Read Timugon Murut LUKAS 4 Bible Online

LUKAS 4 - Timugon Murut bible

LUKAS 4

¹Paat ri Jisus minuli' intor ra Sungoi Jordan, kinuasa' Io toojo ru Ambiluo ri Aki Kapuuno' am inibit Io ru Ambiluo ri Aki Kapuuno' no giu' ra tana' kaagisan.

²Kininaman Io ru Tingganai ru riwato no ra giu' i buoi apat ngoopor ngoorou. Buoi raginio nampali i Jisus am kalo nangakan Io ra atan ayuk pana saboi naitilan Io.

³Indagu Tingganai ru riwato no Riso, “Amon ru motopot Anak Kou ri Aki Kapuuno', kinami' susubo' batu ti masauk ra ruti'.”

⁴Taam i Jisus, “Tinulisan noyo ralalom Buuk Kitab, ‘Sala' ka ruti' ayuk mampakaayag ra ulun.’ ”

⁵Ibito' boo i Jisus ru Tingganai ru riwato no ra rondo' intok ondo' masawat. Ra sangkuliop ayuk pinakito no i Jisus ra ngaangai' karajaan ra tana' ti.

⁶Indagu Tingganai ru riwato no ri Jisus, “Pataakin ku Rirun ngaangai' kuasa' am kalangkayaan ti. Sabap ra ngaangai' no pinataak noyo raki' am pataakin ku ra osoi ayuk pana ondo' kasagaan kuno.

⁷Okou tatangan ngaangai' no amon ru minsugut Kou sumamba raki'.”

⁸Taam i Jisus, “Tinulisan noyo ralalom Buuk Kitab, ‘I Aki Kapuuno' ayuk sambaan muno am mangandoi ayuk Riso!’ ”

⁹Ibito' poyo i Jisus ru Tingganai ru riwato no giu' ra Jirusalim am patampako' no Io ra rasawat ru taap ru Baloi Tuhan am indagu, “Amon ru Anak kou ri Aki Kapuuno', kinam ratu' intor ragiti.

¹⁰Tinulisan noyo ralalom Buuk Kitab, ‘Manusub i Aki Kapuuno' ra malaikat-malaikat Nano magalung toojo Rirun.’

¹¹Am niayuk, ‘Kaangin Kou ru malaikat-malaikat, koson kalayam Muno kalo boo mapilatan ra batu.’ ”

¹²Taam i Jisus, “Tinulisan noyo ralalom Buuk Kitab, ‘Pai' pangkinam ra Tuhan, i Aki Kapuuno' muno.’ ”

¹³Kopongo ayuk Tingganai ru riwato no nangkinam ri Jisus ra nansalinut baal raginio, iruani' no i Jisus buoi maginaa ra kaluagan.

¹⁴Kopongo ragili saguli' i Jisus ra libung Galilia am kinuasa' Io ru Ambiluo ri Aki Kapuuno' no. Tanou intor Riso nakatabual ra ati ayuk intok ra libung raginio.

¹⁵Nangila' Io ra ati ayuk makabaloi sambayangan, am ngaangai' ulun nongompor Riso.

¹⁶Kopongo ragili, ongoi i Jisus ra Nasarit, intok nasukaran Nali. Paat ra orou Sabat, maya' ra kaindalaman Nano, mongoi Io ra baloi sambayangan. Bigor Io koson mambasa' ra Buuk Kitab,

¹⁷am inanian Io ra kitab ru nabi Jisaya. Bungkalaro' ri Jisus naskhah rinulun no am basaa' No ragu ragitio,

¹⁸“Ambiluo ru Tuhan soroi Raki', nanusub Io noyo Raki' mampabala' ra Tanou Moonsoi ra ulun musikin. Pinili' No Aku koson mambala' ra pampalabusan ra ulun rinakop am mamabas ra ulun noolou. Am niayuk mampalabus ra ulun kikinjangin.

¹⁹Am mambala' ra nasuku' noyo paat ru Tuhan mamayag ra ulun Nano.”

²⁰Ruluno' No saguli' naskhah i am pasagulio' No ra ulun mangingindangan ra giu' i am panturung[7] Io. Ngaangai' ulun giu' ra baloi sambayangan i nangurio Riso.

²¹Pangila' boo i Jisus risilo, indagu Io, “Ragu ru Buuk Kitab ra raitii' ni nasauk noyo ramuyun paat norongog min ra orou raiti' niayuk.”

²²Moonsoi kaga' rinagu Nali, saboi nangimuag am nangiou ulun Riso, konilo, “Anak alia gitio ri Jusup.”

