Read Timugon Murut SAGULION 25 Bible Online

SAGULION 25 - Timugon Murut bible

SAGULION 25

¹“Amon ru ruo ngaulun ru Israil mongoi ra makama koson manalasai ra pansangaran, am sangulun napandayan ra kolondo' sala am sangulun poyo napandayan ra makasala.

²Amon ru ulun ondo' makasala no ukumin ra loposon, akim no musiti' manusub riso lumaub am loposon io. Loposon io nogondo' ra kalaatan ondo' binaal nano.

³Malapos io saboi suang no inggapat ngoopor, kaa' kalo masailan intor raginio. Amon ru masailan intor raginio, asabin ulun no ra saang ru ulun nasuangan.

⁴“Pai' bongkoso' kabang ru sapi' paat mangagik sapi' no ra gandum.”

⁵Amon ru ruo ngaulun mabukat nasimpung ra inayanan, am minatoi sangulun ra kolondo' anak ungkuyon, napuor nano kalo mauwot ru ulun ra bokon suai poyo ra sasambaloi ru ralaki nano. Pabukat ru ulun ondo' minatoi noyo no aruon maguot ra napuor no.

⁶Anak ungkuyon ra katuaan nilo musiti' karaan koson ra anak ru ulun ondo' minatoi no, maa' raginio makapapag io ra gino ngai' ru bansa' ru Israil.

⁷Kaa' amon ru pabukat ru ulun minatoi no kalo masaga' maguot ra napuor no, musiti' napuor no mongoi ra tingganai-tingganai ru bandar no am mindagu, ‘Pabukat ru ralaki kuli kalo masaga' mambaal ra inaru' riso. Kalo masaga' io manaak ra pabukat nano ra papag ra gino ngai' ru bansa' ru Israil.’

⁸Tingganai-tingganai ru bandar no pana musiti' boo mampiau ra ulun no am mindagu riso. Amon ru lakat poyo marara' io maguot ra napuor no,

⁹am musiti' napuor no minggaar riso giu' ra saang ru tingganai-tingganai ru bandar no. Napuor no pana musiti' mamagus sanggipa' ra kasut ru pabukat ru ralaki nali am mantiwog ra bulos nano, liliwa' mindagu, ‘Gitio noyo ondo' masauk ra ulun ondo' kalo masaga' manaak ra papag ra pabukat nano.’

¹⁰Giu' ra Israil, sasambaloi ru ulun no sabiton ra ‘sasambaloi ru ulun ondo' pinagus kasut nano.’ ”

¹¹“Amon ru ruo ngaulun ungkuyon mansangor, am andu' ru sangulun ra ungkuyon no kuminam mangindangan ra andu' nano ra nangkama' ra tingkuangon ru ungkuyon pansangor ru ralaki nano,

¹²pungguo' noyo kalindu' ru ruandu' no. Pai' pakaasi' riso.

¹³“Paat ra akau mamakai ra timbangan kapoam panuku', pai' ruungo' ulun.

¹⁵Pakayo' timbangan am panuku' ra motopot, maa' raginio maawar umur min giu' ra tana' ondo' pataakon ramuyun ru TUHAN i Aki Kapuuno' min.

¹⁶TUHAN i Aki Kapuuno' min masisang ra ulun mamparuung.”

¹⁷“Karaa' noyo atan ondo' binaal ru ulun ru Amalik paat ra akau nangkiralan miningkual intor ra Misir.

¹⁸Kalo malaa' ilo ri Aki Kapuuno'. Namulunsar ilo ramuyun intor ra tinaulian paat akau naagui am kalo maikang, am namatoi ra ngaangai' ulun ondo' natatang ra tinaulian.

¹⁹Ginio ra paat ra TUHAN i Aki Kapuuno' min mampataak ra tana' no ramuyun, am manaak ramuyun ra kamiaan intor ra ngaangai' pantula' ondo' minayan ra liput no, musiti' min potoyon ngaangai' ulun ru Amalik maa' raginio kolondo' sangulun pana boo mangkara' risilo. Pai' liliani' baal ragitio!”