Read Timugon Murut LUKAS 19 Bible Online

LUKAS 19 - Timugon Murut bible

LUKAS 19

¹Tungguli' ri Jisus pangkiralanan Nali sumubol ra Jiriko am pansail Io ra bandar no.

²Giu' i mokoondo' sangulun tingganai ru mampalulur ra cukai makainggalan ri Jakius. Io ti sangulun langkaya'.

³Gumogot io mintutun osoi i Jisus no, kaa' giu' i masuang ulun am kalo makakito io ri Jisus sabap ra ulun magana' io.

⁴Pasimbul io sigulu ra ulun-ulun no am pangkiwa' ra sampuun tataun sikamor, koson makakito io ri Jisus ra Io mansail ra giu' i.

⁵Pakasuku' i Jisus ra tuma' ru puun tataun i, katingaa' No am indagu riso, “Jakius, ribaki' tuun! Sabap ra raiti' niayuk mongoi Aku ra baloi muno.”

⁶Pagindibok i Jakius timinuun am ibito' no i Jisus ra baloi nano nabaya' ra kaansukan.

⁷Ngaangai' ulun pana sabubutok boo mangalimut magilong ragitio. Konilo, “Ulun ti mapit poyo boo ra baloi ru ulun makatula.”

⁸Kaa' bigor i Jakius am indagu ri Jisus, “Tuan, rongogo', sampiruo intor ra rapu' kuno tatayaron ku ra ulun musikin, am ondo' rinuung kuli pana, pasagulion ku poyo saboi inggapat suang no!”

⁹Indagu i Jisus riso, “Orou raiti' akau sambaloi binayag ri Aki Kapuuno', sabap ra okou pana papag ri Abragam.

¹⁰Anak ru Ulun no minatong maguyum am mamayag ra ulun nakalayau.”

¹¹Maar Io noyo ra Jirusalim am ulun lakat poyo nangkirongog ra ragu Nali. Indoson nilo mamaar noyo i Aki Kapuuno' mamarinta koson ra Raja' ra tana' ti,[43] am tunungo' ri Jisus abig ragitio risilo:

¹²Indagu Io, “Mokoondo' sangulun langkaya' minongoi ra rondo' pagun ondo' maalur koson saukon io ra sangulun raja'. Kopongo raginio sumaguli' io ra intok nano galama'.

¹³Kaa' io kalo poyo minugar, piawo' no mopor ngaulun ulipon nali am sinonong ilo anii' ra sampila' ruit mas. Kono, ‘Kinami' min ruangi' ruit ti paat ra aku kalio.’

¹⁴Kaa' mamagun nali galama' pana masisang riso. Pakaugar io, panusub boo mamagun ra ulun mongoi pangator ra bilin riso, kon nilai, ‘Marara' akai ra ulun ti masauk ra raja' mai.’

¹⁵Sinauk niayuk ulun i ra raja', am saguli' io ra pagun nali. Piawo' no mopor ngaulun ulipon nali ondo' pinaira' no ra ruit mas i, sabap ra masaga' io makapandai ra kula' poyo suang ru naalap nilai.

¹⁶Ratong ulipon ra kasaa' i am indagu, ‘Tuan, nakaalap aku poyo mopor ngampila' ruit mas intor ra ruit ondo' pinairaan muli.’

¹⁷‘Moonsoi toojo,’ kono, ‘Okou no ulipon ra matanda'! Malansanan kou ra kandoi ondo' kalo kula' maatang, paalungin ku rirun mopor ngabandar.’

¹⁸Ratong ulipon ra karuo i am indagu, ‘Tuan, nakaalap aku poyo limo ngampila' ruit mas intor ra ruit ondo' pinairaan muli.’

¹⁹Indagu io riso, ‘Okou pana, paalungin ku rirun limo ngabandar.’

²⁰Ratong poyo ulipon ra bokon i am indagu, ‘Tuan, ilai' gitio ruit mas muli. Binulian ku ayuk polopoto' ra konoon.

²¹Sotopot no malaa' aku rirun sabap ra nakapandai aku ra okou ti kolondo' guang. Sala' pana ka okou tatangan, alapon mu niayuk, am sala' ka tinanom mu, kumoson mu niayuk.’

²²Indagu raja' no riso, ‘Okou no ulipon ra kolondo' onong! Ragu muno galama' mangukum rirun. Nakapandai kou noyo ra aku kolondo' guang. Sala' pana ka aku tatangan, alapon ku niayuk, am sala' ka tinanom ku, kumoson ku niayuk.

²³Ginio poyo, kua pai' mu paulio' ruit kuli ra bank am ra aku sumaguli' maapu ku boo ruit i mabaya' ra ampos nano.’

