mokoondo' sangulun napuor ondo' masalok mongoi ra akim no makitaak ra panalasayan. Kon ru napuor no, ‘Indangano' aku manalasai ra pantula' kuno.’

⁴Nabuoi noyo akim no marara' mangindangan riso, kaa' pupus nali nakapangkara' boo guang nali, ‘Kabalu' pana kalo malaa' aku ri Aki Kapuuno' am kalo mangurumat ra ulun bokon,

⁵kaa' koson ra kalo boo mantipagon napuor ti raki', moonsoi salasayon ku ayuk kapaganan nano. Amon ru kalo, matong io ayuk raki' am mapagon aku poyo!’ ”

⁶Indagu boo Tuhan, “Rongogo' ragu ru akim ra malaat no!

⁷Amon ru kon poyo raginio, mulu' poyo i Aki Kapuuno' manalasai ra kapaganan ru ulun mangintopot riso sabap ra makiasi' ilo Riso orou-rondom. Mangindangan Io kia ra mataki'?

⁸Balain takamin, salasayon niayuk ri Aki Kapuuno' ra mataki'! Kaa' paat ra Anak ru Ulun no matong, mokoondo' kia ulun mangintopot Riso?”

⁹Tinunung niayuk ri Jisus abig ragitio ra ulun-ulun ondo' mangkara' ra ilo ayuk galama' motopot am magasab ilo poyo ra ulun bokon.

¹⁰Indagu Io, “Ruo ngaulun minongoi ra Baloi Tuhan koson makiasi'. Sangulun ru Parisi am sangulun mampalulur ra cukai.

¹¹Ulun ru Parisi no minigor am nakiasi' io,[41] kono, ‘Aki Kapuuno', paringkuanangan ku Rirun, sabap ra kalo makalit aku kapoam magabau, kapoam lumapau, koson ra ulun bokon. Paringkuanangan ku sabap ra aku sala' ka koson ra mampalulur ra cukai no.

¹²Ruo ngoorou ralalom saminggu' aku mampali am mampataak ra mopor piatus ra ngaangai' ampos maalap kuno.’

¹³Kaa' mampalulur ra cukai no giu' ayuk ra tinaulian am kalo makakau' mantingaa' ra suruga'. Luntugo' no kubab sabap ra mangiluk guang nali liliwa' minindagu, ‘Aki Kapuuno', pakaasi' no raki' ulun makatula ti!’ ”

¹⁴“Balain takamin: Intor ra ruo ngaulun i, sala' ka ulun-ulun ru Parisi i, kaa' ulun mampalulur ra cukai i ondo' motopot ra pagilangan ri Aki Kapuuno'. Moonong ulun minsawat guang, paingganaan, am moonong ulun minggana' guang, painsawaton.”

¹⁵Kukula' ngaulun nagibit ra lalaing boborok nilo ri Jisus koson mapabanta' Io ra kalindu' ra lalaing-lalaing no. Kakito ru maamaya' Nano baal raginio, sawayo' nilo ulun-ulun no.

¹⁶Kaa' piawo' ri Jisus lalaing-lalaing no am indagu, “Polosoo' ayuk lalaing-lalaing ti mongoi Raki'. Pai' min inggalari', sabap ra ulun koson ragitilo ondo' masauk ra ulun ri Aki Kapuuno'.

¹⁷Karaa' min gitio! Osoi kalo mangapu ra pamarintaan ri Aki Kapuuno' koson ra sangulun lalaing, ulun no kalo masauk ra ulun ri Aki Kapuuno'.”

¹⁸Pangkuot sangulun tingganai ru ulun ru Jaudi ri Jisus, “Mangingila' ra moonsoi, atan kia maaru' kuno baalon koson mokoowot ra kaayagan mantilayun?”

¹⁹Taam i Jisus riso, “Kua indagu kou ra Aku ti moonsoi? Kolondo' sangulun pana moonsoi, kaa' i Aki Kapuuno' ayuk.

