Read Timugon Murut SAGULION 15 Bible Online

SAGULION 15 - Timugon Murut bible

SAGULION 15

¹“Paat ra pompor ru moonong bilor katulu', pusoo' noyo utang ru ulun ondo' magutang ra ruit min.

²Koson ragitio ralan no: Moonong ulun ru Israil ondo' nagira' noyo ra ruit ru gino ngai' ulun ru Israil, musiti' mamuso ra utang no. Kalo pansikaan io ra utang no, sabap ra sumugut ra kapatasan ru TUHAN galama', pinuso noyo utang no.

³Pansikaan kau ra ruit ondo' iniraan ru ulun bansa' ru bokon, kaa' kalo pansikaan kau ra ruit ondo' iniraan ru gino ngai' bansa' min.

⁴Mambarakat ramuyun TUHAN i Aki Kapuuno' min giu' ra tana' ondo' pataakon Nano ramuyun. Kolondo' sangulun pana intor ra bansa' min masauk ra musikin,

⁵amon ru gumagaya' kau ra TUHAN i Aki Kapuuno' min, am ilain toojo ra mapaugar ra ngaangai' baal ondo' panusuban kuno ramuyun orou raiti'.

⁶Mambarakat TUHAN ramuyun koson ra binantu' Nano. Mapaira' kau ra masuang ruit ra masuang bansa', kaa' akau galama' kalo magira' intor ra osoi pana. Mamarinta kau ra masuang bansa', kaa' kolondo' rondo' bansa' pana mamarinta ramuyun.

⁷Amon ru mokoondo' sangulun Israil makiindangan giu' ra rondo' ra bandar giu' ra tana' ondo' pataakon ramuyun ru TUHAN i Aki Kapuuno' min, pai' karaa' kaatangan galama', am pai' kau karara' mangindangan riso.

⁸Kaa', moonsoi ru mataau guang min am mapaira' ra ulun no ra kula' suang ondo' pakuan nano.

⁹Pai' kau karara' mapaira' riso ra sasaban ayuk ra bilor mamuso ra utang mamaar noyo. Pai' polosoo' pangkaraan kinalaat raginio sumubol ra guang min. Amon ru marara' kau mapaira', mampalaa ulun no ra TUHAN am pabalaan kau ra makasala.

¹⁰Anii' io ra atan ayuk ra kalo kibayarin am ra taau ru guang, am mambarakat TUHAN ramuyun ralalom ngaangai' ru baalon min.

¹¹Gino ngai' ru ulun ru Israil, masalok mokoondo' kukula' ngaulun musikin am ondo' gumogot makiindangan. Ginio ra manusub aku ramuyun maa' raginio mataau guang risilo.”

¹²“Amon ru sangulun Israil, ungkuyon kapoam ruandu', mantalan ra inan nano[19] koson sangulun inulipon ramuyun, palabuso' noyo io malupus io mangandoi ramuyun buoi onom ngambilor. Paat bilor ra katulu', musiti' palabuson min io.

¹³Paat ra akau mapalabus riso, pai' io polosoo' mugar ra kolondo' ibiton.

¹⁴Ra taau ru guang anii' io ra atan ayuk ondo' tinaakan ru TUHAN ramuyun, koson ra domba, unor-unor am wain.

¹⁵Karaa' noyo ra galing i akau sinauk ra inulipon giu' ra Misir, am pinalabus kau noyo ru TUHAN i Aki Kapuuno' min. Ginio sabap ra aku manaak ramuyun ra susuban ragitio.

¹⁶Kaa' maaru' lair ra inulipon mino kalo masaga' palabuson, sabap ra motogom io ramuyun am sasambaloi min, am masaga' mayan ramuyun.

¹⁷Amon ru koson raginio, ibito' io ra kulobon ru baloi min, am giu' no tibakin talingo nano. Masauk io boo ra inulipon min buoi ru bayag nano. Koson raginio niayuk ondo' musiti' min baalon ra inulipon ruandu' min.

¹⁸Pai' pansagulian guang paat ra akau mapalabus ra sangulun inulipon, sabap ra nangandoi io noyo ramuyun buoi onom ngambilor, ra sampiruo gaji' ru sangulun mangngandoi.[20] Baalo' noyo susuban raginio, am mambarakat ramuyun TUHAN i Aki Kapuuno' min ralalom ru ngaangai' kandoi min.”

¹⁹“Pansuayo' noyo ngaangai' anak katuaan ru sapi' am anak katuaan ru domba min tayar ru TUHAN i Aki Kapuuno' min. Pai' pakayo' sapi' no koson mambaal ra kandoi, am pai' lampari' bulu ru domba no.

²⁰Moonong bilor musiti' akau am sasambaloi min mangakan ra kual no giu' ra saang ru TUHAN giu' ra rondo' intok sambayangan ondo' pinili' ru TUHAN.

²¹Amon ru bibiag no najamaran koson kimpo', bolou, kapoam najamaran ra bokon ondo' mapaja', pai' pataako' bibiag no koson ra taak simbalui ra TUHAN i Aki Kapuuno' min.

²²Maakan min bibiag koson raginio giu' ra baloi. Iou pana ra mapasau kapoam majamol kau, maakan min ngaangai' bibiag raginio koson akau mangakan ra kual ru tambang kapoam paus.

²³Pai' pangakan ra raraa' ru kual no; pasasaro' noyo raraa' no ra tana' koson ra timug.”