Read Timugon Murut SAGULION 4 Bible Online

SAGULION 4 - Timugon Murut bible

SAGULION 4

¹Indagu boo i Musa ra ulun raginio, “Gagayaa' noyo ngaangai' ukum ondo' inila' kuno ramuyun, maa' raginio maayag kau am makaayan ra tana' ondo' taakin ru TUHAN i Aki Kapuuno' ru kinamatuaan min ramuyun.

²Pai' ruangi' sanganu pana am pai' irurui' sanganu pana ra atan ondo' nanusuban kuno. Gagayaa' noyo susuban ru TUHAN i Aki Kapuuno' min ondo' pinasaboi ku noyo ramuyun.

³Nakakito kau noyo galama' ra atan ondo' binaal ru TUHAN giu' ra Gunung Pior. Giu' no namuso io ra moonong ulun ondo' sumamba ra Baal,

⁴kaa' akau ondo' magulayun giminagaya' ra TUHAN i Aki Kapuuno' min lakat poyo naayag saboi orou raiti'.

⁵“Nangila' aku noyo ramuyun ra ngaangai' ukum no, koson ra nanusuban ru TUHAN i Aki Kapuuno' kuno. Gagayaa' noyo ngaangai' ukum raginio giu' ra tana' ondo' gaawon am ayanin min.

⁶Gagayaa' noyo ukum no ra matanda'. Koson raginio, kapintaran min makito toojo ra ulun ra bokon. Paat akau nokorongog ra ngaangai' ukum no, mindagu kau, ‘Mapara' kinapintar am kinatanda' ru bansa' ondo' maayo no!’

⁷“Kolondo' bansa' ra ati pana, kabalu' pana bansa' maayo, ondo' makatuhan ondo' mamaar kaga' paat makapakuan risilo koson ra TUHAN i Aki Kapuuno' takau mamaar ritakau. Tumaam Io ra sasanggilan takau mampiau makiindangan.

⁸Kolondo' bansa' ra ati pana, kabalu' pana bansa' maayo, ondo' makaukum matanda' koson ra ukum ondo' nangilaan kuno ramuyun ra orou raiti'.

⁹Pagilalain! Tutunon ra buoi akau maayag, kalo noyo toojo malilianan min baal ondo' nakito min noyo ra mato min galama'. Balai' noyo anak akupu mino

¹⁰intor ra orou raginio, paat akau minigor giu' ra saang ru TUHAN i Aki Kapuuno' min giu' ra Gunung Sinai.[4] Paat raginio minindagu Io raki', ‘Timungo' ngaangai' ulun ragitio. Masaga' aku risilo rumongog ra bala' Kuno maa' raginio migila' ilo gumagaya' Raki' sabuoi ru bayag, am maa' raginio mangila' ilo ra anak-anak nilo koson gumagaya' Raki'.’

¹¹“Balai' anak-anak mino ati kulaan akau minatong am minigor giu' ra pipilon ru gunung ondo' natauban ru gaun makapal intor ra lisun maitom, am ru apui ondo' mapaang saboi ra limbowon.

¹²Balai' ilo ati kulaan TUHAN minindagu ramuyun intor ralalom ru apui no, am ati kulaan akau nokorongog ra bolos Nano kaa' kalo nakakito Riso ralalom atan pana baal.

¹³Nambala' Io ramuyun ra atan moonsoi baalon min koson sumugut ra nabantuan ondo' binaal Nano ramuyun; musiti' gagayaan min Mopor Ukum ondo' tinulisan Nano ra ruo batu tulis.

¹⁴Nanusub TUHAN raki' mangila' ramuyun ra ngaangai' ukum ondo' musiti' gagayaan min giu' ra tana' ondo' mataki' min gaawon am ayanin.”

¹⁵“Paat ra TUHAN minindagu ramuyun intor ralalom ru apui giu' ra Gunung Sinai, kalo nakakito kau ra atan baal pana. Ginio ra, tutuno' noyo maa' raginio

¹⁶kalo makatula kau ra mambaal ra sinungkalalaing ra akau galama' ralalom ru atan pana baal no, iou pana ra baal ru ungkuyon kapoam ruandu',

¹⁷bibiag, susuit,

¹⁸bibiag mamuntana' kapoam papait.

