Read Timugon Murut SAGULION 34 Bible Online

SAGULION 34 - Timugon Murut bible

SAGULION 34

¹Iruani' boo ri Musa tana' marata' ru Moab am pagaloi ra Gunung Nibo, mongoi ra tampak ru Gunung Pisga tampilon ra sirangon ru bandar Jiriko. Giu' no nanulu' TUHAN ra titikop ru tana' no riso: wilayah Giliad saboi ra bandar Dan giu' ra ralayo;

²titikop ru wilayah Naptali; wilayah Ipraim am Manasi; wilayah Jiuda tampilon ra kalasaan saboi ra Raat Tanga';

³tayar rabugus ru Jiuda; am tana' marata' intor ra Joar saboi ra Jiriko, bandar ru puun kurma.

⁴TUHAN pana mindagu boo ri Musa, “Ginio noyo tana' ondo' binantu' Kuno ri Abragam, i Isak am i Jakub koson pataakon ra papag nilo. Pakitonon Ku okou raginio kaa' kalo poongoyon Ku okou ra giu'.”

⁵Kopongo raginio i Musa, ulipon ru TUHAN no, minatoi giu' ra tana' ru Moab, koson ra ondo' rinagu noyo ru TUHAN.

⁶Linobong io ru TUHAN giu' ra rondo' limayak giu' ra Moab, ondo' nantaluma' ra bandar Bit-Pior. Kaa' saboi orou raiti' kolondo' sangulun pana nakapandai ra nampalabangan no.

⁷Umur ri Musa maatus am ruo ngoopor ngambilor paat io minatoi. Paat ra io minatoi, lakat poyo maikang inan nano am lakat poyo makakito io.

⁸Ulun ru Israil nangulir ri Musa buoi talu ngoopor ngoorou giu' ra tana' marata' ru Moab.

⁹Nanaak TUHAN ra kapintaran ri Josua anak ri Nun sabap sinauk ri Musa io ra suali nano. Giminagaya' ulun ru Israil ri Josua am niayuk nambaal ra susuban ondo' tinaakan ru TUHAN risilo ondo' pinasaboi galing ri Musa.

¹⁰Intor raginio, kolondo' nabi koson ri Musa giu' ra Israil; minindagu TUHAN ri Musa ra nampakito ra bulos.

¹¹Kolondo' boo nabi ondo' igondo' nambaal ra kaimuagan am baal makaimuag koson ra binaal ri Musa; nanusub TUHAN ri Musa nambaal ra kaimuagan am baal makaimuag koson manggal ra raja' ru Misir, pagawai-pagawai ru raja' am titikop ru pagun no.

¹²Kolondo' nabi ra bokon ondo' nambaal ra baal maayo am makalalaa' koson ra binaal ri Musa ra saang ru ngaangai' ulun ru Israil.