Read Timugon Murut LUKAS 20 Bible Online

LUKAS 20 - Timugon Murut bible

LUKAS 20

¹Sangarawan raiti, paat ri Jisus nangila' am nampabala' ra Tanou Moonsoi ra ulun masuang giu' ra Baloi Tuhan, ratong tingganai imam Jaudi, mangingila' ra Ukum ri Musa am tingganai ru ulun ru Jaudi

²am indagu Riso, “Balai' akai, atan kuasa' Muno mambaal raginio? Osoi kia nangani' rirun ra kuasa'?”

³Taam i Jisus, “Aku pana masaga' mangkuot ramuyun. Balai' Aku,

⁴osoi kia nangani' ri Juanis Mampariu' ra kuasa' mampariu' ra ulun, i Aki Kapuuno' kia kapoam ulun?”

⁵Tumalimpuun ilo boo magagansang ra rondo' am bokon, “Atan nua' pataamon takau? Amon ru tumaam takau, ‘Intor ri Aki Kapuuno'’, maaru' mindagu Io ritakau, ‘Kua kalo nangintopot kau ri Juanis?’

⁶Kaa' amon ru tumaam takau, ‘Intor ra ulun,’ bobolon takau ra batu ru ngaangai' ulun, sabap ra ilo mangintopot toojo ra i Juanis ti sangulun nabi.”

⁷Taam ilo boo, “Kalo nakapandai akai osoi nangani' riso ra kuasa' no.”

⁸Indagu i Jisus risilo, “Amon ru koson poyo raginio, Aku pana kalo mambala' ramuyun atan kuasa' Kuno mambaal raginio.”

⁹Tunungo' ri Jisus abig ragitio ra ulun-ulun no, “Mokoondo' sangulun nantanom ra anggur ra umo nano. Pasiwai' no ra kukula' ngaulun, am ugar io minongoi ra sampagunan am nabuoi io ra giu' i.

¹⁰Kasuku' pangupuan ra kawa' ru anggur, tatangan ra umo i nanusub ra ulipon nali mongoi ra ulun-ulun naniwa' no mangalap ra tayar nali intor risilo. Kaa' linamba' ulipon nali ru ulun naniwa' no, pinauli' am kalo pinagibit ra atan ayuk pana.

¹¹Tatangan ra umo i nompoongoi poyo ra sangulun ulipon ra bokon. Kaa' linamba' niayuk ulipon ragitio, tinauyu', pinauli' am kalo pinagibit ra atan ayuk pana.

¹²Panusub io boo ra ulipon katalu. Kaa' linamba' nilo niayuk saboi napilatan ulipon ragitio am pinatiran poyo ra lisar ru umo i.

¹³Indagu tatangan ra umo i, ‘Atan poyo baalon kutu? Susubon ku anak galama' ondo' tagamin kuno; maaru' urumaton io!’

¹⁴Kaa' kakito io ru ulun naniwa' no, pansusunur ilo, ‘Gitio anak ru tatangan ra umo ti. Potoyon takau am maa' raginio itakau makaalap ra umo ti.’

¹⁵Papatiro' nilo io ra lisar ru umo i am potoyo'.” Pangkuot i Jisus, “Atan poyo baalon ru tatangan ra umo i ra ulun naniwa' no?

¹⁶Matong io am potoyon no ilo ngaangai' am pasiwain no ra ulun ra bokon.” Pakaining ulun-ulun raginio, indagu ilo, “Kalo tupo masauk!”

¹⁷Ponontong i Jisus risilo am pangkuot, “Atan guat arati' ragu ru Buuk Kitab ragitio? ‘Batu ondo' inimpayan ru manambaloi nasauk noyo ra batu ondo' maatang kaga'.’

¹⁸Moonong ulun ondo' maratu' pokoontot ra batu no matutuk; am amon ru batu ti maratu' ra sasangulun, maaru' matutuk io.”

¹⁹Mangingila' ra Ukum ri Musa am tingganai imam Jaudi no nangkinam mamulali' mamparakop ri Jisus, sabap ra natutunan nilo ra ilo galama' kon ru abig ni; kaa' nalaa' ilo ra ulun masuang.

²⁰Ginio ra naginaa ilo ra kaluagan moonsoi. Susubo' nilo kukula' ngaulun sumalu ra ulun ondo' mangintopot kunu' Riso mongoi pangkuot koson makaalap ilo ra panguwan mamparakop Riso. Koson raginio mataakan nilo i Jisus ra kuasa' ru gabenor.

²¹Indagu ilo boo ri Jisus, “Mangingila', nakatutun akai ra motopot ngaangai' raguon am pangilaan Muno. Nakatutun akai niayuk ra kalo mampili' Kou ra ulun, kaa' mangila' Kou ayuk ra atan ondo' motopot intor ra kasagaan ri Aki Kapuuno' ra ulun.

