Read Timugon Murut LUKAS 23 Bible Online

LUKAS 23 - Timugon Murut bible

LUKAS 23

¹Ngaangai' ulun ru Majlis Ugama i miningkakat am ibito' nilo i Jisus muma' ri gabenor Pilatus.

²Uwin nilo i Jisus ra giu' i, konilo, “Narampatan mai ulun ti nampakalayau ra bansa' mai. Nanusub Io ra ulun masuang kalo mambayar ra cukai ra Kaisar, am migiangku ra Io no i Kristus, ioginio raja'.”

³Pangkuot i Pilatus ri Jisus, “Motopot kia Okou ti raja' ru ulun ru Jaudi?” Taam i Jisus, “Kamu, Aku noyo Io.”

⁴Indagu i Pilatus ra tingganai imam Jaudi am ulun masuang no, “Kolondo' sala ru ulun ti naalap ku koson mangukum Riso.”

⁵Kaa' gumogot ilo poyo, konilo, “Intor ra pangilaan Nano manusuk Io ra mamagun ru Judia manggal ra parinta. Timinalimpuun Io ra libung Galilia am nakasuku' noyo ragiti raino.”

⁶Korongog ri Pilatus baal raginio, pangkuot io, “Ulun ru Galilia kia gitio?”

⁷Kapandayi' no ra intor i Jisus ra libung ondo' kinuasa' ru raja' Irodis, paatari' no i Jisus riso. Napaat ragili niayuk, soroi i Irodis ra Jirusalim.

⁸Naansukan toojo i Irodis nakakito ri Jisus, sabap ra lair io noyo nakaining ra tunungon intor Riso am gumogot Io milong Riso. Malansan io poyo magilong Riso mambaal ra kaimuagan.

⁹Ginio ra masuang pangkuatan ri Irodis Riso, kaa' kalo tinaam No.

¹⁰Tingganai imam Jaudi am mangingila' ra Ukum ri Musa no mininggaar am maagat panguwan nilo ri Jisus.

¹¹Iniis am inasaban Io ri Irodis am saujor-saujor nano. Pambayango' nilo Io ra sukub moonsoi ru raja' am paatari' no saguli' ri Pilatus.

¹²Intor ragili niayuk, i Irodis am i Pilatus nobonsoi boo saguli' sabap ra buoi ti nantula' ilo.

¹³Piawo' ri Pilatus ngaangai' tingganai imam Jaudi, tingganai ru ulun ru Jaudi am ulun masuang.

¹⁴Indagu io risilo, “Pinauma' min ulun ti raki' am nambala' kau ra nampakalayau Io ra ulun masuang. Kaa' inilayan ku Io no toojo ra saang min, am kolondo' sala natuum kuno koson ra nanguwan min Riso i.

¹⁵Nogondo' niayuk ri Irodis, sabap ra inataran no i Jisus saguli' ritakau. Kolondo' rondo' pana ondo' binaal Nati saboi sama' Io ukumin ra potoyon.

¹⁶Ginio ra palapasin ku Io ayuk am palabuson ku boo.” [

¹⁷Sabap ra kaindalaman no, moonong Pangiantakan ra Paska, mampalabus i Pilatus ra sangulun ondo' inaput maya' ra kasagaan ru mamagun.][48]

¹⁸Giminolok ulun masuang no, “Potoyo' Io am palabuso' ramon i Barabas!” (

¹⁹I Barabas inaput ra lamin pangaputan sabap ra nakaaya' io minanggal ra Parinta ondo' nasauk giu' ra bandar Jirusalim am sabap ra nampatoi io poyo.)

²⁰Masaga' i Pilatus mampalabus ri Jisus, ginio ra minindagu io igondo' poyo ra ulun masuang no.

²¹Kaa' golok ilo, konilo, “Salipo' Io! Salipo' Io!”

²²Indagu i Pilatus risilo ra kaintalu, “Kaa' atan guat sala Nati? Kolondo' sala natuum kuno ondo' binaal ru ulun ti saboi sama' Io ukumin ra potoyon. Loposon Io ayuk am palabuson ku boo.”

²³Kaa' gino ilo ayuk gogolok ra i Jisus salipon, am pupus i ilo namanang sabap ra golok nilai.

²⁴Inukum i Jisus ri Pilatus maya' ra kasagaan ru ulun masuang no.

²⁵Palabuso' no boo ulun kinitaak nilai, ulun ondo' inaput ra lamin pangaputan sabap ra minanggal ra parinta am nampatoi. Pinoloso no ulun masuang no mambaal ra atan ayuk kasagaan nilai ri Jisus.

²⁶Saujor-saujor no nagibit ri Jisus koson ongoyon salipo'. Ingkual ilo ra bandar i am katuum nilo i Simon, ulun ru Kirini, ondo' sumubol ra bandar. Rokopo' io ru saujor-saujor no am jajali' mansaan ra salip i sumunu' ri Jisus.

²⁷Masuang ulun siminunu' ri Jisus; intor risilo i mokoondo' kukula' ngaulun ruandu' nantangi' am nanulaboi ri Jisus.

²⁸Pangkaili i Jisus risilo am indagu, “Aibui boo ramuyun, ruandu' ru Jirusalim, pai' min Aku tangii'; tangii' min ayuk akau galama' am anak mino.

