Read Timugon Murut JUANIS 11 Bible Online

JUANIS 11 - Timugon Murut bible

JUANIS 11

¹ Mokoondo' sangulun ungkuyon makainggalan ri Lajarus ondo' marualan. Io ti intor ra pamagunan Bitania am pagaka' io ri Maria am i Marta. I Maria ti noyo ondo' nampabuur ra umau maamis owou ra kalayam ru Tuhan, am piiri' no ra abuk nali.

³Magaka' ra ruandu' ti nampasaboi ra bilin ri Jisus ra; “Tuhan, rangan ra tagamin Muno marualan.”

⁴Pakaining i Jisus ra bilin i, indagu Io, “Maruol ragitio kalo mangkinibit ra kapatayan; kaa' masauk baal ragitio maa' raginio katulayan ri Aki Kapuuno' am Anak Nano pakitonon.”

⁵Motogom toojo i Jisus ri Marta, i Maria am i Lajarus.

⁶Kabalu' pana nokorongog Io ra i Lajarus marualan, siminingon Io soroi ra giu' i buoi karuaan poyo.

⁷Indagu boo i Jisus ra maamaya' Nano, “Saguli' takau ra Judia.”

⁸Taam maamaya' Nano, “Mangingila', kalo poyo nabuoi ra bobolon kou raan ra batu ru ulun ru Jaudi am raino rumuli' kou po kia ra giu' i?”

⁹Indagu i Jisus, “Orou ti matawang mopor am ruo nganjam. Amon ru sasangulun no mugar ra matawang, kalo makasaru io, sabap ra makito no ralan.

¹⁰Kaa' amon ru sasangulun no mugar ra molondom, makasaru io, sabap ra kolondo' sinda riso.”

¹¹Kon raginio noyo ragu ri Jisus, am indagu poyo, “I Lajarus rangan takano nombolong, am ongoyon Ku io karato'.”

¹²Ginio ra indagu maamaya' Nano, “Mangingila', amon ru nombolong i Lajarus, mapali' io ra maagu no.”

¹³Kaa' ondo' kon ri Jisus ni am minatoi noyo i Lajarus. Kaa' indos nilo, kon Nani, nombolong ayuk toojo i Lajarus.

¹⁴Ginio ra pambala' toojo i Jisus risilo, “Minatoi noyo i Lajarus.

¹⁵Kaa' naringkuanang Aku niayuk ra kalo nokosoroi ra giu' i, maa' raginio mangintopot kau. Raino ongoi takau ra intok ri Lajarus no.”

¹⁶Ginio ra i Tomas, ondo' niayuk sabiton Magapir, minindagu io ra maamaya' ra bokon no, “Ibok, marurumar takau matoi!”

¹⁷Pakasaboi i Jisus ra giu' i, ilai' No naapatan noyo i Lajarus linobong.

¹⁸Pamagunan Bitania ti olo'-olo' talu kilomito galur intor ra Jirusalim.

¹⁹Masuang ulun ru Jaudi minongoi panimayo ri Maria am i Marta sabap ra pinatayan ru pagaka' nilai, i Lajarus.

²⁰Pakaining ayuk i Marta ra nakaratong noyo i Jisus, ongoyo' no umaa', kaa' i Maria soroi ayuk ra baloi.

²¹Indagu i Marta, “Tuhan, amon ru nokosoroi kou ra giti, maaru' ungkuyon mai kalo matoi.

²²Kaa' makapandai aku ra raino ti pana iowon ri Aki Kapuuno' atan ayuk kitaakon Muno Riso.”

²³Taam i Jisus, “Pagaka' muno bayagon saguli'.”

²⁴Kon ri Marta, “Iou, makapandai aku i Lajarus bayagon saguli' paat ra ulun namagatoi paluaton ra Orou Pupus.”

²⁵Indagu i Jisus, “Aku noyo mampakaayag ra ulun minatoi am manaak ra kaayagan. Osoi ayuk mangintopot Raki', kabalu' pana matoi ulun no, maayag Io saguli'.

²⁶Ulun ondo' maayag am mangintopot Raki', kalo mantilayun io matoi. Mangintopot kou kia ragitio?”

²⁷Kon ri Marta, “Iou Tuhan, mangintopot aku ra Okou noyo Anak ri Aki Kapuuno', Mamamayag ondo' inaru' noyo matong ra tana' ti.”

²⁸Karagu ri Marta gini, ongoyo' no sinoko' piawo' pongkotob nano i Maria. Kon ri Marta riso, “Sumuku' noyo Mangingila' am mompoongoi Io rirun.”

²⁹Kaining ayuk ri Maria, ingkakat io am pagindibok ongoi uma' ri Jisus. (

³⁰Paat ragili kalo poyo nakasuku' Io ra pamagunan no. Lakat Io ayuk poyo soroi ra intok inumaan ri Marta Riso.)

³¹Ulun-ulun ru Jaudi ondo' namparangan ri Maria ra baloi i, nakakito riso nagindibok miningkakat am ingkual, sunu' ilo boo riso. Indos nilai mongoi io pantangi' ra kalabangan ri Lajarus.