²²Balai' akai, sumugut ra Ukum ri Musa, makasala kia kapoam kalo mambayar ra cukai ra Kaisar Roma?”

²³Nakarati' i Jisus ra pamaguangan malaat nilai. Indagu Io risilo,

²⁴“Ilong Aku ra ruit no. Osoi kia ra bulos am inggalan ondo' pinolokot ra ruit ti?” Taam ilo, “I Kaisar!”

²⁵Indagu boo i Jisus risilo, “Amon ru koson poyo raginio, pasagulio' min ra Kaisar ondo' io tatangan am pasagulio' niayuk ri Aki Kapuuno' ondo' Io tatangan.”

²⁶Kolondo' natuum nilo ra panguwan ri Jisus giu' ra saang ru ulun masuang no. Nongkoror ilo am nangimuag ra pinataam Nali.

²⁷Kukula' ngaulun ru Saduki ondo' kalo mangintopot ra kaayagan saguli' minatong ri Jisus. Kuati' nilo i Jisus,

²⁸“Mangingila', mokoondo' tinulisan ra Ukum ri Musa, ‘Amon ru matoi sangulun ungkuyon makaandu', kaa' kolondo' anak nilo, napuor no paanduin ra pongkotob ru minatoi i. Amon ru makaanak ilo, gitio karaan koson sayat intor ra ralaki no ra minatoi i.’

²⁹Ginio nai mokoondo' tulu' ngaulun ungkuyon sangkaaka'. Katuaan i nanangandu' am minatoi kaa' kolondo' anak.

³⁰Ondo' karuo i nanangandu' ra ruandu' i,

³¹am katalu i poyo. Gitio nasauk ra katulu' ringai' sangkaaka' i, minatoi ilo ngaangai' am kolondo' anak.

³²Pupus i, ruandu' i pana minatoi.

³³Paat ra orou kaayagan saguli' no, ati boo rondo' ralaki ru ruandu' ti, sabap ra ilo ringai' nakapanangandu' riso.”

³⁴Taam i Jisus, “Ulun ra raino ti magagandu',

³⁵kaa' ilo ondo' sama' bayagon saguli' am maayag ra mantilayun kalo boo magagandu' ilo.

³⁶Ilo ti koson boo ra malaikat; kalo boo matoi ilo. Masauk ilo ra anak ri Aki Kapuuno' sabap ra binayag ilo intor ra kapatayan.

³⁷I nabi Musa pana nambala' ra totopot ulun ondo' matoi bayagon saguli'. Koson ra tinulisan intor ra bulungkut nosolob i, indagu io ra i Aki Kapuuno' no ‘Tuhan ondo' sambaan ri Abragam, Isak am i Jakub.’

³⁸I Aki Kapuuno' sala' ka Tuhan ondo' sambaan ru ulun minatoi, kaa' ulun maayag, sabap ra pagilangan ru Tuhan ngaangai' ulun maayag ayuk.”

³⁹Indagu kukula' ngaulun mangingila' ra Ukum ri Musa, “Natanda' toojo pinataam Muni.”

⁴⁰Sabap ra sotopot no kalo boo makakau' ilo mangkuot ra atan ayuk pana ri Jisus.

⁴¹Pangkuot i Jisus risilo, “Ati kulaan raguon ru ulun ra Mamamayag ondo' sinusub ri Aki Kapuuno' no papag ru raja' Daut?

⁴²I Daut galama' minindagu ralalom kitab Mazmur nano, kono, ‘Minindagu i Aki Kapuuno' ra Tuhan kuno: Panturung tampilon ra pamiris Kutu,

⁴³saboi baalon Ku pantula' Muno kumuku' ngai' Rirun.’

⁴⁴Amon ru sabiton Io ri Daut ra ‘Tuhan’, ati kulaan Mamamayag ondo' sinusub ri Aki Kapuuno' masauk ra papag ri Daut?”

⁴⁵Liliwa' ngaangai' ru ulun nangkirongog ra ragu ri Jisus, indagu i Jisus ra maamaya' Nano,

⁴⁶“Ilalai' min mangingila' ra Ukum ri Musa. Masaga' ilo mugar am mambayang ra sukub moonsoi am makikiilong ra ulun giu' ra pasar. Manturung ilo ra panturungan pinabatang ra saang ra baloi sambayangan am giu' ra bunsag.

⁴⁷Mamparuung ilo ra napuor koson talingaawon nilo baloi nilai, kaa' giu' ra saang ru ulun, mabuoi ilo rokokoon makiasi'! Mulu' poyo bagat ru ukuman nilo ra maagu no.”