Read Timugon Murut SAGULION 18 Bible Online

SAGULION 18 - Timugon Murut bible

SAGULION 18

¹“Ngaangai' bansa' ru Liwi, nakaaya' imam-imam kalo iowon mangapu ra tayar ru tana' giu' ra Israil, kaa' makaapu ilo ra santayaran ra taak am taak simbalui ra bokon ondo' pataakon ra TUHAN.

²Ondo' apuon nilono iono tungkuson nilo, koson ondo' binantu' noyo ru TUHAN. Ginio sabap ra kalo makaalap ilo ra tana' koson ra bansa'-bansa' ra bokon no.

³“Paat ra pataakon sapi' kapoam domba koson ra taak simbalui, am tampilon ra limbawo, bungul ru salura am tinai' ru bibiag no musiti' pataakon ra imam.

⁴Imam-imam musiti' aniin ra ampos kasaa' intor ra unor-unor, wain, umau jaitun am bulu ru domba.

⁵Nampili' TUHAN ra bansa' ru Liwi intor ra ngaangai' bansa' min mangandoi Riso koson ra imam ra sabuoi-buoi no.

⁶“Osoi ayuk ulun ru Liwi ondo' intor ra ati pana bandar giu' ra Israil, porotongon ra rondo' intok sambayangan no,

⁷am iowon mangandoi ayuk ra TUHAN i Aki Kapuuno' nano koson ra imam, koson ra ulun ru Liwi ra bokon ondo' mangandoi ra giu'.

⁸Io musiti' aniin ra akanon koson ra suang ru maapu ru imam-imam ra bokon, am io iowon mambuli ra atan ayuk ondo' atarin ru sasambaloi nano.”

⁹“Paat ra akau makasaboi ra tana' ondo' pataakon ramuyun ru TUHAN i Aki Kapuuno' min, pai' tilu ra baal majamol ondo' imayaan ru bansa'-bansa' ondo' minayan ra giu'.

¹⁰Pai' papataak ra anak-anak min koson ra taak ondo' solobon ra rasawat ru altar. Pai' polosoo' osoi pana ra gino ngai' min masauk ra mangngilong kapoam maguyum ra tatandu', kapoam mamakai ra jampi

¹¹kapoam kapandayan ru sihir, kapoam makitulu' ra ambiluo ru ulun minatoi.

¹²Masisang TUHAN i Aki Kapuuno' min ra ulun ondo' nambaal ra baal majamol no. Ginio sabap ra Io napagiru' ra bansa'-bansa' no intor ra tana' raginio paat ra akau matong.

¹³Musiti' kau gumagaya' toojo ra TUHAN i Aki Kapuuno' min.”

¹⁴I Musa pana mindagu, “Bansa'-bansa' giu' ra tana' ondo' ayanin mino magibaya' ra bilin ru mangilong am ulun ondo' maguyum ra tatandu', kaa' TUHAN i Aki Kapuuno' min kalo mangiou ramuyun mambaal raginio.

¹⁵Kaa' manusub TUHAN i Aki Kapuuno' min ra sangulun nabi ramuyun; nabi no koson raki' am iono intor ra bansa' min galama'; musiti' kau gumagaya' riso.[22]

¹⁶Paat ra akau tumimung giu' ra Gunung Sinai, pakitaak kau maa' raginio kalo bagu mokorongog kau ra TUHAN mindagu, kapoam makakito ra ratangan Nano ondo' bibilak, sabap ra malaa' kau matoi.

¹⁷Ginio ra minindagu TUHAN raki', ‘Kitaak nilono matanda'.

¹⁸Manusub Aku ra sangulun nabi risilo, nabi koson rirun, am intor ra bansa' nilo galama'. Mapasaboi Aku ra bala' Kuno riso, am io[23] mapasaboi ra ngaangai' susuban Kuno ra ulun raginio.

¹⁹Mindagu nabi no ralalom ru inggalan Kuno, am mangukum Aku[24] ra moonong ulun ondo' kalo masaga' gumagaya' riso.

²⁰Kaa' amon ru baani sangulun nabi mapasaboi ra tanou ralalom ru inggalan Kuno, kaa' sotopot no kalo manusub Aku riso mambaal raginio, nabi no musiti' matoi. Moonong nabi ondo' mindagu ralalom ru inggalan ru tuhan-tuhan ra bokon musiti' matoi.’

²¹“Maaru' lair ru kukuot kau ralalom ru guang, ‘Ati kulaan akai makapandai ru tanou ru nabi no intor ra TUHAN kapoam kalo?’

²²Amon ru mindagu sangulun nabi ralalom inggalan ru TUHAN, am ondo' raguon nano kalo masauk, am tanou no pana sala' ka tanou intor ra TUHAN. Minindagu nabi no maya' ra karaan galama', am kalo pana malaa' kau riso.”