Read Timugon Murut LUKAS 7 Bible Online

LUKAS 7 - Timugon Murut bible

LUKAS 7

¹Kakai' i Jisus nambala' ra ngaangai' baal raginio ra ulun masuang no, ugar Io ongoi ra Kapirnaum.

²Giu' i mokoondo' sangulun tingganai ru saujor Roma ondo' makaulipon ra tagamin no toojo. Marualan malanjag am maar matoi ulipon no.

³Kaining ru tingganai ru saujor Roma no ra i Jisus soroi, panusub io ra kukula' ngaulun tingganai ru ulun ru Jaudi no mongoi uma' ri Jisus, koson mompoongoi Riso mamabas ra ulipon nano.

⁴Katuum nilo i Jisus, gumogot ilo makiindangan ri Jisus, konilo, “Moonsoi indanganon Mu ulun raginio

⁵sabap ra moonsoi guang nano am motogom io ra bansa' takau. Ilai', tinambalayan no akai poyo ra baloi sambayangan.”

⁶Baya' boo i Jisus risilo. Ilo maar makasuku' ra baloi i, susubo' ru tingganai ru saujor no rangan-rangan nano mambala' ri Jisus, “Tuan, kalo pana mantipagon kou mongoi ra baloi kutu. Kalo maaya' aku mangapu Rirun ra baloi kutu.

⁷Aku galama' kalo maaya' muma' Rirun. Panusub ayuk, maaru' mababas ulipon kutu.

⁸Sabap ra aku galama' gumagaya' ra susuban ru tingganai maino. Mokoondo' niayuk ra saujor-saujor ondo' gumagaya' ra panusuban kuno. Amon ru manusub aku ra sasangulun saujor, ‘Ugar!’, io pana mugar. Amon ru mindagu aku ra bokon no poyo, ‘Ibok ragiti!’, io pana matong. Amon ru manusub aku ra ulipon kuno, ‘Baalo' gitio!’, io pana gumagaya'.”

⁹Nangimuag i Jisus nakaining raginio. Pangkaili Io ra ulun masuang no ondo' sasunu'-sunu' Riso i am indagu Io, “Kalo igondo' Aku pakatuum ra pangintapatan maikang koson ragitio, intor ra bansa' ru Israil pana kalo!”

¹⁰Uli' ulun-ulun sinusub no ra baloi ru tingganai ru saujor i, ilai' nilo nababas noyo ulipon nali.

¹¹Kalo nabuoi ragili,[11] ongoi i Jisus ra pekan Nain. Maamaya' Nano am ulun masuang pana minaya' Riso.

¹²Ilo maar nakasuku' ra subalan ru pekan no, mokoondo' ulun mingkual intor ra pekan namandas ra baangkai. Ondo' minatoi i am sangulun anak ungkuyon, anak langkuir ru sangulun napuor. Masuang ulun ru pekan i siminumbaya' ra napuor ti.

¹³Kakito ri Jisus napuor no, nakaasi' Io riso am indagu, “Pai' pantangi'!”

¹⁴Inggaari' boo ri Jisus am kopoo' No bandasan napaalangan ra baangkai i am uog boo ulun-ulun namandas no. Indagu i Jisus, “Tuu'-bagu, sukal no!”

¹⁵Sukal anak ungkuyon ra minatoi i, panturung am pakaindagu io boo, am pasagulio' ri Jisus ra ina' nali.

¹⁶Ngaangai' ulun nalaa' tojojo am nongompor ri Aki Kapuuno'. Konilo, “Sangulun nabi ondo' makakuasa' minatong ra tatanga' takau! Minatong noyo i Aki Kapuuno' mongoi pamayag ra ulun Nati!”

¹⁷Tanou ri Jisus no nakatabual ra titikop ru Judia am poyo ra libung ondo' nakainggaar no.

¹⁸Maamaya' ri Juanis nambala' riso ra ngaangai' atan ondo' nasauk ri Jisus. Piawo' no ruo ngaulun maamaya' nano,

¹⁹susubo' no boo ilo tumuum ri Jisus am pangkuot, “Okou kia ondo' matong sumugut ra bantu' ri Aki Kapuuno' kapoam maginaa akai poyo kia ra bokon?”

²⁰Ongoi ilo uma' ri Jisus am indagu, “I Juanis Mampariu' nanusub ramon mangkuot Rirun, ‘Okou kia ondo' matong sumugut ra bantu' ri Aki Kapuuno' kapoam maginaa akai poyo kia ra bokon?’ ”

²¹Paat ragili niayuk, namabas i Jisus ra nansalinut maruol am kaimbalaan ru ulun. Nampagiru' Io poyo ra riwato am niayuk namabas ra ulun noolou.

²²Taam i Jisus, “Saguli' kau ri Juanis am pambala' kau ra atan ondo' nakito am norongog min. Ulun bolou makakito, ulun kalo makalulu' makaugar, ulun makamaruol ra kungkung ondo' maaja' mababas,[12] ulun barat makaining, ulun matoi maayag saguli' am Tanou Moonsoi intor ri Aki Kapuuno' pinabala' noyo ra ulun musikin.

²³Pakaansuk noyo ulun ondo' pangintapatan nano Raki' kalo malawo!”

²⁴Pakaugar ayuk ulun-ulun ondo' sinusub ri Juanis ni, tunungo' boo ri Jisus ra ulun masuang kandoi ri Juanis, indagu Io, “Atan inongoi min ilai' ra tana' kaagisan? Sakot nasiob ru angin kia?

²⁵Atan inongoi min ilai' ra giu'? Sangulun nambayang ra moonsoi kia? Ulun ondo' mambayang koson raginio am langkaya' kaga' mayan ayuk ra istana!

