Read Timugon Murut LUKAS 9 Bible Online

LUKAS 9 - Timugon Murut bible

LUKAS 9

¹Piawo' ri Jisus mopor am ruo ngaulun maamaya' Nano. Anii' No ilo ra kapandayan am kuasa' mampagiru' ra riwato am mamabas ra ulun marualan.

²Susubo' No boo ilo mongoi pamabas ra ulun marualan am pampabala' ra ati kulaan i Aki Kapuuno' mamarinta.

³Indagu i Jisus risilo, “Pai' kau pagibit ra atan ayuk pana ra ugar mino. Pai' kau pagibit ra susukur, katia' pakitaakan, akanon, ruit kapoam bayang ralinan.

⁴Ati ayuk intok mangapu ramuyun, ayan kau ra baloi raginio saboi manding kau ra intok ra bokon.

⁵Ati ayuk intok kalo mangapu ramuyun, iruani' min am kabuli' min kaau ru kasut mino koson mampakara' toojo risilo.”

⁶Ugar maamaya' ri Jisus am ongoi ilo ra moonong pamagunan mampabala' ra Tanou Moonsoi am mamabas ra ulun marualan ra ati ayuk nasukuan nilo.

⁷Pakaining i Irodis, raja' ru libung Galilia, ra ngaangai' ondo' nasauk no, nagalabo io boo sabap ra kon ru ulun, “Naayag saguli' i Juanis Mampariu'!”

⁸Mokoondo' poyo minindagu ra i nabi Ilia naayag saguli'. Bokon i poyo minindagu ra sangulun nabi ra bokon intor ra nabi ra galing i naayag saguli'.

⁹Indagu i Irodis, “Pinaingguluan ku noyo i Juanis. Kaa' osoi poyo sotopot no ulun ragitio? Masuang norongog ku ra tunung intor Riso.” Ginio boo ra gumogot toojo i Irodis tumuum ri Jisus.

¹⁰Saguli' rasul-rasul am pantunung ilo ri Jisus ra ngaangai' binaal nilai. Ibito' ilo ri Jisus ra rondo' intok masiluk mamaar ra pekan Bitsaida.

¹¹Pakatutun ulun masuang no ra giu' Io, sunu' ilo ri Jisus. Apuo' No ilo am pantunung Io ati kulaan i Aki Kapuuno' mamarinta am namabas Io niayuk ra ulun marualan.

¹²Ra iopalunggai', ratong mopor am ruo ngaulun maamaya' Nali am indagu, “Intok ragitio masiluk. Moonsoi susubon Mu ngaangai' ulun no muli' koson makauyum ilo ra akanon am pambalangan ra ati ayuk pamagunan ondo' nakainggaar no.”

¹³Kaa' taam i Jisus, “Akau ayuk pana mampaakan risilo.” Indagu maamaya' Nano, “Kaa' limo ngampila' ruti' am ruo ngaunor papait ayuk soroi ramon. Mongoi akai kia bali ra akanon koson pataakin risilo ti?”

¹⁴(Suang ru ungkuyon ra giu' i limo ngaribu ngaulun.) Indagu i Jisus ra maamaya' Nano, “Pantulibungo' min ilo ra kukula' ngampulupuk, limo ngoopor ngaulun ra sampulupuk.”

¹⁵Gagayaa' nilo nanusuban ri Jisus i.

¹⁶Alapo' ri Jisus limo ngampila' ruti' am ruo ngaunor papait i. Pantingaa' Io ra limbowon am paringkuanang ri Aki Kapuuno'. Pipilango' No ruti' am papait no am pataaki' ra maamaya' Nano koson tatayaron ra ulun-ulun no.

¹⁷Pagagakan ilo ngaangai' saboi naasug. Luluro' ru maamaya' ri Jisus suwo ru akanon i am suang no mopor am ruo ngambakul.

¹⁸Igondo' ragili, tatanga' i Jisus misasangulun makiasi', ratong maamaya' Nano Riso. Pangkuot i Jisus risilo, “Maya' ra ragu ru ulun, osoi kia Aku ti?”

¹⁹Taam ilo, “Mokoondo' mindagu ra i Juanis Mampariu' kou lair. Mokoondo' mindagu ra nabi Ilia kou. Bokon no poyo mindagu ra okou ti lair sangulun intor ra nabi ru galing i ondo' naayag saguli'.”

²⁰Pangkuot i Jisus, “Kaa' maya' ra pamaguangan min, osoi kia Aku ti?” Taam i Pitrus, “Okou noyo i Kristus, Mamamayag ondo' sinusub ri Aki Kapuuno'.”

