Read Timugon Murut SAGULION 21 Bible Online

SAGULION 21 - Timugon Murut bible

SAGULION 21

¹“Amon mapandayan sangulun pinatoi giu' ra padang, giu' ra tana' ondo' pataakon ramuyun ru TUHAN i Aki Kapuuno' min, am kalo makapandai kau osoi namatoi ra ulun no,

²am tingganai-tingganai mino am akim mino musiti' mingkual koson manuku' ra galur intor ra intok ru baangkai no natuum mongoi ra moonong bandar ondo' nakainggaar.

³Kopongo raginio tingganai-tingganai intor ra bandar ondo' nakainggaar ra intok ru baangkai no natuum musiti' mampili' ra sanginan sapi' mamulok ondo' kalo igondo' pinakai ra mangandoi.

⁴Musiti' nilo ibiton sapi' no ra rondo' intok maar ra sungoi boborok ondo' timug no kalo igondo' kalasak, am tana' ra giu' no kalo igondo' rinadu' kapoam tinanaman ra atan pana. Giu' no, musiti' nilo pandakon liog ru sapi' no.

⁵Imam-imam ru bansa' ru Liwi niayuk musiti' mongoi ra giu' no, sabap musiti' ilo mangakim ra moonong baal ondo' makalabit ra kalaatan. Nampili' noyo TUHAN i Aki Kapuuno' min risilo koson mangandoi ayuk Riso am koson mambarakat ra ulun sabap ra inggalan Nano.

⁶Mopongo ginio ngaangai' tingganai intor ra bandar ondo' mamaar kaga' ra intok ru baangkai no natuum, musiti' mambagu' ra kalindu' ra rasawat ru sapi',

⁷liliwa' mindagu, ‘Kalo namatoi akai ra ulun ragitio am kalo nakapandai akai osoi namatoi riso.

⁸Iou TUHAN, ampuno' noyo ulun Muno Israil ondo' binayag Muno intor ra Misir. Ampuno' noyo akai am pai' karaa' ra pinalansan akai ra namatayan ra ulun ondo' kolondo' sala.’

⁹Ginio ra mambaal ra atan ondo' kitaakon ru TUHAN, kalo boo pinalansan kau ra namatayan raginio.”

¹⁰“Paat ra TUHAN i Aki Kapuuno' min nanaak ramuyun ra kamanangan ralalom pangayawan, am nangalap kau ra ulun rinakop ra pangayawan,

¹¹maaru' ra gino ngai' nilo nakakito kou ra sangulun ruandu' mantalur ondo' kalaayin muno, am moogot mu anduon.

¹²Ibito' noyo ruandu' no ra baloi muno. Giu' no sukuri' ulu nano[25] am lampari' salindu nano,

¹³am niayuk ralinin bayang. Ruandu' no musiti' mayan ra baloi muno am mangulir tayar ra matuo nano buoi sansila'. Mopongo ginio, bagu no maandu' mu io.

¹⁴Amon paat ra orou tauli kalo boo masaga' kou riso, palabuso' noyo io. Kalo iowon pamakuan muno riso koson ra ulipon kapoam mantalan riso, sabap jinajalan mu io makimarulug rirun.”

¹⁵“Amon mokoondo' sangulun ondo' makaandu' ruo ngaulun, am karuruo ngaulun andu' no naganak ra anak ungkuyon, kaa' anak ondo' katuaan sala' ka anak ru andu' tagamin nano.

¹⁶Paat ra ulun no masaga' mangaru' ra pantayaran ra rapu' nano ra karuruo ngaulun anak nano, kalo iowon io maayo guang ra anak ru andu' tagamin nano, am aniin no anak no ra tayar ru rapu' ondo' masauk ra tayar tungkuson ru anak katuaan.

¹⁷Musiti' io mantayar ra rapu' induo ruli' ra anak katuaan nano, kabalu' pana anak raginio sala' ka anak ru andu' tagamin nano. Musiti' sangulun ama' mangiou ra anak katuaan nano, am mangani' riso ra tayar ru rapu' ondo' masauk ra tungkuson nano sumugut ra aturan.”

¹⁸Amon mokoondo' sangulun ondo' makaanak ra bambalingatan, masaga' gumuor am kalo gumagaya' ra matuo nano kabalu' pana mangukum ilo riso.

¹⁹Musiti' matuo ru anak no magibit riso ra saang ru tingganai-tingganai ru bandar, intok inayanan nilo, am mangitaak ra akimin anak raginio.

²⁰Musiti' matuo no mindagu ra tingganai-tingganai no, ‘Bambalingatan anak mai, masaga' gumuor am kalo masaga' gumagaya' ramon; mampalubat am magauk.’

²¹Kopongo raginio bala ru ungkuyon giu' ra bandar no musiti' momobol ra anak no saboi matoi. Koson raginio, namuso kau ra kalaatan no. Moonong ulun giu' ra Israil mokorongog ra sauk raginio am malaa'.”

²²“Amon sangulun inukum ra matoi sabap nambaal ra kalaatan, am baangkai nano tairon ra lugu',

²³am baangkai no kalo polosoon matair ra giu' no saboi ra suabon no. Baangkai no musiti' lobongon ra orou raginio niayuk, sabap baangkai ondo' polosoon matair ra lugu' maparatong ra ulas intor ri Aki Kapuuno' ra tana' raginio. Lobongo' noyo baangkai ru ulun no maa' raginio kalo jamalin min tana' ondo' pataakon ramuyun ru TUHAN i Aki Kapuuno' min.”