²⁶Atan guat inongoi min ilai'? Sangulun nabi kia? Topot, kaa' mulu' poyo intor ra sangulun nabi.

²⁷Sabap ra i Juanis ti noyo ondo' kon ru Buuk Kitab, ‘Gitio noyo ulun sinusub Kutu,’ kon ri Aki Kapuuno', ‘Susubon Ku io sumigulu Rirun, koson momongo ra ralan Muno!’ ”

²⁸Indagu poyo i Jisus, “Karaa' min! Giti ra tana' ti, kolondo' sangulun pana maatang intor ri Juanis Mampariu'. Kaa' ulun ondo' kalo maatang ra ulun ri Aki Kapuuno', maatang poyo intor ri Juanis Mampariu'.”

²⁹Ngaangai' ulun am mampalulur ra cukai pana nangkirongog ri Juanis. Ilo noyo ondo' giminagaya' ra susuban ri Aki Kapuuno' ondo' motopot am nakiriu' ilo ri Juanis.

³⁰Kaa' ulun-ulun ru Parisi am mangingila' ra Ukum ri Musa, kalo inapu nilo pamaguangan ri Aki Kapuuno' am kalo nakiriu' ilo ri Juanis.

³¹Tungguli' poyo ri Jisus, indagu Io, “Atan kia papagandaan Ku ra ulun raiti'? Koson ra atan ga ilo ti?

³²Koson ayuk ra paliso ru lalaing mantuturung giu' ra pasar. Sampulupuk mampiau ra bokon i, ‘Sinamputan mai tulali ra kaansukan, kaa' kalo nagiligo' kau! Narimbai akai ra makalulumpus ra guang, kaa' kalo nantangi' kau!’

³³Ratong i Juanis Mampariu', nampali am kalo nanginum io ra wain. Kamin boo, ‘Sinubol io ru riwato!’

³⁴Ratong Anak ru Ulun, mangakan am manginum Io am kamin boo, ‘Ilai' ulun no! Moroot, gagaukon, kumubayau Io ra ulun mampalulur ra cukai am ulun ondo' karaan ra malaat.’

³⁵Kaa' osoi ayuk mangapu ra kapintaran intor ri Aki Kapuuno' makatutun io ra ngaangai' baalon Nano motopot.”

³⁶Sangulun ru Parisi, nangkimait ri Jisus mangakan giu' ra baloi nano. Ratong i Jisus ra baloi nano am pangakan.

³⁷Giu' ra pekan no, mokoondo' sangulun ruandu' ondo' kauligan ra makatula. Pakaining io ra nangakan i Jisus giu' ra baloi ru sangulun ru Parisi no, ratong io nagibit sambutul boborok sinuangan ra umau maamis owou.

³⁸Bigor io ra bakulung ri Jisus, mamaar ra kalayam Nano, am pantangi' io saboi naasa' kalayam ri Jisus ra lomou nali. Bagu piiri' no kapuaa' kalayam ri Jisus ra abuk nali, alaki' no kalayam Nano am buuri' no ra umau maamis owou i.

³⁹Kakito ru ulun ru Parisi no baal raginio, kon ru guang nali, “Amon ru sangulun nabi Io, kua polosoo' no ruandu' koson ragitio kumambong Riso. Maaru' nakapandai Io ra sotopot no ruandu' ti kauligan ra makatula!”

⁴⁰Indagu i Jisus ri Simon, “Simon, mokoondo' poyo pabalaan Kutu rirun.” Taam i Simon, “Iou mangingila', raguo' ayuk.”

⁴¹Indagu i Jisus, “Mokoondo' ruo ngaulun nagutang intor ra ulun mampaira' ra ruit. Sangulun i nagutang suang limo ngaatus ruit pirok, am bokon i nagutang suang limo ngoopor ruit pirok.

⁴²Karuruo ilo kalo nakabayar ra ira' nilai am pinuso ayuk boo ru nampaira' i. Osoi intor ra ruo ngaulun ti motogom toojo ra ulun nampaira' ra ruit i?”

⁴³Taam i Simon, “Guang ku ulun ondo' masuang toojo pinuso ra ira' i!” Taam i Jisus, “Motopot ragu muni.”

⁴⁴Tantangi' ri Jisus ruandu' no am indagu ri Simon, “Ilai' ruandu' ti! Ratong Aku ra baloi mutu am kalo nangani' kou Raki' ra timug pambaguan ra kalayam Kutu. Kaa' binaguan ru ruandu' ti kalayam Kutu ra lomou nano am piniiran no ra abuk nano.

⁴⁵Kalo inuma' mu Aku ra alok. Kaa' ruandu' ti kalo lumonggo' mangalok ra kalayam Kutu intor ra Aku minatong.

⁴⁶Kalo pinasakan mu ulu Kutu ra umau. Kaa' ruandu' ti nompoposok ra kalayam Kutu ra umau maamis owou.

⁴⁷Togom no topot-topot maayo sabap ra inampun io noyo kabalu' pana masuang tula nano! Amon ru sanganu ayuk tula ru ulun no ampunon, togom nano pana kalo maayo.”

⁴⁸Indagu i Jisus ra ruandu' no, “Inampun noyo tula-tula muno.”

⁴⁹Ulun-ulun ondo' giminulung pangakan ri Jisus mansusunur boo ra rondo' am bokon, “Osoi ulun ragitio saboi makapangampun ra tula?”

⁵⁰Kaa' indagu i Jisus ra ruandu' no, “Pangintapatan muno namayag rirun. Uli' no mabaya' ra kaansayan!”