²¹Pangampol i Jisus risilo koson kalo mambala' ra baal raginio ra osoi ayuk pana.

²²Tungguli' ri Jisus, “Anak ru Ulun musiti' maimbolo' toojo am anggalon ru tingganai ru ulun ru Jaudi, tingganai imam Jaudi am mangingila' ra Ukum ri Musa. Potoyon io, kaa' malupus kataluan bayagon Io saguli'.”

²³Indagu Io risilo ngaangai', “Osoi masaga' maya' Raki' no, lilianin no katasuan ru kaayagan nano galama'. Moonong orou mansaan io ra salip nano galama' am maya' Raki'.

²⁴Ulun ondo' masaga' maya' ra kasagaan nano galama' kalo makaalap ra kaayagan mantilayun. Kaa' ulun ondo' mampataak ra kaayagan nano, arati' no gumagaya' io Raki', io no makaalap ra kaayagan mantilayun.

²⁵Atan onong ru sasangulun no amon ru makaalap io ngaangai' rapu' ru tana' ti, kaa' maluusan am mapusaan io ra kaayagan nano? Maaru' kolondo' onong.

²⁶Osoi ayuk mauyu' mangiou Raki' am pangilaan Kuno, Anak ru Ulun pana mauyu' mangiou ra ulun no paat ra Io matong ra tauli no. Matong Io mabaya' ra katulayan Nano am niayuk Ama' Nano am poyo katulayan ru malaikat-malaikat ondo' matulai kaga'!

²⁷Balain takamin ra mokoondo' niayuk ulun ragiti ondo' kalo matoi saboi makakito ilo ati kulaan i Aki Kapuuno' mamarinta.”[18]

²⁸Pakasaminggu' i Jisus nangila' ra ngaangai' ondo' pangilaan ra raitii' ni, ibito' No boo i Pitrus, Juanis am i Jakubus ra rasawat ru rondo' gunung mongoi pakiasi'.

²⁹Liliwa' Io makiasi' ra giu' i, minalui bulos Nali am binayang Nali pana nasauk ra mapulak manguliat.

³⁰Pulusat ru ruo ngaulun nabi, io no i Musa am i Ilia, nagigindagu ri Jisus.

³¹Karuo nabi ti minintalang nabaya' ra sinda intor ra suruga' am nagigindagu ilo ri Jisus intor ra baal ru patayan Nano ondo' masauk giu' ra Jirusalim ra maagu no.

³²Paat ragili nakalunus i Pitrus am rangan-rangan nano. Kaa' kakarat ilo am kakito nilo i Jisus nabaya' ra katulayan Nano am mokoondo' poyo ruo ngaulun minigor nabaya' Riso.

³³Paat ra ruo ngaulun no sumaguli' mangiruan ri Jisus, indagu boo i Pitrus, “Tuan, moonsoi toojo itakau ragiti. Mangkalukub akai talu ringai'. Rondo' Rirun no, rondo' ri Musa am rondo' niayuk ri Ilia.” (Minindagu i Pitrus kon raginio sabap ra kalo nakapandai io ra atan ondo' sotopot no raguon.)

³⁴Liliwa' i Pitrus lakat ayuk poyo minindagu, ratong boo gaun nangulumput saboi nalaa' ilo kaga'.

³⁵Kaining nilo bolos intor ra gaun minindagu, “Gitio noyo Anak ondo' pinili' Kutu. Pangkirongog kano Riso!”

³⁶Longgo' bolos i am kakito nilo misasangulun ayuk boo i Jisus ra giu' i. Nongkoror maamaya' Nano am kalo nambala' ilo ra atan ondo' nakito nilai ra osoi ayuk pana.

³⁷Io suabon, tuun i Jisus intor ra gunung i nababaya' ra talu ngaulun maamaya' Nali. Masuang ulun minuma' ri Jisus.

³⁸Sangulun intor ra ulun giminolok makiasi', “Mangingila', ongoyo' raki' ilai' anak langkuir kuno!

³⁹Paat io subolon ru riwato mompopogolok io am inan nano pana kumakang saboi manamputa' kabang nano. Imboloon io ru riwato no ondo' kalo masaga' mingkual intor riso!

⁴⁰Nakiindangan aku noyo ra maamaya' Muno mampagiru' ra riwato no kaa' kalo naalap nilo.”

