Read Timugon Murut SAGULION 29 Bible Online

SAGULION 29 - Timugon Murut bible

SAGULION 29

¹Gitio noyo kitaak-kitaak ra nabantuan ondo' sinusub ru TUHAN ri Musa, koson binaal ra ulun ru Israil paat ilo giu' ra tana' Moab. Nabantuan raginio pinaruang ra nabantuan ondo' binaal ru TUHAN risilo giu' ra Gunung Sinai.

²Nanusub i Musa ra ngaangai' ulun ru Israil tumimung am indagu risilo, “Nakito min galama' atan ondo' binaal ru TUHAN ra raja' ru Misir, pagawai-pagawai nano am titikop ru pagun nano.

³Nakito min noyo maruol tumapik ondo' makalalaa', kaimuagan am baal makaimuag ondo' binaal ru TUHAN.

⁴Kaa' saboi orou raiti' lakat poyo kalo mangiou Io ramuyun makarati' ra ngaangai' ondo' nailian min noyo.

⁵Buoi apat ngoopor ngambilor paat TUHAN naningganai ramuyun mansail ra tana' kaagisan, bayang am kasut min kalo naapu'.

⁶Kolondo' ruti' ra akanon min, wain kapoam inumon makagauk ra inumon, kaa' nanampos TUHAN ra ngaangai' pakuan min maa' raginio makapandai kau ra Io noyo i Aki Kapuuno' min.

⁷Paat ra itakau nakasaboi ra intok ragitio, ratong Raja' Sigon intor ra Gisybon am Raja' Og intor ra Basan namulunsar ritakau, kaa' kinala takau ilo

⁸am ginaau tana' nilo. Tinaakan takau boo tana' nilo ra bansa' ru Rubin, Gad am sampiruo ra bansa' ru Manasi.

⁹Gagayaa' noyo toojo ngaangai' kitaak ru nabantuan ti maa' raginio makasugut kau ralalom ngaangai' ru kandoi min.

¹⁰“Paat ra orou raiti' migor kau ngaangai' ra saang ru TUHAN i Aki Kapuuno' min: ngaangai' tingganai, pagawai, bala ru ungkuyon,

¹¹bala ru ruandu', lalaing am ulun bansa' ru bokon ondo' minayan ramuyun, ondo' namutul ra tataun am niayuk nansagou ramuyun ra timug.

¹²Soroi kau ragiti paat ra orou raiti' koson mambaal ra nabantuan ondo' binaal ru TUHAN i Aki Kapuuno' mino ramuyun, am koson mangapu ra kandoi-kandoi inaru'.

¹³Ra nabantuan raginio, nangiou TUHAN ramuyun masauk ra ulun Nano, am nasauk Io ri Aki Kapuuno' min, koson ondo' binantu' Nano ramuyun am ra kinamatuaan min, i Abragam, i Isak am i Jakub.

¹⁴Nambaal TUHAN ra nabantuan ti ra ngaangai' kitaakon no, sala' ka akai ayuk

¹⁵kaa' ra itakau ngaangai' ondo' minigor ragiti paat ra orou raiti', giu' ra saang ru TUHAN i Aki Kapuuno' takau am niayuk ra papag takau paat ra orou matong.”

¹⁶“Lakat poyo akau nangkara' ra kaayagan min giu' ra Misir, am baal no ra akau nansail ra pagun-pagun ru bansa' ra bokon.

¹⁷Nakito min sinungkalalaing nilo ra majamol, ondo' binaal intor ra tataun, batu, pirok am mas.

¹⁸Ginio ra alungi' noyo maa' raginio kolondo' sangulun pana ragiti ra orou raiti', iou ra ungkuyon, ruandu', sasambaloi kapoam bansa' ondo' timinalikur intor ra TUHAN i Aki Kapuuno' takau, am samba ra tuhan ru bansa' ru bokon. Baal raginio koson ra bakat ondo' tumuu' masauk ra tatanom mapait am makaanit.

¹⁹Ra gino ngai' min ondo' nokorongog ra kitaak moporos no ra orou raiti', pai' sangulun pana ondo' mangkara' ra io magulayun mabayag kabalu' pana gumogot toojo io am manugut ra kasagaan nano galama'. Binaal koson raginio mamuso ramuyun ngaangai', ulun ondo' moonsoi am ondo' malaat.

²⁰Kalo mangampun TUHAN ra ulun koson raginio. Kaa' sangit ru TUHAN ondo' bibilak mangumpo ra ulun no, am ngaangai' karaat ondo' natulisan ralalom ru kitab ti makalumpa' riso saboi mamuso TUHAN lingon riso.

²¹Mapasauk TUHAN riso ra rondo' tiluan giu' ra saang ru ngaangai' bansa' ru Israil, am mampalumpa' riso ra ngaangai' ulas ondo' sabiton ralalom ru nabantuan, ondo' natulisan ralalom ru kitab ti, ondo' makasuang ra pangilaan ru TUHAN.

²²“Paat ra orou matong, papag min am ulun bansa' ru bokon intor ra pagun mangaalur makakito ra karaat am kaimbalaan ondo' porotongon ru TUHAN ra tana' min.

²³Umo mino masauk ra mapua' am kolondo' onong sabap ra natauban ru bilirang am usi'. Kalo matanaman tana' raginio, am kalo tuwin ru sakot giu' no. Masauk tana' mino koson ra bandar Sodom, Gomora, Adma am Jiboim ondo' pinuso ru TUHAN paat Io siminangit kaga'.

²⁴Paat raginio titikop ru tana' ti mangkuot, ‘Kua kia nambaal TUHAN koson raginio ra tana' nilo? Atan kia ondo' nangkinibit Riso siminangit ra makalalaa' raginio?’

²⁵Taaman no iono, ‘Sabap ra liminungkang ulun ru TUHAN ra nabantuan ondo' binaal nilo ra TUHAN i Aki Kapuuno' ru kinamatuaan nilo, atika Io nagibit risilo miningkual intor ra Misir.

²⁶Mangandoi ilo ra tuhan-tuhan ra bokon ondo' kalo igondo' ilo samba, sotopot no manginggalar TUHAN risilo mambaal koson raginio.

²⁷Ginio ra siminangit TUHAN ra ulun Nano am naparatong ra ngaangai' karaat ondo' natulisan ralalom ru kitab ti ra tana' nilo.

²⁸Sangit ru TUHAN no moporos kaga' saboi bubulon No ulun ru Israil intor ra pagun nilo, am patirin ilo ra tana' ru bansa' ru bokon saboi ra orou raiti'.’

²⁹Topot ra mokoondo' kukula' baal ondo' kalo pinabala' ru TUHAN i Aki Kapuuno' takau, kaa' nambala' Io noyo ritakau ra Ukum Nano, am itakau am niayuk papag takau musiti' maya' raginio ra sabubuoi no.”