Read Timugon Murut LUKAS 6 Bible Online

LUKAS 6 - Timugon Murut bible

LUKAS 6

¹Paat ra rondo' orou Sabat, i Jisus am maamaya' Nano tatanga' nansail ra kukula' umo ru gandum, maamaya' Nano nangupu' ra kawa' ru gandum i. Pisolo' nilo kawa' ru gandum no am akano'.

²Indagu kukula' ngaulun ru Parisi i, “Kua anggalo' min nanusuban ru Ukum ri Musa. Kua baalo' min ondo' kalo sinusub mai baalon paat ra orou Sabat?”

³Taam i Jisus, “Kalo kia igondo' kau pambasa' ra atan ondo' binaal ri raja' Daut ragili, ra io am ulun ondo' minaya' no naitilan?

⁴Subol io ralalom Kim Sambayangan am alapo' no ruti' ondo' pinataak noyo ri Aki Kapuuno' am akano' no. Anii' no niayuk ulun ondo' minaya' riso i. Kaa' sotopot no sumugut ra Ukum ri Musa, imam Jaudi ayuk mangakan ra ruti' raginio.”

⁵Indagu boo i Jisus risilo, “Anak ru Ulun manguasa' ra orou Sabat niayuk.”

⁶Sangarawan ra orou Sabat poyo, minongoi i Jisus pangila' ra rondo' baloi sambayangan. Giu' i mokoondo' sangulun ungkuyon ondo' minatoi satata' longon nali ra pamiris.

⁷Kukula' ngaulun mangingila' ra Ukum ri Musa am ulun-ulun ru Parisi mangurio toojo ri Jisus insan ru mamabas Io ra ulun paat ra orou Sabat, maa' raginio mokoowot ilo ra panguwan.

⁸Kaa' napandayan ri Jisus pamaguangan nilai. Indagu Io ra ulun ondo' minatoi satata' ra longon no, “Ibok, bigor ra tatanga' ti!” Ingkakat am bigor ulun no ra giu' no.

⁹Kopongo ragili, kuati' ri Jisus ulun-ulun no, “Atan pamaguangan min? Sumugut ra Ukum ri Musa, atan kia maaru' baalon takau ra orou Sabat? Mambaal ra moonsoi kia kapoam malaat? Mamayag kia kapoam mamatoi ra ulun?”

¹⁰Tantangi' ilo ngaangai' ri Jisus am indagu[10] ra ungkuyon no, “Patutuyo' longon muno.” Pakatutui ayuk longon nali am kapali' boo.

¹¹Kaa' malikokot toojo mangingila' ra Ukum ri Musa am ulun-ulun ru Parisi, am tumalimpuun ilo mansusunur ra atan baalon nilo ri Jisus.

¹²Paat ragili i Jisus nagaloi ra rondo' bulur koson makiasi'. Nasuaban Io nakiasi' ri Aki Kapuuno' ra giu' i.

¹³Mamaar matawang, piawo' No maamaya' Nano, am pampili' Io suang mopor am ruo ngaulun intor risilo. Inggalani' No ilo ra rasul. Ilo no am

¹⁴i Simon (ondo' ininggalanan no ri Pitrus) am boborok nano i Andrias. I Jakubus am i Juanis, i Pilipus am i Bartolomius.

¹⁵I Matius am i Tomas, i Jakubus anak ri Alpius, i Simon (ondo' sabiton ri Patriot).

¹⁶I Judas anak ri Jakubus am i Judas Iskariot, ondo' pupus i nampataak ri Jisus ra pantula' Nano.

¹⁷Paat ra mambusul i Jisus am rasul Nano intor ra bulur no am uog ilo ra rondo' limayak. Giu' i mokoondo' poyo masuang maamaya' Nano ra bokon. Masuang poyo ulun nakaratong intor ra titikop Judia, Jirusalim am bandar Tirus am Sidon, ondo' karuruo ti mamaar ra raat.

¹⁸Minatong ilo mangkirongog ri Jisus am niayuk makibabas intor ra maruol nilai. Ulun ondo' sinubol ru riwato pana minatong am nababas ilo.

¹⁹Gogoton ru ngaangai' ulun gumuut ri Jisus sabap ra mokoondo' kuasa' mingkual intor Riso am mamabas risilo ngaangai'.

²⁰Tantangi' ri Jisus ngaangai' maamaya' Nano am indagu, “Pakaansuk kano, ondo' musikin, sabap ra akau noyo ulun ri Aki Kapuuno'.

²¹“Pakaansuk kano ondo' nangaitilan raino, sabap ra basugon kau! Pakaansuk kano ondo' mantangi' raino, sabap ra pakuriton kau!

²²“Pakaansuk kano ondo' kasisangin, kalo apuon, asabin am raguon ra ulun malaat sabap ra mangintopot kau ra Anak ru Ulun!

²³Pakaansuk kano amon ru masauk gitio ramuyun, sabap ra maayo ampos maginaa ramuyun giu' ra suruga'. Sabap ra koson raginio niayuk pinamakuan ru kinamatuaan nilai ra nabi-nabi ra galing i.

²⁴“Kaa' aibui boo ramuyun ondo' langkaya' raino ti, sabap ra kalangkayaan ru tana' ti ayuk ampos mino!

²⁵“Aibui boo ramuyun ondo' naasug ra raino ti, mangaitilan kau ra maagu no! “Aibui boo ramuyun ondo' pasakurit ra raino ti sabap ra mangiluk guang am mantangi' kau ra maagu no!