²⁴Kopongo ragili indagu raja' ra ulun-ulun ondo' minigor ra giu' i, ‘Alapo' min ruit mas nano, am pataaki' ra ulipon ondo' mokomopor ngampila' i.’

²⁵Indagu ilo ra raja' i, ‘Tuan, kaa' mokoondo' io no alia mopor ngampila'!’

²⁶Taam ru raja' i, ‘Balain takamin: Osoi ayuk mokoondo' masuang, ruangin poyo. Kaa' osoi kolondo' atan-atan, sanganu ayuk pana ondo' indos no soroi riso, alapon poyo.

²⁷Ilo ondo' nakimantula' raki', ondo' marara' ra aku saukon ra raja', rokopo' am potoyo' min ilo ngaangai' ra saang kutu!’ ”

²⁸Karagu gini ri Jisus, sigulu Io risilo am tungguli' No pangkiralanan Nali mongoi ra Jirusalim.

²⁹Maar Io makasuku' ra pamagunan Bitpagi am Bitania, giu' ra Bulur Jaitun, susubo' No ruo ngaulun maamaya' Nano sumigulu

³⁰am bilini' No, “Ongoi kau ra pamagunan giu' ra saang no. Paat ra akau makasuku', makito min sanginan anak kaladai rinukugan, am kalo igondo' kurai' ru ulun. Bugali' am ibito' min anak kaladai no ragiti.

³¹Amon ru mokoondo' mangkuot ramuyun, ‘Kua bugali' min anak kaladai no?’ Balai' min ulun no, ‘Tuhan[44] makapakuan ragitio.’ ”

³²Ugar ilo am katuum nilo ngaangai' ondo' rinagu ri Jisus i motopot.

³³Liliwa' ilo namugal ra anak kaladai, indagu tatangan ra kaladai i risilo, “Kua bugali' min anak kaladai no?”

³⁴Taam ilo, “Tuhan makapakuan ragitio.”

³⁵Ibito' nilo boo anak kaladai i ri Jisus. Paapino' nilo sukub nilai ra bakulung ru anak kaladai i am posokoyo' nilo i Jisus.

³⁶Liliwa' Io nangura' ra anak kaladai i, paapino' ru ulun masuang sukub nilai ra ralan ondo' bayaan ri Jisus no.

³⁷Maar i Jisus makasaboi ra Jirusalim, giu' ra ralan tumuun intor ra Bulur Jaitun, talimpuun ngaangai' maamaya' Nano mangangansuk am mongongompor ri Aki Kapuuno' ra bolos mosongou sabap ra ngaangai' kaimuagan ondo' nakito nilai.

³⁸Konilo, “Kabarakat noyo Io ondo' minatong nabaya' ra kuasa' ru Tuhan! Kaansayan giu' ra suruga', am koompor toojo i Aki Kapuuno'!”

³⁹Indagu boo kukula' ngaulun ru Parisi intor ra ulun masuang no ri Jisus, “Mangingila', susubo' maamaya' Muti mongkoror.”

⁴⁰Kaa' taam i Jisus, “Balain takamin: Amon ru mongkoror ilo, batu-batu ti ondo' maaru' gumolok.”

⁴¹Maar makasuku' ra bandar no, tantangin ri Jisus am tangii' No,

⁴²indagu Io, “Mumpara' bonsoi no ru matutunan mu ngaangai' ondo' magibit ra kaansayan! Kaa' saboi raino, kalo matutunan mu.

⁴³Sabap ra masaboi paat no limpuin kou ru pantula' muno, ampangin am awangin kou ra ngaangai' intok.

⁴⁴Mamagun muno potoyon am kolondo' rondo' batu pana posoroyon ra intok nano am lunsayon kou. Gitio masauk sabap ra kalo natutunan mu ra minatong noyo i Aki Kapuuno' mamayag rirun!”

⁴⁵Subol i Jisus ra Baloi Tuhan i am pagiruo' No ngaangai' mantatalan no,

⁴⁶indagu Io risilo, “Tinulisan noyo, ‘Baloi Kutu intok pakiasian.’ Kaa' sinauk min boo ra pansibunian ru mantatakou!”

⁴⁷Moonong orou nangila' i Jisus giu' ra Baloi Tuhan. Kaa' tingganai imam Jaudi, mangingila' ra Ukum ri Musa am tingganai ru ulun ru Jaudi mirot toojo mamatoi Riso.

⁴⁸Kaa' kalo naalap nilo kapatoi, sabap ra ngaangai' ulun nabunduk toojo am mapirot mangkirongog ra raguon nano.