⁴¹Taam i Jisus, “Akau ti toojo kalo mangintopot am nakalayau! Kalo boo tumaan Aku sumimpung ramuyun!” Indagu boo i Jisus ra ama' ru lalaing no, “Ibito' lalaing muno ragiti!”

⁴²Pakainggaar lalaing no ri Jisus, pinagiampas io ru riwato no am inan nano pana kumakang. Kaa' susubo' ri Jisus riwato no magiru' am babaso' no lalaing i. Pasagulio' boo lalaing i ra ama' nali.

⁴³Nangimuag ngaangai' ulun nakakito ra gayo ru kuasa' ri Aki Kapuuno'. Paat ra ulun-ulun no lakat ayuk poyo nokosolong nagilong ra binaal ri Jisus, indagu Io ra maamaya' Nano,

⁴⁴“Rongogo' am aratio' min bilin Kutu ragitio: Inaru' noyo ra Anak ru Ulun pataakin ra kuasa' ru ulun.”

⁴⁵Kaa' kalo nangarati' maamaya' Nano ra rinagu Nali, sabap ra kalo poyo pinatalang risilo arati' ru bilin ragitio am malaa' ilo poyo mangkuot Riso.

⁴⁶Nagagansang maamaya' ri Jisus ra osoi maatang kaga' intor risilo.

⁴⁷Nakapandai i Jisus ra pangkaraan nilai, piawo' No boo sangulun lalaing am susubo' no minigor ra kiing Nali.

⁴⁸Indagu Io boo ra maamaya' Nano, “Ulun ondo' mangapu ra lalaing ti sabap ra Aku, arati' no mangapu io niayuk Raki'. Ulun ondo' mangapu Raki', mangapu niayuk Riso ondo' nanusub Raki' i. Sabap ra io ondo' kalo maatang ra pamaguangan min ngai', sotopot no io no ondo' maatang kaga'.”

⁴⁹Indagu i Juanis, “Tuan, nakakito akai ra sangulun ondo' nampagiru' ra riwato ralalom ra inggalan Muno. Inggalari' mai io sabap ra io sala' ka bala takau.”

⁵⁰Indagu i Jisus ri Juanis am maamaya' Nano ra bokon, “Pai' io inggalari'! Sabap ra osoi kalo manggal ramuyun, arati' no io no bala min.”

⁵¹Paat ra mamaar noyo pangakatan ri Jisus mongoi ra suruga', aruo' No ra mongoi Io ra Jirusalim.

⁵²Susubo' No ulun bokon sumigulu Riso. Ugar ulun ondo' sinusub Nano suku' ra rondo' pamagunan giu' ra Samaria. Giu' i pongoonon nilo pambalangan ri Jisus.

⁵³Kaa' mamagun ra giu' i kalo masaga' mangapu ri Jisus, sabap ra nakapandai ilo ra mangkiralan Io mongoi ra Jirusalim.[19]

⁵⁴Katutuni' ru maamaya' no, i Jakubus am i Juanis, ra baal raginio, indagu ilo ri Jisus, “Tuhan, masaga' Kou kia ru kitaakon mai apui intor ra suruga' mamuso risilo?”[20]

⁵⁵Talikur i Jisus am pansawai risilo.[21]

⁵⁶Ugar ilo boo ongoi ra pamagunan ra bokon.

⁵⁷Liliwa' i Jisus am maamaya' Nano nanunggul ra pangkiralanan nilai, mokoondo' sangulun mindagu ri Jisus, “Maya' aku Rirun ra ati ayuk pana!”

⁵⁸Taam i Jisus, “Munin mokoondo' ra luang no galama' am susuit ra bunsut no galama', kaa' Anak ru Ulun kolondo' intok luyaan am tangusan.”

⁵⁹Indagu boo i Jisus ra sangulun poyo, “Baya' no Raki'.” Kaa' indagu ulun i, “Ongoyo' ku poyo galing lobongo' baangkai ru ama' kuli.”

⁶⁰Taam i Jisus, “Kalo pana. Polosoo' ayuk ra ulun ondo' kalo maya' Raki' mompolobong ra baangkai no. Kaa' okou, ongoi no pampabala' ra i Aki Kapuuno' timinalimpuun noyo mamarinta.”[22]

⁶¹Indagu poyo bokon i, “Tuan, maya' aku Rirun, kaa' uli' aku po galing pambala' ra pabukat-pabukat kuno.”

⁶²Taam i Jisus, “Ulun ondo' tumalimpuun mamparadu' am magail ayuk mangkaili ra talikuron, kalo maaya' masauk ra ulun ri Aki Kapuuno'.”