²⁹Sabap ra maar noyo masuku' orou ra ulun mindagu, ‘Mumpara' boo bonsoi ru ruandu' ondo' kalo igondo' kaapang, kalo igondo' paganak kapoam pampatiti'.’

³⁰Paat raginio ulun mindagu ra gunung no, ‘Pumpuni' akai!’ am ra bulur poyo, ‘Bunio' akai!’

³¹Sabap ra amon ru mambaal ilo ragitio Raki' ondo' koson ra tataun biag, mulu' poyo ra maagu no baalon nilo ramuyun ondo' koson ra guol!”

³²Mokoondo' poyo ruo ngaulun malaat inukum ra potoyon pinabaya' ri Jisus.

³³Pakasuku' ilo ra rondo' intok ondo' piawon ra “Kuapak”, salipo' nilo i Jisus ra giu' i nababaya' ra ruo ngaulun malaat i, sangulun i tampilon ra pamiris am sangulun i poyo tampilon ra kait.

³⁴Indagu i Jisus, “Ama', ampuno' ilo no, sabap ra kalo makatutun ilo ra atan baalon nilo ti.”[49] Pagugundi' ilo poyo koson mantayar ra bayang ri Jisus.

³⁵Ulun masuang ondo' soroi ra giu' i nonontong ayuk, liliwa' tingganai ru ulun ru Jaudi nangiis Riso, konilo, “Namayag Io ra ulun bokon, kaa' amon ru motopot ra Io no Mamamayag ondo' sinusub ri Aki Kapuuno',[50] polosoon Io mibayag galama'!”

³⁶Saujor-saujor no pana nangiis Riso am inggaari' am anii' nilo i Jisus ra wain ondo' mataris.

³⁷Konilo, “Amon ru raja' Kou ru ulun ru Jaudi, ibayag no galama'!”

³⁸Ra rasawat ru salip i makatinulisan, “Gitio noyo Raja' ru Ulun ru Jaudi.”

³⁹Sangulun intor ra ruo ngaulun sinalip i pana nagasab toojo ri Jisus, kono, “Sala' ka kia Okou no Mamamayag ondo' sinusub ri Aki Kapuuno'? Ibayag no galama' am bayago' akai ruo poyo!”

⁴⁰Kaa' sawayo' io ru rangan nali ra sinalip i, kono, “Kua pai' kou kalaa' ri Aki Kapuuno'? Okou niayuk inukuman nogondo' Riso.

⁴¹Ukuman tati ragitio sama' pambabalos ru binaal tali, kaa' ulun ragitio kolondo' tupo sala!”

⁴²Indagu io boo ri Jisus, “Jisus, karaa' aku no, paat ra Okou saukon ra raja'!”

⁴³Indagu i Jisus riso, “Balain tokou: Sotopot no, orou raiti' niayuk mababaya' kou Raki' giu' ra Pirdaus.”[51]

⁴⁴Olo'-olo' jam koopor am ruo ra tanga' ru orou, ngaangai' ru pagun no liminondom buoi talu nganjam sabap ra mato ru orou kalo boo siminirang. Tabir makapal ondo' pinatair giu' ralalom Baloi Tuhan i narilak kapiruo.

⁴⁵

⁴⁶Golok i Jisus ra mosongou, “Ama', pataakin Ku painawo Kutu Rirun!” Kopongo Io minindagu raginio, patoi Io no.

⁴⁷Kakito ru tingganai ru saujor atan ondo' nasauk i, pongompor io ri Aki Kapuuno', kono, “Motopot, ulun ti kolondo' sala!”

⁴⁸Kakito ru ulun-ulun no ondo' minatong mongoi ilong ra giu' i, atan nasauk i, uli' ilo ngaangai' ra baloi liliwa' mampaluntug ra kubab sabap ra mangiluk kaga' guang nilai.

⁴⁹Ngaangai' ulun ondo' nakaulig ri Jisus, am niayuk ruandu'-ruandu' pana ondo' siminumbaya' ri Jisus intor ra Galilia i, minigor am nagilong intor ra maalur ra ngaangai' ondo' nasauk i.

⁵⁰Mokoondo' sangulun ungkuyon makainggalan ri Jusup, intor ra bandar Arimatia ra Judia. Io ti sangulun motopot am kalansanan ru ulun am maginaa io ra i Aki Kapuuno' matong am mamarinta. Kabalu' pana io sangulun suang ru Majlis Ugama, kalo nangiou io ra binaal nilo ra raitii' i.

⁵¹

⁵²Ongoi io uma' ri Pilatus am kitaako' no baangkai ri Jisus.

⁵³Ginio ra patuuno' no boo baangkai ri Jisus intor ra salip am kulumputo' ra konoon linon. Ongoi no palangano' ra rondo' lobong ondo' kinali ra bulur batu, ondo' kalo igondo' labangi'.

⁵⁴Orou ragili orou Tampasan, am maar noyo tumalimpuun orou Sabat.

⁵⁵Ruandu'-ruandu' ondo' siminumbaya' ri Jisus intor ra Galilia, siminunu' ri Jusup. Inilayan nilo kalabangan i am ati kulaan pinalangan baangkai ri Jisus ra ralalom i.

⁵⁶Kopongo ragili, uli' ilo am pomongo ra tatapis maamis owou koson paumawon ra baangkai ri Jisus. Suabon i orou Sabat ru ulun ru Jaudi, am sumugut ra Ukum ri Musa timinangus ilo.