Read Timugon Murut SAGULION 33 Bible Online

SAGULION 33 - Timugon Murut bible

SAGULION 33

¹Ra kalo poyo minatoi, i Musa, ulipon ri Aki Kapuuno' no, nambarakat ra ulun ru Israil ra ragu-ragu ragitio:

²Minatong TUHAN intor ra Gunung Sinai; Siminila' io koson ra mato ru orou giu' ra rasawat ru Idom, am intor ra Gunung Paran simininda Io ra ulun Nano. Riribu malaikat mabaya' Riso; ra kalindu' pamiris Nano mokoondo' ra apui ondo' bibilak.

³Motogom TUHAN ra ulun Nano;[32] Mangampin Io ra ngaangai' ulun ondo' masauk ra longgom Nano. Ginio sabap ra kumubu takau ra saang Nano, am gumagaya' ra susuban Nano.

⁴Gumagaya' takau ra Ukum ondo' tinaakan ri Musa ritakau; ginio noyo rapu' ru bansa' ondo' mologo kaga'.

⁵Masauk TUHAN ra raja' ru Israil, ulun Nano paat ra bansa'-bansa' ru Israil natitimung nabaya' ra tingganai-tingganai nilo.

⁶Intor ra bansa' ru Rubin, indagu i Musa, “Gama' ru bansa' ru Rubin kalo mapuso, kabalu' pana suang nilo sanganu ayuk.”

⁷Intor ra bansa' ru Jiuda, indagu io, “Iou TUHAN, rongogo' noyo piau nilo makiindangan. Pasimpungo' noyo ilo saguli' ra bansa'-bansa' ra bokon. Iou TUHAN, pangayou noyo tayar risilo, am indangano' noyo ilo gumula' ra pantula' nilo.”[33]

⁸Intor ra bansa' ru Liwi, indagu io, “Iou TUHAN, pabalaa' noyo kasaga' Muno ralalom ru Urim am Tumim,[34] ralalom ru ulun ru Liwi, ulipon Muno ondo' gumagaya'. Nangkinam Kou noyo risilo giu' ra Masa, am napainono' ra gagaya' nilo giu' ra taur ru timug Miriba.

⁹Napakito ilo ra pampagagayaan Rirun ondo' nasailan ra pampagagayaan ra matuo, pabukat kapoam anak. Ginagaya' nilo susuban Muno am minintopot ra nabantuan Muno.

¹⁰Mangila' ilo ra ulun Muno am gumagaya' ra Ukum Muno; Mapataak ilo ra taak simbalui giu' ra rasawat ru altar Muno.

¹¹Iou TUHAN, indangano' noyo bansa' nilo masauk ra maikang, gama' ru maansayan kou ra kandoi nilo. Tutuko' noyo ngaangai' pantula' nilo, polosoo' noyo pantula' nilo kalo lumuat saguli'.”

¹²Intor ra bansa' ru Binjamin, indagu io, “Gitio noyo bansa' ondo' tagamin am sindungin ru TUHAN; magalung Io risilo ra tutukir paat, minayan Io ra tatanga' nilo.[35]

¹³Intor ra papag ri Jusup, indagu io, “Gama' ru mambarakat TUHAN ra tana' nilo ra rasam, am ra timug intor ra ragana' ru tana'.

¹⁴Gama' ru mambarakat TUHAN ra tana' nilo ra kikinawa' ondo' maansak giu' ra puun, am manaak risilo ra masuang kawa' paat ra tutukir bulintok.

¹⁵Gama' ru bulur-bulur lair nilo, matauban ru kikinawa' ondo' moonsoi kaga'.

¹⁶Gama' ru mapanu' tana' nilo ra ngaangai' ondo' moonsoi, tana' ondo' barakaton ra kinoonsoi ru TUHAN, Io ondo' igondo' minindagu intor ra bulungkut ondo' bibilak. Gama' ru barakat-barakat ragitio pasasaron ra papag ri Jusup, sabap ra io tingganai ra gino ngai' ru pongkotob nano.

¹⁷Mokoondo' i Jusup ra kaikangan ru sapi' gawayan, am sangau ru sapi' gawayan ru kataunan. Sangau nano papag ri Manasi ondo' riribu, am papag ri Ipraim ondo' kaaparan ribu. Ra ngaangai' ulun ti nanangau io ra bansa'-bansa', am napagiru' risilo saboi ra pompor ru tana' ti.”

¹⁸Intor ra bansa' ru Jibulon am Isakar, indagu io, “Gama' ru Jibulon langkaya' sabap ra pantalanan giu' ra intok ra bokon, am gama' ru kalangkayaan ri Isakar sumingkot giu' ra pangkiman.

¹⁹Nangkimait ilo ra bansa' ru bokon mongoi ra gunung; giu' no mapataak ilo ra taak simbalui ondo' kaansayin. Makaalap ilo ra kalangkayaan intor ra raat, am intor ra agis ra galur ru nagas.”

²⁰Intor ra bansa' ru Gad, indagu io, “Omporo' noyo i Aki Kapuuno' ondo' napalangka' ra intok nilo. Nagiginaa i Gad koson ra sanginan singa', masaga' maminsang ra longon kapoam kungkung ru ulu.

²¹Mangalap ilo ra tana' ondo' moonsoi kaga' ra tayar nilo galama'. Makaalap ilo ra tayar ru sangulun tingganai. Gumagaya' ilo ra susuban am ukum ru TUHAN, paat ra tingganai-tingganai ru Israil mabaya' tumimung.”[36]

²²Intor ra bansa' ru Dan, indagu io, “Koson i Dan ra sanginan singa' mamulok ondo' tuminindak mingkual intor ra Basan.”

²³Intor ra bansa' ru Naptali, indagu io, “Labain i Naptali ra barakat am togom ru TUHAN; tana' nilo mapila' intor ra Tasik Galilia saboi ra rabugus.”

²⁴Intor ra bansa' ru Asyir, indagu io, “Barakaton i Asyir nasailan intor ra bansa'-bansa' ra bokon. Gama' ru tagamin io ru pabukat-pabukat nano, gama' ru lumabung puun jaitun giu' ra tana' nano.

²⁵Gama' ru ampinin bandar-bandar nano ru kulobon garabang basi', gama' ru bayag nano magail moonsoi am mamimio.”

²⁶Akau ulun ru Israil, kolondo' ondo' koson ri Aki Kapuuno' mino, ondo' marapas ra limbowon ra katulayan, am mujak ra gaun koson mangindangan ramuyun.

²⁷I Aki Kapuuno' ondo' mantilayun masauk ra mangampin ramuyun, am kalindu' Nano manungka' ramuyun. Paat ra akau jumalai, napagiru' Io ra pantula' min, am nanusub ramuyun mamuso risilo ngaangai'.

²⁸Ginio ra papag ri Jakub maayag ra mamimio; makakaansayan ilo giu' ra tana' ondo' napanu' ra wain am gandum; am basaan tana' no ru bolobou intor ra limbowon.

²⁹Akau Israil, maansukan kau kaga'! Kolondo' osoi pana koson ramuyun, bansa' ondo' binayag ru TUHAN. TUHAN galama' noyo ondo' nasauk ra perisai am ilang min, koson manaung ramuyun am manaak ramuyun ra kamanangan. Matong pantula' min makimasi', am kikinjangin min ilo.[37]