Read Timugon Murut JUANIS 12 Bible Online

JUANIS 12 - Timugon Murut bible

JUANIS 12

¹Onom ngoorou poyo Pangiantakan ra Paska, minongoi i Jisus ra Bitania, pamagunan ri Lajarus ondo' binayag Nano saguli'.

²Giu' i pinaakan nilo Io. I Marta nampasulung ra akanon liliwa' i Lajarus mabaya' ra tambului nagayam ri Jisus.

³Alapo' boo ri Maria sambutul umau maamis owou narwastu ondo' mologo kaga' makasuang satanga' ngalito. Pabuuro' no ra kalayam ri Jisus, am piiri' no ra abuk nali. Maalok boo owou ru umau i ra ngaangai' intok ru baloi i.

⁴Kaa' i Judas Iskariot, sangulun intor ra maamaya' ri Jisus, ondo' mampataak Riso ra pantula' Nano ra maagu no, minindagu ra,

⁵“Kua pai' talano' umau no ra logo talu ngaatus ruit pirok,[38] am ruit no pataakon ra ulun musikin?”

⁶Rinagu no ginio sala' ka sabap ra masaga' io mangindangan ra ulun musikin, kaa' sotopot no io sangulun mantatakou. Io ti mampaguut ra rumpit nilai, am maindalom io noyo mantakou ra ruit ondo' pinabulian riso.

⁷Kaa' indagu i Jisus riso, “Polosoo' io ayuk! Mambaal io raginio koson ra mangkara' ra orou pampalabangan Raki'!

⁸Ulun musikin masalok soroi ramuyun, kaa' aku kalo.”

⁹Masuang ulun ru Jaudi nakaining ra i Jisus soroi ra Bitania. Gili ra ilo pana minongoi ra giu' i, am sala' ka sabap ri Jisus ayuk, kaa' masaga' ilo niayuk magilong ri Lajarus ondo' binayag saguli' ri Jisus.

¹⁰Ginio ra tingganai imam Jaudi gumogot mamatoi ri Lajarus poyo.

¹¹Sabap ra io ti noyo nangkinibit ra masuang ulun ru Jaudi nangiruan risilo am nangintopot ri Jisus.

¹²Io suabon ragili, ulun masuang ondo' minongoi pangiantak ra Paska, nakaining ri Jisus tatanga' mangkiralan mongoi ra Jirusalim.

¹³Alapo' nilo raun palma am ongoi uma' Riso, golok ilo, “Omporo' noyo i Aki Kapuuno'! Kabarakat noyo Io ondo' matong ralalom ra inggalan ru Tuhan! Kabarakat noyo raja' ru Israil!”

¹⁴Paat ragili natuum ri Jisus sanginan kaladai mamulok am kurai' no kaladai i, koson tinulisan noyo ra Buuk Kitab;

¹⁵“Pai' kalaa' mamagun ru bandar Sion![39] Ilai', mokoondo' raja' min matong nangura' ra sanginan kaladai mamulok!”

¹⁶Mamaya' Nano kalo nakarati' kua baalo' no gini. Kaa' kalupus ayuk katulayan ri Jisus pinaintalang mansail ra pinatayan am linuatan Nano, kakara' nilo boo ragu ru Buuk Kitab ra ngaangai' ti binaal nilo Riso.

¹⁷Nantunung poyo ulun-ulun no ondo' nakasaang paat ri Jisus nampiau ri Lajarus miningkual ra lobong am namayag riso saguli'.

¹⁸Ginio sabap ra ulun masuang minuma' ri Jisus, sabap ra nakaining ilo ra Io noyo ondo' nambaal ra kaimuagan i.

¹⁹Ulun-ulun ru Parisi nagindagu ra rondo' am bokon, konilo, “Ilai', ngaangai' ulun ru tana' ti maya' boo Riso. Banangan takau ayuk!”

²⁰Kukula' ngaulun ru Junani pana minongoi ra Jirusalim koson maya' sambayang ra pangiantakan i.

²¹Minongoi ilo uma' ri Pilipus am konilo, “Tuan, masaga' akai toojo tumuum ri Jisus.” (I Pilipus ti intor ra pamagunan Bitsaida, libung ru Galilia.)

²²Ongoi balai' ri Pilipus i Andrias, am ongoi ilo pambala' ri Jisus.

²³Indagu i Jisus risilo, “Nasuku' noyo orou ra Anak ru Ulun katulayon.

²⁴Balain takamin toojo: Amon ru sangunor gandum kalo tiason ra tana', kalo matoi io am sangunor io ayuk. Kaa' amon ru tiason am matoi io, manangkawa' io ra masuang.

²⁵Ginio mogondo' niayuk ra osoi ayuk motogom ra kaayagan nano galama', matatakan io ra kaayagan nano. Kaa' osoi ayuk mampataak ra kaayagan no giti ra tana' ti, makaapu io ra kaayagan mantilayun.