³²Pakasuku' io ra intok ri Jisus am kakito no, igulatur io ra saang Nali am indagu, “Tuhan, amon ru nokosoroi Kou ragiti, maaru' ungkuyon mai kalo matoi.”

³³Paat ri Jisus nakakito riso nantangi', am niayuk ulun-ulun ru Jaudi ondo' nababaya' riso i nantatangi', mangiluk toojo guang Nali am makaasi' Io.

³⁴Pangkuot Io boo risilo, “Ati kia nampalabangan min riso?” Taam ilo, “Ibok, ongoyo' takau ilai', Tuhan.”

³⁵Pantangi' boo i Jisus.

³⁶Indagu ulun-ulun ru Jaudi, “Ilai', mumpara' boo togom Nano ri Lajarus!”

³⁷Kaa' kon ru bokon i, “Mamabas Io ra mato ru ulun bolou, kaa' kua pai' No kaalap ra inga' pinatayan ri Lajarus i?”

³⁸Mulu' poyo ngiluk ru guang ri Jisus, am ongoi Io boo ra kalabangan. Lobong i rondo' luang batu ondo' inangaban ra batu maayo.

³⁹Indagu i Jisus, “Insiro' min batu no.” Kaa' i Marta, pagaka' ru minatoi i, timinaam, “Tuhan, maaru' mootong noyo baangkai no, naapatan noyo io linobong.”

⁴⁰Indagu i Jisus, “Sala' ka kia nambala' Aku no rirun; amon ru mangintopot kou, makakito kou ra kuasa' ri Aki Kapuuno'?”

⁴¹Insiro' nilo boo batu i. Pantingaa' boo i Jisus ra limbowon am indagu, “Ama', paringkuanangan Ku Rirun, sabap ra rinongog Mu noyo pakiasian Kuno.

⁴²Nakapandai Aku ra masalok Kou mangkirongog ra pakiasian Kuno. Kaa' rinagu Ku kon raginio, koson giatilo ondo' soroi ragiti mangintopot ra Okou noyo nanusub Raki'.”

⁴³Pakaindagu raginii, golok boo i Jisus ra mosongou, “Lajarus, ingkual!”

⁴⁴Ingkual boo ulun minatoi i. Kalindu' am kalayam nali lakat ayuk poyo nakulumput ra konoon mapulak am bulos nali pana nakulumput ra konoon. Kon ri Jisus ra ulun-ulun ra giu' no, “Iruo' min konoon no am polosoo' io luminjau.”

⁴⁵Masuang ulun ru Jaudi ondo' minatong ra intok ri Maria am nakakito ra nasauk ni, nangintopot ri Jisus.

⁴⁶Kaa' kukula' ngaulun intor risilo i siminaguli' am pambala' ra ulun ru Parisi ra binaal ri Jisus i.

⁴⁷Ginio ra ulun ru Parisi am tingganai imam Jaudi miting ra Majlis Ugama. Konilo, “Atan nua' baalon takau? Ilai', masuang kaimuagan binaal ru ulun ti!

⁴⁸Amon ru polosoon takau ayuk Io, ngaangai' ru ulun mangintopot Riso. Pupus no, tingganai ru pagun Roma mongoi pampalunsai ra Baloi Tuhan takau am mamuso ra ngaangai' bansa' takau.”

⁴⁹Kaa' sangulun intor risilo i, makainggalan ri Kayapas, io no Tingganai Maayo Imam Jaudi paat ra bilor ragili, minindagu, “Akau ti kolondo' katandaan!

⁵⁰Kalo kia matutunan min ra moonsoi poyo sangulun suali ayuk matoi intor ra ngaangai' ru bansa' mapuso?”

⁵¹Sotopot no rinagu nati kalo sumugut ra pangkaraan nali galama', kaa' koson sangulun Tingganai Maayo Imam Jaudi bilor ragili, nambala' io ra i Jisus ti potoyon koson ra kaatangan ra ulun ru Jaudi.

⁵²Sala' ka kaatangan ra ulun ru Jaudi ayuk, kaa' koson manimung ra ngaangai' anak ri Aki Kapuuno' ondo' nantutuliar.

⁵³Intor orou ragili niayuk tingganai ru ulun ru Jaudi nampapakat mamatoi ri Jisus.

⁵⁴Ginio ri Jisus kalo boo minintalang ra ulun masuang ra Judia, kaa' minongoi Io ra pekan Ipraim, maar ra tana' kaagisan, am ayan Io am maamaya' Nano ra giu' i.

⁵⁵Paat ragili Pangiantakan ra Paska mamaar noyo, am masuang ulun intor ra moonong pamagunan minongoi ra Jirusalim. Maya' ilo ra kaulayan pambaguan ra kalo poyo masaboi pangiantakan no.

⁵⁶Naguyum ilo ri Jisus, am paat ra ilo timinimung giu' ra Baloi Tuhan i, nangkukuot ilo ra rondo' am bokon, “Atan guang muno? Matong Io nua' ra pangiantakan ti?”

⁵⁷Sabap ra mokoondo' noyo susuban intor ra tingganai imam am ulun-ulun ru Parisi, ra osoi ayuk makapandai ra ati i Jisus, musiti' mambala' maa' raginio marakop nilo Io.