²³Indagu i Jisus risilo, “Maaru' magabig kau Raki' koson ragitio, ‘Duktur, okou galama' mibabas. Kaimuagan ondo' norongog mai ra binaal Muni giu' ra Kapirnaum, baalo' niayuk giti ra intok Muno galama'.’ ”

²⁴Tungguli' poyo ri Jisus ragu Nali, “Karaa' min, kolondo' sangulun nabi pana urumaton kapoam apuon ra intok nano galama'.

²⁵Balain takamin: Bulintok ru Nabi Ilia ra galing i, mokoondo' tampio buoi talu ngambilor am naintanga' ra ngaangai' pagun. Paat ragili bitilan giti ra pagun Israil am masuang napuor.

²⁶Kabalu' pana koson raginio, sala' ka ulun ru Jaudi nampaangayan ri Aki Kapuuno' ri Ilia. Pinoongoi io ayuk ra sangulun napuor ondo' sala' ka ulun ru Jaudi ra bandar Sarapat giu' ra pagun ru Sidon.

²⁷Koson niayuk ra bulintok ru Nabi Ilisa, masuang ulun ru Israil makamaruol ra kungkung ondo' maaja'. Kolondo' sangulun pana intor risilo napali'. Ondo' napali' i Naaman ayuk, ulun ru Siria am sala' ka bansa' ru Israil.”

²⁸Pakaining ngaangai' ulun giu' ra baloi sambayangan i ra atan ondo' rinagu ri Jisus ni, siminangit ilo tojojo.

²⁹Ingkakat ilo am pagiruo' nilo i Jisus ra liwar ru pekan. Ibito' nilo Io ra kiing ru bulur ondo' mapasuk, nambaalan ra pekan ragitio, sabap ra masaga' ilo mampajuul ri Jisus intor ra giu'.

³⁰Kaa' pansail i Jisus ra ulun masuang am ugar Io.

³¹Ongoi boo i Jisus ra pekan Kapirnaum giu' ra Galilia. Moonong orou Sabat nangila' Io ra ulun ru giu' i.

³²Nangimuag ilo ra baal ru pangilaan ri Jisus sabap ra ragu Nali makakuasa'.

³³Giu' ra baloi sambayangan i, mokoondo' sangulun sinubol ru riwato. Golok ulun no,

³⁴“Anii Jisus, ulun ru Nasarit, atan kia kitaakon Muno ramon? Mongoi Kou kia pamuso ramon? Makaulig aku Rirun, Okou no Matulai ondo' sinusub ri Aki Kapuuno'!”

³⁵Sawayo' ri Jisus riwato no, indagu Io, “Pongkoror am ingkual no intor ra ulun ti!” Bigogo' ru riwato ulun no ra saang ru ulun masuang no am ingkual kaa' kalo nampakaruol ra ulun ti.

³⁶Nangimuag ngaangai' ulun am pansusunur ilo ra rondo' am bokon, “Mapara' boo bonsoi ru ragu Nano. Mabaya' ra kuasa' ru ragu Nano, susubon No riwato-riwato magiru' am gumagaya' ilo!”

³⁷Tanou intor ri Jisus nakatabual ra ngaangai' libung raginio.

³⁸Iruani' ri Jisus baloi sambayangan no am ongoi ra baloi ri Simon. Iwan ri Simon ra ruandu' no boobotoi mansalom am pababasin io ri Jisus ru ulun-ulun no.

³⁹Ongoi i Jisus ra nambalangan ru ruandu' no am pagiruo' No salom i am kababas io boo. Parayus iwan ri Simon siminukal am nampasulung risilo ra akanon.

⁴⁰Ra iopalunggai', ngaangai' nagibit ra ulun mokoondo' nansalinut maruol muma' ri Jisus. Pabantaan ri Jisus kalindu' Nali risilo sigagama' am namabas risilo.

⁴¹Riwato-riwato pana miningkual intor ra inan ru masuang ulun liliwa' ilo giminolok, “Anak Kou ri Aki Kapuuno'!” Kaa' sawayo' ilo ri Jisus am kalo paindaguon No ilo sabap ra nakapandai ilo ra Io no Mamamayag ondo' sinusub ri Aki Kapuuno'.

⁴²Suabon i, riminondom i Jisus nangiruan ra pekan Kapirnaum ongoi ra rondo' intok masiluk. Kaa' inuyum Io ru ulun masuang am katuum nilo Io, ingai' nilo i Jisus koson kalo mangiruan risilo.

⁴³Kaa' indagu i Jisus, “Tanou Moonsoi ra ati kulaan i Aki Kapuuno' mamarinta[8] potonowon Ku ra bandar ra bokon niayuk. Ginio nai ra Aku sinusub ri Aki Kapuuno' matong ra tana' ti.”

⁴⁴Ginio ra nangila' i Jisus ra ati ayuk baloi sambayangan ra titikop ru pagun ru Judia.