Read Timugon Murut LUKAS 2 Bible Online

LUKAS 2 - Timugon Murut bible

LUKAS 2

¹Paat ragili i Kaisar Agustus nanusub ra ngaangai' mamagun ralalom Empayar Roma, mongoi panulis ra inggalan nilo koson manguntob ra suang ru ulun.

²Panguntaban kasaa' ti pinaugar paat ri Kirinius nasauk ra gabenor ru pagun Siria.

³Paat ragili, moonong ulun mongoi ra pamagunan nilo galama' koson sumuang ra panguntaban ti.

⁴Pintor boo i Jusup intor ra pekan Nasarit, giu' ra libung ru Galilia, am minongoi ra rondo' pekan makainggalan ra Bitligim ra pagun ru Judia, intok i raja' Daut inanak ra galing i. Minongoi io ra giu' no sabap ra io galama' papag ri Daut.

⁵Minongoi io suang ra panguntaban ti nabaya' ra tamung nano i Maria, ondo' kaayaan noyo kaga'.

⁶Pakasaboi ilo ra Bitligim, nasuku' noyo orou paganakan ri Maria.

⁷Naganak io ra sangulun lalagang ungkuyon. Gitio anak nano ra katuaan. Kusibi' no lalagang no ra konoon am palangano' ralalom rondo' papaakanan ra bibiag sabap ra kolondo' intok pambalangan natuum nilo ra giu'.

⁸Mamaar ra Bitligim rondom ragili, mokoondo' niayuk kukula' ngaulun magalung ra domba giu' ra pampakatapan.

⁹Pulusat ru malaikat ru Tuhan i risilo am kasinda ilo ru kinatulai ru Tuhan. Nalaa' ilo kaga'.

¹⁰Kaa' indagu malaikat no, “Pai' kalaa'! Aku ti minatong nagibit ra tanou moonsoi ramuyun. Tanou ragitio mampakaansuk ra ngaangai' ulun.

¹¹Orou raiti' sangulun Mamamayag inanak noyo ramuyun giu' ra pekan ru raja' Daut. Io no i Kristus, ioginio Tuhan.

¹²Gitio tatandu' nano, makatuum kau sangulun lalagang kinusib ra konoon ondo' pinalangan ra rondo' papaakanan ra bibiag.”

¹³Pulusat boo ru masuang malaikat ra bokon intor ra suruga' nababaya' ra malaikat ra raitii' ni. Nongompor ilo ri Aki Kapuuno', konilo,

¹⁴“Koompor toojo inggalan ri Aki Kapuuno' giu' ra rasawat! Am giti ra tana', kaansayan pataakin noyo risilo ondo' mapabansuk ra guang ru Tuhan!”

¹⁵Kopongo malaikat-malaikat no nangiruan risilo am saguli' ra suruga', ulun-ulun magagalung nagigindagu ra rondo' am bokon, “Ongoi takau ra Bitligim am ilai' takau ondo' pinabala' ru Tuhan ritakau ra raitii' ni.”

¹⁶Pagindibok ilo ugar, am katuum nilo i Maria, i Jusup am niayuk lalagang ondo' pinalangan ralalom papaakanan ra bibiag.

¹⁷Kakito nilo lalagang ti, tunungo' nilo atan ondo' rinagu ru malaikat intor ra lalagang ti.

¹⁸Nangimuag ngaangai' ulun ondo' nangkirongog ra tunung nilai.

¹⁹Kaa' kinara' am ginuang ri Maria ngaangai' baal raginio.

²⁰Ulun-ulun magagalung riminuli' liliwa' mongongompor ri Aki Kapuuno' ra ngaangai' ondo' norongog am nakito nilai. Ngaangai' no nasauk koson ra rinagu ru malaikat i.

²¹Balu' ngoorou noyo buoi lalagang i, sunati' nilo am inggalani' nilo Io ri Jisus. Gitio pinainggalan ru malaikat i Riso ra Io kalo poyo tininai' ru ina' Nali.

²²Nasuku' noyo orou pangimpasawan maya' ra kaulayan ru Ukum ri Musa, inibit nilo lalagang no ra bandar Jirusalim koson pataakon ra Tuhan.

²³Sabap ra tinulisan noyo ra Ukum ru Tuhan koson ragitio, “Moonong anak katuaan ra ungkuyon pataakon ra Tuhan.”

²⁴Nangani' ilo niayuk ra taak simbalui koson inaru' ra Ukum ru Tuhan, ioginio santuop susuit maningkuluuk kapoam ruo ngainan susuit asang ondo' mamulok.

