Read Timugon Murut SAGULION 8 Bible Online

SAGULION 8 - Timugon Murut bible

SAGULION 8

¹“Gagayaa' noyo ra totopot ngaangai' ukum ondo' pataakon kuno ramuyun ra orou raiti', maa' raginio marayus kau maayag am rumuang suang mino, am makaayan ra tana' ondo' binantu' ru TUHAN ra kinamatuaan min.

²Karaa' noyo ati kulaan TUHAN i Aki Kapuuno' min naningganai ramuyun ralalom pangkiralanan ra maalur giu' ra tana' kaagisan buoi apat ngoopor ngambilor ragili; naparatong ra kapaganan koson mangkinam ramuyun maa' raginio makapandai Io ra suang ru guang min, am makapandai ra gumagaya' kau kapoam kalo ra susuban Nano.

³Nopoloso Io ramuyun maitilan am nanaak ramuyun ra manna, iono rondo' salinut ru akanon ondo' kalo igondo' kau pangakan kapoam kinamatuaan mini. Nambaal Io raginio koson nangila' ramuyun ra ulun kalo maayag ra ruti' ayuk, kaa' ra moonong ragu ru TUHAN.

⁴Buoi ru apat ngoopor ngambilor no, bayang min kalo naapu', am kalayam min kalo liminanit.

⁵Karaa' noyo TUHAN i Aki Kapuuno' min nansawai ramuyun nogondo' koson ra sangulun ama' nansawai ra anak-anak nano.

⁶Ginio ra gagayaa' noyo susuban ru TUHAN; kaayag noyo sumugut ra ukum Nano am gagayaa' noyo Io.

⁷TUHAN i Aki Kapuuno' min tatanga' magibit ramuyun mongoi ra tana' ondo' malabung, tana' ondo' mokoondo' ra sungoi am taur ru timug, am niayuk sungoi boborok giu' ragana' ru tana' ondo' bubuluak mongoi ra limayak-limayak am bulur-bulur;

⁸tana' ondo' manangampos ra gandum am barli, kawa' ru anggur, kawa' ru ara, kawa' ru dalima', kawa' ru jaitun am ruu' ru maningot.

⁹Giu' no kalo maitilan kau kapoam mairuruan ra atan pana. Batu giu' ra tana' raginio mokoondo' ra basi' am makakal min tambaga' giu' ra bulur-bulur.

¹⁰Makaalap kau ra ngaangai' ondo' moogot min akanon, am maringkuanang kau ra TUHAN i Aki Kapuuno' min tayar ru tana' malabung ondo' taakin Nano ramuyun.”

¹¹“Tutuno' noyo maa' raginio kalo lilianin min TUHAN i Aki Kapuuno' min. Pai' kaliliani' gumagaya' ra rondo' ukum pana ondo' taakin kuno ramuyun ra orou raiti'.

¹²Paat maalap min noyo ngaangai' ondo' tiakanon min, am nambaal noyo ra baloi mongoonsoi koson ra intok ayanan min;

¹³paat sapi' am domba, mas am pirok, am niayuk ngaangai' rapu' min ra bokon giminaai suang,

¹⁴tutuno' noyo maa' raginio kalo malilimbau kau, am kalo lilianin TUHAN i Aki Kapuuno' min ondo' nagibit noyo ramuyun miningkual intor ra Misir, intok min inulipon ra galing i.

¹⁵Naningganai Io ramuyun mansail ra tana' kaagisan ondo' malangka' am makalalaa' no, intok ondo' inayanan ru kukuo makaanit am lingait. Giu' ra tana' ondo' mapua' am kolondo' timug no, napaingkual Io ramuyun ra timug intor ra bulur batu.

¹⁶Giu' ra tana' kaagisan nanaak Io ramuyun ra manna, rondo' salinut ru akanon ondo' kalo igondo' akano' ru kinamatuaan min. Naparatong Io ra kapaganan koson mangkinam ramuyun, maa' raginio paat ra pupus no mobonsoi Io ramuyun.

¹⁷Ginio ra pai' lingon mangkara' ra lumangkaya' kau sabap kuasa' am kaikangan min galama'.

¹⁸Karaa' noyo ra TUHAN i Aki Kapuuno' min raginio noyo ondo' napalangkaya' ramuyun. Nambaal Io ra baal raginio sabap saboi orou raiti', lakat poyo Io nanutun ra nabantuan ondo' binaal Nano ra kinamatuaan mini.

¹⁹Pai' liliani' TUHAN i Aki Kapuuno' min am pai' ongoi ra tuhan-tuhan ra bokon koson sumamba am mangandoi ra tuhan-tuhan raginio. Pakaraan Takamin ra orou raiti' ra amon mambaal kau niayuk, maaru' mapuso kau.

²⁰Amon kalo gumagaya' kau ra TUHAN, am pusoon kau koson ra bansa'-bansa' ondo' pinuso Nano paat akau jiminalai.”