²⁰Nakapandai kou ra Ukum ri Musa, ‘Pai' pansawa'; pai' pamatoi; pai' pantakou; pai' pagabau; am urumato' matuo muno.’ ”

²¹Taam ulun no, “Ngaangai' susuban no ginagaya' ku intor aku mamulok ayuk poyo.”

²²Korongog ri Jisus ginio, indagu Io ra ulun i, “Rondo' poyo baalon muno: Talano' ngaangai' rapu' muno, am ruit no tatayaro' ra ulun musikin am mokoowot kou boo ra rapu' giu' ra suruga'. Mopongo raginio, baya' no Raki'!”

²³Kaa' pokorongog ulun no ra ragu ri Jisus, mangiluk boo guang nali sabap ra langkaya' io toojo.

²⁴Ponontong i Jisus riso am indagu, “Mumpara' boo pagon ru sangulun langkaya' masauk ra ulun ri Aki Kapuuno'!

²⁵Matasu' poyo sanginan unta sumubol ra luang ru jarum intor sangulun langkaya' makaumpos ra Tana' Bagu ri Aki Kapuuno'.”

²⁶Pangkuot ulun-ulun ondo' nakaining ra ragu ri Jisus, “Amon ru koson raginio, osoi kia bayagon?”

²⁷Taam i Jisus, “Atan kalo mabaal ru ulun, mabaal ri Aki Kapuuno'!”

²⁸Indagu boo i Pitrus, “Ilai' noyo akai, iniruanan mai baloi maili koson maya' Rirun.”

²⁹Indagu i Jisus, “Balain takamin: Osoi ayuk mangiruan ra baloi, andu', pabukat, matuo, kapoam anak nano sabap ra mangandoi ayuk ri Aki Kapuuno',[42]

³⁰mauli' pambabalos riso ra raino ti am ra orou tauli no mokoowot io ra kaayagan mantilayun.”

³¹Piawo' ri Jisus mopor am ruo ngaulun maamaya' Nano am indagu Io risilo, “Rongogo'! Raino mongoi takau ra Jirusalim, sabap ra giu' masauk ngaangai' ondo' tinulisan noyo ru nabi-nabi intor ra Anak ru Ulun.

³²Pataakin Io ra ulun sala' ka Jaudi. Asabin, iison am niayuk tiwagin Io.

³³Loposon am potoyon nilo Io; kaa' malupus kataluan ra orou bayagon Io po saguli'.”

³⁴Kaa' kalo nangarati' maamaya' Nano ra ragu Nali. Sabap ra nasibuni arati' ru ragu no am kalo nakapandai ilo ra atan ondo' rinagu ri Jisus ni.

³⁵Paat ri Jisus mamaar sumuku' ra bandar Jiriko, mokoondo' sangulun bolou makikitaak nanturung ra kiing ru ralan i.

³⁶Korongog ru ulun bolou no masuang ulun mansail ra giu' i, pangkuot io, “Atan nasauk no?”

³⁷Pambala' ilo, “I Jisus, ulun ru Nasarit no sumail.”

³⁸Golok io, “Jisus, Anak ru raja' Daut! Pakaasi' no raki'!”

³⁹Ulun ondo' nakasigulu i nansawai riso, koson manusub riso mongkoror. Kaa' giminaai poyo golok ru ulun i, “Anak ru raja' Daut, pakaasi' no raki'!”

⁴⁰Uog i Jisus am panusub Io ra ulun bolou no ibiton Riso. Pakainggaar io, kuati' io ri Jisus,

⁴¹“Atan guat kitaakon muno Raki'?” Taam ulun bolou no, “Tuhan, masaga' aku makakito.”

⁴²Indagu i Jisus riso, “Pakakito no! Pangintapatan muno namabas rirun.”

⁴³Paat ragili niayuk nakakito io, baya' io boo ri Jisus am nongompor io ri Aki Kapuuno'. Pakakito ulun-ulun no ra baal raginio, ilo pana nongompor ri Aki Kapuuno'.