¹⁹Pai' kaambi' koson sumamba am mangandoi ra ondo' makito giu' ra limbowon, iono mato ru orou, sila' am butitin. Nanaak noyo TUHAN, Aki Kapuuno' mino ra kuliamos raginilo ra ngaangai' bansa' ra bokon ra sambaan.

²⁰Kaa' akau iono bansa' ondo' binayag Nano intor ra Misir, intok koson ra rapuan mampaliou ra basi' ondo' mapaang. Nagibit Io ramuyun miningkual intor ra pagun raginio maa' raginio masauk kau ra ulun Nano galama' koson ra baal min ra orou raiti'.

²¹Sabap ra akau, siminangit TUHAN i Aki Kapuuno' min raki', saboi nagibot Io ra kalo makalaup aku ra sandaup ru Sungoi Jordan koson mongoi ra tana' ondo' malabung, ondo' pataakin Nano ramuyun.

²²Matoi aku ragiti am kalo makalaup ra sungoi raginio. Kalo boo mabuoi lumaup kau raginio am mayan ra tana' ondo' malabung no.

²³Karaa' noyo toojo! Pai' liliani' nabantuan ondo' binaal ru TUHAN i Aki Kapuuno' min ramuyun. Gagayaa' susuban Nano; pai' noyo lingon pambaal ra sinungkalalaing ralalom atan pana baal no ra tayar ramuyun,

²⁴sabap TUHAN i Aki Kapuuno' mino koson ra apui ondo' mangumpo. Kalo masaga' Io pogondoon ra atan pana.

²⁵“Paat akau mabuoi noyo mayan ra pagun raginio am makaanak akupu noyo, pai' pambaal ra tula ra mambaal ra sinungkalalaing ralalom baal ru atan pana ra tayar ramuyun galama'. Binaal raginio malaat ra mato ru TUHAN, am baal raginio mangkinibit Riso sumangit.

²⁶Paat ra orou raiti' manusub aku ra limbowon am tana' ti masauk ra sasi' ramuyun ra amon kalo gumagaya' kau raki', mataki' kau maliom intor ra tana' ti. Kalo mabuoi akau mayan giu' ra tana' ra sandaup ru Sungoi Jordan, ondo' mataki' min ayanin. Mapuso kau kalingon.

²⁷Mapatuliar TUHAN ramuyun ra popolos ru bansa'-bansa' ra bokon, am sanganu ayuk ra gino ngai' min maayag.

²⁸Giu' no sumambayang kau ra tuhan-tuhan ondo' binaal ru kalindu' ru ulun, tuhan intor ra tataun am batu, ondo' kalo makakito kapoam mokorongog, mangakan kapoam mangalok.

²⁹Giu' no ra tauli no maguyum kau ra TUHAN i Aki Kapuuno' min, am amon maguyum kau Riso ra sotopot-topot ru guang, makatuum kau Riso.

³⁰Paat ra akau ralalom kapaganan am ngaangai' baal makalalaa' no makalumpa' ramuyun, bagu no sumaguli' kau ra TUHAN i Aki Kapuuno' min am gumagaya' Riso.

³¹TUHAN i Aki Kapuuno' min iono i Aki Kapuuno' ondo' makaasi'. Kalo mangiruan kapoam mamuso Io ramuyun. Kalo lilianin No nabantuan ondo' binaal Nano galama' ra kinamatuaan min.

³²“Intutuno' paat ra galing, nabuoi ra akau kalo poyo inanak, timinalimpuun intor ra paat ri Aki Kapuuno' nambaal ra ulun giti ra tana' ti. Ilai' noyo ra titikop ru tana' ti. Igondo' kia baal maayo ragitio nasauk? Igondo' kia osoi pana nokorongog ra sauk koson ragitio?

³³Igondo' kia mokoondo' bansa' magulayun naayag malupus nokorongog ra rondo' tuhan mindagu intor ralalom ru apui koson ra nailian min?