²⁶Osoi ayuk mangandoi Raki' musiti' io maya' Raki', maa' raginio ati ayuk angayan Kuno, soroi mangangandoi Kuno. I Ama' Kuno mangurumat ra osoi ayuk ondo' mangandoi Raki'.”

²⁷“Maimamang Aku raino. Atan nua' raguon Kutu? Raguon Ku kia, ‘Ama', pai' Aku paintumaa' ragitio’? Kalo, gitio ra aku minatong, koson makaili' aku ra kaimbalaan ti.

²⁸Ama', pakitono' noyo katulayan Muno.” Morongog boo mokobolos intor ra suruga', “Pinakito Ku noyo katulayan Kuno, am pakitonon Ku poyo.”

²⁹Ulun masuang ondo' soroi ra giu' i nakaining ra bolos i. Gili ra konilo, “Tingkalur.” Kaa' mokoondo' niayuk minindagu, “Malaikat minindagu Riso.”

³⁰Kaa' indagu i Jisus risilo, “Bolos naining i sala' ka mangindangan Raki', kaa' mangindangan ramuyun.

³¹Raino ti noyo pangakiman ra ulun ru tana' ti; raino ti alapon noyo kuasa' intor riso ondo' manguasa' ra tana' ti.

³²Paat ra Aku ti painsawaton intor ra tana', poongoyon Ku ngaangai' ulun Raki'.”

³³Rinagu No koson raginio koson mambala' ra ati kulaan Io matoi.

³⁴Taam ru ulun masuang Riso, “Sumugut ra Ukum ri Musa, Mamamayag ondo' sinusub ri Aki Kapuuno' i maayag ra mantilayun. Ati kulaan mindagu Kou ra Anak ru Ulun musiti' painsawaton intor ra tana' ti? Osoi Anak ru Ulun no?”

³⁵Indagu i Jisus, “Kalo boo mabuoi sinda no mayan ramuyun. Tungguli' noyo pangkiralanan min buoi ru sinda no soroi ramuyun, koson kalo maliputan kau ru kalandaman. Ulun ondo' mangkiralan ra kalandaman kalo mapandayan no ati kaangayan.

³⁶Pangintopot kano ra sinda buoi no soroi ramuyun, koson masauk kau ra ulun ondo' mayan ra sinda.” Karagu ri Jisus gini, iruani' No ilo am pansibuni Io.

³⁷Kabalu' pana nambaal Io masuang kaimuagan ra saang nilai, kalo nangintopot ilo Riso,

³⁸koson nasugut boo bala' pinasaboi ru nabi Jisaya: “Tuhan, osoi kia mangintopot ra pambalaan mai? Osoi nua' papakitanan ra kuasa' ru Tuhan?”

³⁹Kalo nakapangintopot ilo, sabap ra nakaindagu niayuk nabi Jisaya;

⁴⁰“Nompokoolou i Aki Kapuuno' ra mato nilai, am nambaal risilo mailo mangarati'; koson mato nilai kalo makakito, am guang nilai pana kalo makarati'; am kalo sumaguli' ilo ra Tuhan, koson babason No ilo.”

⁴¹Rinagu ri nabi Jisaya koson raginio sabap ra nakakito io no ra katulayan ri Jisus am nampabala' io no ra sauk intor Riso.

⁴²Kabalu' pana raginio, masuang niayuk tingganai ru ulun ru Jaudi nangintopot ri Jisus. Kaa' kalo makakau' ilo mangiou raginio, sabap ra malaa' ilo mapandayan ru ulun ru Parisi am inggalarin ilo mumpos ra baloi sambayangan.

⁴³Sabap ra maansayan ilo poyo makiurumat ra ulun kaa' makiurumat ri Aki Kapuuno'.

⁴⁴Bagu kosongowo' ri Jisus ragu Nali, kon No, “Osoi ayuk mangintopot Raki', sala' ka Aku ayuk inintopot no, kaa' Io ondo' nanusub Raki' pana.

⁴⁵Osoi ayuk makakito Raki', makakito io niayuk ra Io ondo' nanusub Raki' i.

⁴⁶Aku minatong ra tana' ti koson ra sinda, maa' raginio moonong ulun ondo' mangintopot Raki' kalo boo mayan ra kalandaman.

⁴⁷Osoi ayuk mangkirongog ra ragu Kutu kaa' kalo gumagaya', kalo ukumin Ku io. Aku minatong sala' ka mangakim ra ulun ru tana' ti, kaa' mamayag risilo.

⁴⁸Osoi ayuk manginggi' Raki' am ragu Kuno, mokoondo' noyo mangakim riso. Ragu ondo' pinasaboi Kuli mangakim riso ra Orou Pupus.

⁴⁹Sabap ra kalo minindagu Aku sumugut ra kuasa' Kuno galama', kaa' i Ama', ondo' nanusub Raki', nambala' ra atan ondo' raguon am posoboyon Kuno.

⁵⁰Nakapandai Aku no ra panusuban Nano mangani' ra kaayagan mantilayun. Ginio ra posoboyon Kuno atan ondo' pinabala' ri Ama' no Raki'.”