Read Timugon Murut SAGULION 6 Bible Online

SAGULION 6 - Timugon Murut bible

SAGULION 6

¹“Nanusub TUHAN i Aki Kapuuno' min raki' mangila' ramuyun ra ngaangai' ukum ti. Gagayaa' noyo ngaangai' no giu' ra tana' ondo' mataki' min ayanin.

²Buoi ru bayag, musiti' akau am papag min mangurumat ra TUHAN i Aki Kapuuno' min am gumagaya' ra ngaangai' ukum Nano ondo' taakin kuno ramuyun, maa' raginio maawar painawo min giu' ra tana' raginio.

³Rongogo' noyo am gagayaa' noyo ukum-ukum raginio, ulun ru Israil kau ngai'! Koson raginio ra akau makakaansayan am masauk ra bansa' ondo' maikang, am niayuk mayan giu' ra tana' ondo' langkaya' am malabung no, koson ra ondo' binantu' noyo ru TUHAN i Aki Kapuuno' ru kinamatuaan takau.

⁴“Karaa' noyo, Israil kau ngai'! TUHAN — am rondo' ayuk TUHAN — iono i Aki Kapuuno' takau.[7]

⁵Tagami' noyo TUHAN i Aki Kapuuno' min ra sotopot-topot ru guang: Pakitono' noyo togom no ralalom baal ru bayag am baalon mino.

⁶Pai' lingonon liliani' ukum ondo' taakin kuno ramuyun ra orou raiti'.

⁷Pailaa' noyo ukum raginio ra anak-anak mino. Raguo' noyo ukum raginio paat akau giu' ra baloi kapoam mugar, paat akau tumangus kapoam mangandoi.

⁸Pobongkoso' ukum raginio ra kalindu' min am pobongkoso' ginio ra rabas min[8] koson ra tatandu' pangkaraan.

⁹Tulisi' noyo ukum raginio ra lugu' ru kulobon ru baloi am ra kulobon ru insor min.”

¹⁰“Nambantu' noyo TUHAN i Aki Kapuuno' min ra kinamatuaan min i Abragam, i Isak am i Jakub ra manaak Io ramuyun ra tana' ondo' mokoondo' ra bandar mangaayo am langkaya', ondo' kalo baalon min.

¹¹Baloi ra giu' no nototop ra kuliamos mongoonsoi, ondo' kalo binulian min. Mokoondo' niayuk tulubong-tulubong ondo' kalo kinali min, am niayuk umo ru anggur am umo ru jaitun ondo' kalo tinanom min. Paat ra magibit TUHAN ramuyun mongoi ra tana' raginio am mokoondo' kau ra ngaangai' ondo' tiakanon min,

¹²pagilalain maa' raginio kalo malilianan min TUHAN ondo' nagibit ramuyun miningkual intor ra Misir, intok min inulipon ragili.

¹³Urumato' noyo TUHAN i Aki Kapuuno' min am samba Riso ayuk am baalo' noyo bantu' min ralalom ru inggalan Nano ayuk.

¹⁴Pai' samba ra tuhan-tuhan ra bokon, kapoam tuhan ru ati pana ondo' sambaan ru bansa'-bansa' ondo' minayan ra liliut min.

¹⁵Amon ru sumamba kau ra tuhan-tuhan ra bokon, sumangit TUHAN no ramuyun. Sangit Nano koson ra apui, am pusoon kau lingono', sabap ra TUHAN i Aki Kapuuno' min ondo' soroi ra tatanga' mino, kalo masaga' pogondoon ra atan pana.

¹⁶“Pai' pangkinam ra TUHAN i Aki Kapuuno' min koson ondo' binaal min giu' ra Masa.

¹⁷Tutuno' noyo maa' raginio gumagaya' kau ra ngaangai' ukum ondo' tinaakan Nano ramuyun.

¹⁸Baalo' noyo atan ondo' moonsoi am matanda' ra pagilangan ru TUHAN, am makakaansayan kau. Akau tatangan ra tana' ondo' malabung, ondo' binantu' noyo ru TUHAN ra kinamatuaan mini,

¹⁹am mapagiru' kau ra pantula' koson ondo' binantu' Nano.

²⁰“Paat ra orou matong, mangkuot anak-anak min, ‘Kua ra TUHAN i Aki Kapuuno' takau nanusub ritakau koson gumagaya' ra ngaangai' ukum no?’

²¹Balain ilo boo, ‘Galing i ulipon takau ru raja' ru Misir, kaa' napalabus TUHAN ritakau ra kuasa' Nano ondo' maayo.

²²Akai galama' nakakito Riso nambaal ra kaimuagan am baal ondo' napakalalaa' ra ulun ru Misir, raja' nilo am ngaangai' pagawai ru raja'.

²³Napalabus TUHAN ritakau intor ra Misir koson nagibit ritakau mongoi ragiti, am nanaak ritakau ra tana' ragitio koson ondo' binantu' Nano ra kinamatuaan takali.

²⁴Kopongo raginio TUHAN i Aki Kapuuno' takau nanusub ritakau ra gumagaya' ra ngaangai' ukum raginio, am koson mangurumat riso. Amon ru baalon takau koson raginio, magail Io magalung ra bansa' takau am mapasauk raginio ra langkaya'.

²⁵Amon ru gumagaya' takau ra ngaangai' ondo' nanusuban ri Aki Kapuuno' ritakau,[9] am maansayan Io ritakau.’ ”