Read Timugon Murut SAGULION 19 Bible Online

SAGULION 19 - Timugon Murut bible

SAGULION 19

¹“Mopongo TUHAN i Aki Kapuuno' min mamuso ra bansa'-bansa', manaak Io ramuyun ra tana' nilo. Mopongo magaau min bandar-bandar am baloi nilo am niayuk mayan ra giu' no,

²tayaro' noyo tana' no masauk ra talu wilayah. Moonong wilayah musiti' mokoondo' rondo' bandar ondo' mataki' masaboi, maa' raginio paat mamatoi sasangulun ra ulun bokon, makapagiru' io ra rondo' ra bandar no koson makisindung.

⁴Amon ru kalo siningon namatoi ra ulun ondo' sala' ka pantula' nano, makapagiru' io rondo' ra bandar no maa' raginio mabayag.

⁵Koson ra, amon ruo ngaulun mongoi ra kataunan mantagar ra tataun, am sangulun no liliwa' mantagar, kapak no nabutus intor ra tanggayan am pakatiu' ra rangan nano am patoi. Ulun ondo' namatoi ra kalo siningon no iowon pagiruon ra rondo' ra bandar no maa' raginio kalo potoyon.

⁶Amon rondo' ayuk bandar pakisindungan no, galur ru bandar no maaru' lair maalur kaga' am pabukat-pabukat ondo' makaguang koson mansuli' maaru' makarakop ra ulun ondo' namatoi noyo ra kalo siningon no, am ra likokot ru guang pabukat-pabukat nano mongoi pamatoi ra ulun kolondo' sala. Ulun no namatoi ra kalo siningon, am poyo ulun ondo' pinatoi no sala' ka pantula' nano.

⁷Ginio sabap ra manusub aku ramuyun maa' raginio mapasuai ra talu bandar panindungan.

⁸Paat TUHAN i Aki Kapuuno' min mapalangka' ra tana' min koson ra binantu' Nano ra kinamatuaan mini, am niayuk manaak ra titikop ra tana' ondo' binantu' Nano ramuyun,

⁹am musiti' kau mampili' talu bandar poyo. (Manaak TUHAN ramuyun ra titikop ru tana' no amon mambaal kau ra ngaangai' ondo' panusuban kuno ramuyun ra orou raiti', am amon motogom kau ra TUHAN i Aki Kapuuno' min am niayuk maayag sumugut ra pangilaan Nano.)

¹⁰Baalo' ginio maa' raginio ulun kolondo' sala kalo matoi, am maa' raginio kalo makatula kau sabap namatoi ra ulun ondo' kolondo' sala giu' ra tana' ondo' pataakin ramuyun ru TUHAN i Aki Kapuuno' min.

¹¹“Kaa' suai ru amon sasangulun magawang ra pantula' nano am ra siningon am niayuk masisang mamatoi riso, am magiru' ra rondo' ra bandar panindungan koson makisindung.

¹²Ralalom ru baal raginio tingganai-tingganai intor ra bandar ru ulun namatoi no galama' musiti' mampiau riso, am mapataak riso ra pabukat-pabukat ondo' makaguang koson mansuli' tayar ru namatayan raginio. Koson raginio ulun namatoi no iowon ukumin ra matoi.

¹³Pai' pakaasi' ra ulun namatoi no. Palabuso' ulun ru Israil intor ra ulun namatoi no maa' raginio makakaansayan kau.”

¹⁴“Pai' bandingi' tinatandu' ra balitan ru tana' longgom ru pasambalayan muno ondo' inaru' noyo intor ragili, giu' ra tana' ondo' pataakin ramuyun ru TUHAN i Aki Kapuuno' min.”

¹⁵“Sangulun sasi' kalo maukop koson mapainono' ra kasalaan ru sasangulun. Musiti' no mokoondo' ruo ngaulun sasi' koson mapainono' ra sasangulun no makatula.

¹⁶Amon kuminam sasangulun manguu' ra ulun bokon ra nambaal io ra kalaatan,

¹⁷musiti' ilo karuruo mongoi ra rondo' intok sambayangan no. Giu' no akimin ilo ru imam-imam am akim ondo' mangandoi paat raginio.

¹⁸Akim-akim musiti' mangimumui toojo ra baal raginio. Amon sasangulun sumonsol ra gino ngai' ru bansa' nano,

¹⁹musiti' io ukumin ondo' ukuman ondo' kuayan no ra ulun pinasala nano. Koson raginio akau mamuso ra kalaatan no.

²⁰Moonong ulun pana mokorongog boo ra atan ondo' nasauk noyo. Malaa' ilo, am kolondo' sangulun pana boo baani mambaal ra kinalaat raginio.

²¹Ralalom ru baal-baal raginio, pai' pakitono' makaasi'. Ukuman no musiti' no: painawo aligin ra painawo, mato aligin ra mato, ripon aligin ra ripon, kalindu' aligin ra kalindu' am kalayam aligin ra kalayam.”