²⁶“Aibui boo ramuyun no, amon ru ngaangai' ulun mongompor ramuyun. Sabap ra koson raginio niayuk pinamakuan ru kinamatuaan takali ra nabi-nabi maabau-abau ra galing i.”

²⁷“Kaa' akau ngaangai' ondo' mangkirongog Raki' raino ti, gitio bilin Kutu: Tagami' noyo pantula' mino, am koonsoi kano ra ulun masisang ramuyun.

²⁸Barakati' min ulun ondo' magasab ramuyun, am pakiasi' kano ri Aki Kapuuno' ra ulun ondo' malaat ramuyun no.

²⁹Amon ru pingas muno ra sapapa' no lapison, palapisi' niayuk sapapa' no. Amon ru gaawon ru ulun bayang muno, pataako' poyo bayang muno ra bokon.

³⁰Amon ru mokoondo' makitaak ramuyun ra atan ayuk pana, anii' ayuk. Amon ru alapon ru ulun kuliamos muno, pai' kitaako' saguli'.

³¹Ondo' kasagaan min pamakuan ru ulun bokon ramuyun, ginio niayuk pamakuan min risilo.

³²“Amon ru motogom kau ra ulun ondo' motogom ramuyun no ayuk, atan onong no ramuyun? Ulun makatula pana motogom ra osoi ayuk motogom risilo!

³³Amon ru moonsoi kau ra ulun ondo' moonsoi ramuyun no ayuk, atan onong no ramuyun? Ulun makatula pana koson niayuk raginio!

³⁴Amon ru mampaira' kau ra ruit ra ulun ondo' makapambalos no ayuk, atan onong no ramuyun? Ulun makatula pana mampaira' ra ruit ra ulun ondo' makapambalos ayuk!

³⁵Kaa' akau, tagami' noyo pantula' mino am koonsoi kau risilo. Pairaa' min ayuk am pai' kau kalansan maalap saguli'. Amon ru koson raginio, maayo ampos mino am akau masauk ra anak ri Aki Kapuuno' Ondo' Masawat Kaga'. Sabap ra moonsoi Io toojo ra ulun ondo' kalo mapandai maringkuanang am ra ulun ondo' malaat niayuk.

³⁶Kataau kano koson i Ama' min pana mataau!”

³⁷“Pai' kau kasauk ra akim ru ulun bokon, koson i Aki Kapuuno' kalo mangakim ramuyun. Pai' kau pangukum ra ulun, koson kalo ukumin kau ri Aki Kapuuno'. Ampuno' noyo ulun ra bokon, koson akau pana ampunon ri Aki Kapuuno'.

³⁸Pangani' kano, koson i Aki Kapuuno' pana mataau mangani' ra tayar moonsoi ramuyun. Tayar ondo' insokon no toojo am ruangin no saboi mototop. Panunuku' ondo' alapon min mangakim ra ulun ra bokon, panunuku' raginio niayuk alapon ri Aki Kapuuno' mangakim ramuyun.”

³⁹Tunungo' boo ri Jisus abig ragitio risilo: “Amon ru ulun noolou mangitang ra ulun noolou ra bokon, maaru' ilo karuruo maratu' ra parit.

⁴⁰Kolondo' sangulun pana migigila' mapandai poyo intor ra mangingila' nano. Kaa' amon ru makai' ru migigila' no inigigilaan nano, mogondo' boo kapandayan nano ra nangila' riso i.

⁴¹“Kua kakito mu tipolon ru tataun nakasubo ra mato ru pabukat muno, kaa' tataun makalu nakasubo ra mato muno galama' kalo natutunan mu.

⁴²Kalo noyo lair mindagu kou ra pabukat muno, ‘Rangan, ibok, paingkualo' ku tipolon ru tataun intor ra mato muno,’ kaa' tataun makalu ra mato muno galama' kalo matutunan mu! Maabau-abau kou! Ingkualo' poyo galing tataun makalu intor ra mato muno. Bagu makakito kou toojo am maalap mu kaingkual tipolon no intor ra mato ru pabukat muno.”

⁴³“Maaru' puun ra malabung kalo mangkawa' ra malaat. Koson niayuk ra puun ondo' kalo malabung kalo mangkawa' ra moonsoi.

⁴⁴Moonong puun mauligan intor ra kawa' nano. Bulungkut ra makaruui, kalo mangkawa' ra ara, am kusingan kalo mangkawa' ra anggur.

⁴⁵Ulun moonsoi makapaliso niayuk ra moonsoi, sabap ra guang nano napanu' ra kaansayan. Ulun malaat makapaliso niayuk ra malaat, sabap ra guang nano napanu' ra kalaatan. Sabap ra atan ondo' raguon ru ulun matong intor ra guang.”

⁴⁶“Kua piawo' min Aku ra, ‘Tuhan, Tuhan,’ kaa' kalo gagayaan min panusuban Kuno ramuyun?

⁴⁷Raino balain takamin paliso ru sasangulun no ondo' matong Raki', mangkirongog ra raguon Kuno am gumagaya':

⁴⁸Io no koson ra sangulun manambaloi. Kolondomo' no kali no ra luang am patirongo' toojo lugu' no ra batu. Paat ra mampaliur, kalo matungkob baloi ti sabap ra inindon am piniot toojo.

⁴⁹Kaa' ulun ondo' mangkirongog ra raguon Kuno am kalo gumagaya', io no koson sangulun manambaloi ondo' kalo mampatirong toojo ra lugu'. Paat ra mampaliur, matungkob boo am malunsai toojo baloi no!”