²⁵Paat ragili giu' ra bandar Jirusalim mokoondo' sangulun ungkuyon, makainggalan ri Simion. Io sangulun motopot ondo' gumagaya' ri Aki Kapuuno' am maginaa ra pamayagan ru Israil. Kinuasa'

²⁶am binalaan io ru Ambiluo ri Aki Kapuuno' no ra kalo poyo matoi io ru kalo makakito io ra Mamamayag ondo' sinusub ru Tuhan.[4]

²⁷Inibit io ru Ambiluo ri Aki Kapuuno' sumubol ra Baloi Tuhan. Paat ragili niayuk minumpos i Jusup am i Maria nagibit ri Jisus koson mambaal ra nanusuban ru Ukum ri Musa no.

²⁸Alapo' am kubibilo' ri Simion lalagang no, am pongompor io boo ri Aki Kapuuno', kono,

²⁹“Tuhan, sinugut Mu noyo bantu' Muli raino. Polosoo' noyo ulipon Muti mugar mabaya' ra kaansayan.

³⁰Sabap ra nakito ku noyo Mamamayag intor Rirun,

³¹ondo' inatang Mu noyo ra ngaangai' bansa'.

³²Koson ra sinda mapakatawang ra ralan manulu' Io ra ulun sala' ka Jaudi rumatong Rirun. Io niayuk sinda ondo' mampasauk ra ulun Muno Israil urumaton.”

³³Matuo ru lalagang no nangimuag nokorongog ra rinagu ri Simion i ra anak nilono.

³⁴Barakati' ilo ri Simion am indagu io ri Maria, ina' ru lalagang no, “Anak ragitio pinili' noyo ri Aki Kapuuno' koson mangukum am niayuk mamayag ra masuang ulun ru Israil. Masauk Io ra tatandu' intor ri Aki Kapuuno' kaa' masuang poyo manggal Riso.

³⁵Am ginio nai mapandayan boo ondo' gogoton ru guang nilo. Am okou pana mangiluk kaga' guang muno ra maagu no koson tobokon ra ilang.”

³⁶Mokoondo' sangulun nabi ruandu' ondo' matutuo kaga' makainggalan i Ana. Anak io ri Panuil, intor ra bansa' ru Asyir. Tulu' io ayuk ngambilor nasimpung ra ralaki nali am nasauk io no ra napuor.

³⁷Raino balu' ngoopor am apat ngambilor noyo kinatuo nano.[5] Orou-rondom io soroi ra Baloi Tuhan koson makiasi' ri Aki Kapuuno' am mampali.

³⁸Nakapaat ragitio niayuk riminatong io am pongompor io ri Aki Kapuuno' am pambala' io intor ra lalagang no ra ngaangai' ulun ondo' maginaa ri Aki Kapuuno' mampalabus ra bandar Jirusalim.

³⁹Kabaal noyo ngaangai' nanusuban ra Ukum ru Tuhan, i Jusup am i Maria siminaguli' ra intok nilo, pekan Nasarit, giu' ra libung ru Galilia.

⁴⁰Siminukor lalaing i am maikang, mapintar am tagamin Io kaga' ri Aki Kapuuno'.

⁴¹Moonong bilor matuo ri Jisus mongoi pangiantak ra Orou Paska giu' ra Jirusalim.

⁴²Paat ri Jisus mopor am ruo ngambilor, minongoi ilo poyo ra pangiantakan ragitio, maya' ra kaindalaman nilai.

⁴³Kopongo pangiantakan i, uli' ilo. Kaa' kalo natutunan ru matuo ri Jisus ra lakat ayuk poyo soroi Io ra Jirusalim.

⁴⁴Indos nilo nakaaya' Io no ra pababaya' nilai. Songorou noyo buoi ilo nangkiralan, bagu uyumo' nilo i Jisus, insan lair minaya' Io ra pabukat kapoam rangan nilai.

⁴⁵Kaa' kolondo' natuum nilo Io am saguli' ilo po ra Jirusalim mongoi paguyum Riso.

⁴⁶Kataluan ilo naguyum am bagu katuum nilo Io ralalom ru Baloi Tuhan. Nanturung i Jisus ra giu' no mangkirongog am mangkuot ra mangingila' ra ugama Jaudi.

⁴⁷Ngaangai' ulun ondo' nangkirongog Riso i nangimuag sabap ra mapintar Io am matanda' toojo taaman Nano.

⁴⁸Matuo Nali pana nangimuag nagilong Riso. Indagu ina' Nali Riso, “Lagang, kua guat Kou koson raginio? Akai mangkatuo maimamang kaga' Rirun!”

⁴⁹Taam i Jisus, “Kua uyumo' min Aku? Kalo kia nakapandai kau ra inatang noyo Aku ti soroi ra baloi ru Ama' Kuno?”

⁵⁰Kaa' kalo nakarati' ilo ra taaman ri Jisus ni.

⁵¹Kopongo ragili, saguli' i Jisus baya' ra matuo Nano ra Nasarit am gumagaya' risilo. Nampaguang ina' Nano ra ngaangai' raginio.

⁵²Siminukor boo i Jisus am gaai-gaai kapintaran Nano am niayuk kasagain Io ri Aki Kapuuno' am ulun.