Read Timugon Murut SAGULION 27 Bible Online

SAGULION 27 - Timugon Murut bible

SAGULION 27

¹I Musa pana nabaya' ra tingganai-tingganai ru bansa' ru Israil, mindagu ra ulun raginio, “Gagayaa' noyo ngaangai' susuban ondo' pataakon kuno ramuyun ra orou raiti'.

²Paat ra orou akau liminaup ra Sungoi Jordan am nakasaboi giu' ra tana' ondo' pataakon ramuyun ru TUHAN i Aki Kapuuno' min, musiti' min potolorogon kukula' batu maayo am kapurin batu raginio.

³Tulisi' noyo ngaangai' ukum ti ra batu-batu raginio. Paat ra akau makasaboi giu' ra tana' ondo' langkaya' am malabung ondo' binantu' ru TUHAN i Aki Kapuuno' min ra kinamatuaan min,

⁴am soroi kau giu' ra sandaup ru Sungoi Jordan, potolorogo' batu-batu no giu' rasawat ru Gunung Ibal koson ra nanusuban kuno ra raino ti, am kapuri' noyo batu-batu no.

⁵Baalo' noyo rondo' altar intor ra batu ondo' kalo igondo' ginarit ra basi',

⁶sabap altar ondo' baalon min tayar ru TUHAN i Aki Kapuuno' min musiti' baalon intor ra batu ondo' kalo ginarit. Musiti' kau mapataak ra taak simbalui koson mapabansuk ra guang ru TUHAN,am solobo' noyo ngaangai' no giu' ra rasawat ru altar no.

⁷Pataako' niayuk taak simbalui koson makibarakat ra TUHAN,[29] am akano' noyo taak simbalui no ra giu' no, am niayuk maansukan giu' ra saang ru TUHAN i Aki Kapuuno' min.

⁸Ginio ra batu-batu no ondo' kinapuran no, tulisi' noyo ra matanda' moonong ragu intor ra ukum ri Aki Kapuuno' no.”

⁹Kopongo raginio i Musa, nabaya' ra imam-imam ru Liwi, minindagu ra ngaangai' ulun ru Israil, “Rongogo' noyo, ulun ru Israil kau ngai' am tutuno'. Paat ra orou raiti' nasauk kau noyo ra ulun ru TUHAN i Aki Kapuuno' min.

¹⁰Ginio ra gagayaa' noyo TUHAN i Aki Kapuuno' min am baalo' noyo ngaangai' susuban Nano ondo' taakin kuno ramuyun ra orou raiti'.”

¹¹I Musa pana mindagu boo ra ulun ru Israil,

¹²“Mopongo kau makalaup ra Sungoi Jordan, bansa' ru Simion, Liwi, Jiuda, Isakar, Jusup, am Binjamin musiti' migor giu' rasawat ru Gunung Girijim, paat raguon barakat tayar ru ulun ru Israil.

¹³Paat raguon pagulasan, bansa' ru Rubin, Gad, Asyir, Dan, Jibulon am Naptali musiti' migor giu' rasawat ru Gunung Ibal.

¹⁴Ulun ru Liwi musiti' mindagu ra ragu ragitio ra bolos mosongou:

¹⁵“ ‘Kaulas noyo ulun ondo' mambaal ra sinungkalalaing intor ra batu, tataun, kapoam basi', am sumamba raginio ra sinokon. Masisang TUHAN ra sumamba ra sinungkalalaing.’ “Ngaangai' ulun tumaam ra, ‘Amin!’

¹⁶“ ‘Kaulas noyo ulun ondo' magasab ra ina' kapoam ama' nilo.’ “Ngaangai' ulun tumaam ra, ‘Amin!’

¹⁷“ ‘Kaulas noyo ulun ondo' mapabanding ra tatandu' ru balitan ru tana' ru pasambalayan nilo.’ “Ngaangai' ulun tumaam ra, ‘Amin!’

¹⁸“ ‘Kaulas noyo ulun ondo' mapalayau ra ulun bolou.’ “Ngaangai' ulun tumaam ra, ‘Amin!’

¹⁹“ ‘Kaulas noyo ulun ondo' tumalingaau ra kaapuan ru ulun bansa' ru bokon, anak nailusan ra matuo am napuor.’ “Ngaangai' ulun tumaam ra, ‘Amin!’

²⁰“ ‘Kaulas noyo ulun ondo' manauyu' ra ama' nilono sabap namparulug ra sangulun intor ra andu' ru ama' nilono.’ “Ngaangai' ulun tumaam ra, ‘Amin!’

²¹“ ‘Kaulas noyo ulun ondo' marulug ra bibiag.’ “Ngaangai' ulun tumaam ra, ‘Amin!’

²²“ ‘Kaulas noyo ulun ondo' marulug ra pongkotob ra ruandu', kapoam pansukapu ra ruandu'.’ “Ngaangai' ulun tumaam ra, ‘Amin!’

²³“ ‘Kaulas noyo ulun ondo' marulug ra iwan ruandu' nano.’ “Ngaangai' ulun tumaam ra, ‘Amin!’

²⁴“ ‘Kaulas noyo ulun ondo' nambaal ra pamatayan ra sinokon.’ “Ngaangai' ulun tumaam ra, ‘Amin!’

²⁵“ ‘Kaulas noyo ulun ondo' nangapu ra ayup koson mamatoi ra ulun ondo' kolondo' sala.’ “Ngaangai' ulun tumaam ra, ‘Amin!’

²⁶“ ‘Kaulas noyo ulun ondo' kalo gumagaya' ra ukum am pangilaan ri Aki Kapuuno'.’ “Ngaangai' ulun tumaam ra, ‘Amin!’ ”