³⁴Igondo' kia mokoondo' rondo' tuhan ondo' baani mangalap rondo' ulun intor ra bansa' ra bokon am saukon ulun raginio ra ulun nano galama', koson ondo' binaal ru TUHAN i Aki Kapuuno' min tayar min giu' ra Misir? Giu' ra talupak ru mato min galama' namakai Io ra kuasa' am kaikangan Nano ondo' maayo; maparatong Io ra maruol tumapik am pangayawan, mambaal ra kaimuagan am makaimuag, am niayuk mangkinibit ra baal makalalaa' masauk.

³⁵Binaal ru TUHAN ngaangai' baal raginio maa' raginio makapandai kau ra Io rondo'-rondo' noyo TUHAN, am kolondo' boo bokon.

³⁶Nangiou Io ramuyun rumongog ra bolos Nano intor ra limbowon maa' raginio makapangila' Io ramuyun; giti ra tana' ti mangiou Io ramuyun magilong ra apui Nano ondo' matulai, am intor ra apui no minindagu Io ramuyun.

³⁷Sabap ra motogom Io ra kinamatuaan min, nampili' Io ramuyun; am ra kuasa' Nano ondo' maayo, Io galama' nagibit ramuyun miningkual intor ra Misir.

³⁸Napagiru' Io ra bansa'-bansa' ondo' maayo poyo am maikang poyo intor ramuyun, maa' raginio makapagibit Io ramuyun mongoi ra tana' nilo, am manaak ramuyun ra tana' raginio. Saboi raino tana' no lakat poyo akau tatangan.

³⁹Ginio ra karaa' noyo ra orou raiti' am pai' liliani' ra TUHAN rondo'-rondo' i Aki Kapuuno' giu' ra limbowon am giti ra tana' ti; kolondo' boo bokon.

⁴⁰Gagayaa' noyo ngaangai' ukum Nano ondo' pinataak kuno ramuyun ra orou raiti', akau am papag min pana makakaansayan. Magulayun kau mayan ra tana' ondo' tinaakan ramuyun ru TUHAN i Aki Kapuuno' min koson masauk ra longgom min ra sabubuoi no.”

⁴¹Kopongo raginio nampili' i Musa talu bandar giu' ra tampilon sirangon ru Sungoi Jordan.

⁴²Bandar-bandar raginio masauk ra intok ru sasangulun mibayag, amon kalo siningon no mamatoi ra sangulun ondo' sala' ka pantula' nano. Ulun ondo' namatoi no iowon magiru' ra rondo' ra bandar raginio am kalo potoyon io.

⁴³Bandar Bijir giu' ra tana' marata' masawat ru tana' kaagisan tinaakan koson ra bandar pangampinan tayar ru bansa' ru Rubin. Bandar Ramot giu' ra libung Giliad tinaakan koson ra bandar pangampinan tayar ru bansa' ru Gad. Bandar Golan giu' ra libung Basan tinaakan koson ra bandar pangampinan tayar ru bansa' ru Manasi.

⁴⁴Nangani' i Musa ra ukum am pangilaan ri Aki Kapuuno' ra ulun ru Israil.

⁴⁵Nangani' i Musa risilo ra ukum raginio malupus ilo miningkual intor ra Misir, am soroi giu' ra tampilon sirangon ru Sungoi Jordan, giu' ra limayak ra sandaup ru bandar Bit-Pior. Libung ragitio nakasimpung ra wilayah ondo' ragili Raja' Sigon tatangan, raja' ru ulun ru Amori, ondo' nakaili' namarinta giu' ra bandar Gisybon. Kinala ri Musa am ulun ru Israil raja' no paat ilo miningkual intor ra Misir.

⁴⁶

⁴⁷Minayan ilo ra tana' ru Raja' Sigon, am niayuk tana' ru Raja' Og giu' ra Basan, sangulun raja' ru Amori ra bokon ondo' minayan giu' ra tampilon ru Sungoi Jordan.

⁴⁸Tana' ondo' inayanan nilono malangka' saboi ra bandar Aroir giu' ra kiing ru Sungoi Arnon, am rayus ra ralayo saboi ra Gunung Siryon,[5] iono Gunung Girmon;

⁴⁹am niayuk nakasimpung titikop libung giu' ra tampilon sirangon ru Sungoi Jordan saboi ra Raat Matoi giu' ra tampilon rabugus, am giu' ra pipilon ru Gunung Pisga giu' ra tampilon sirangon.