Read Timugon Murut JUANIS 13 Bible Online

JUANIS 13 - Timugon Murut bible

JUANIS 13

¹Songorou poyo am tumalimpuun Pangiantakan ra Paska. Nakapandai i Jisus ra masaboi noyo paat Nano mangiruan ra tana' ti sumaguli' ra Ama' Nano. Masalok Io monogom ra maamaya' Nano, am tinagaman No ilo saboi ra pupus.

²Nagagakan i Jisus am maamaya' Nano, am Tingganai ru riwato no minindagu ra guang ri Judas, anak ri Simon Iskariot, koson mampataak ri Jisus ra pantula' Nano.[40]

³Nakapandai i Jisus ra ngaangai' kuasa' pinataak noyo ri Ama' Riso. Nakapandai Io niayuk ra minatong Io intor ri Aki Kapuuno' am sumaguli' poyo Riso.

⁴Ginio boo ra ingkakat Io, aluso' No sukub Nali am pobongkoso' No tiwala' ra awak Nali.

⁵Suangi' ri Jisus rondo' bisin ra timug am tumalimpuun mambagu' ra kalayam ru maamaya' Nano. Kabagui' raiti, piiri' No boo ra tiwala' pinabangkos No ra awak Nali.

⁶Pakasuku' i Jisus ri Simon Pitrus, kon ri Simon, “Tuhan, topot-topot Kou mambagu' ra kalayam kutu?”

⁷Taam i Jisus, “Kalo makarati' kou raino, kaa' maagu no makarati' kou ra baalon Kutu.”

⁸Indagu i Pitrus Riso, “Kalo Tuhan, kalo noyo pabaguin ku kalayam kutu Rirun!” Kaa' kon ri Jisus, “Amon ru kalo baguin tokou, kalo boo karaan kou ra maamaya' Kuno.”

⁹Kon ri Simon Pitrus, “Tuhan, amon ru koson poyo raginio, sala' ka kalayam kutu ayuk baguin Muno, kaa' kalindu' am ulu kutu pana.”

¹⁰Indagu i Jisus riso, “Osoi ayuk nakapariu', mapasau noyo ngaangai' inan nano; am kalayam nano ayuk boo baguin.[41] Mapasau kano, kaa' sala' ka akau ngai'.” (

¹¹Sabap ra nakapandai noyo i Jisus osoi mampataak Riso ra pantula' Nano. Ginio ra rinagu No, “Mapasau kano, kaa' sala' ka akau ngai'.”)

¹²Kabagui' ayuk ri Jisus kalayam nilai, bayango' No saguli' sukub Nali am panturung Io po. Indagu Io boo risilo, “Makarati' kau kia kua baalo' Ku ginii ramuyun?

¹³Mampiau kau Raki' ra Mangingila' am Tuhan. Motopot noyo pampiawan mino, sabap ra Aku no Mangingila' am Tuhan.

¹⁴Amon ru Aku ti noyo Tuhan am Mangingila' min, nambagu' ra kalayam min, akau pana musiti' mambagu' ra kalayam ru rondo' am bokon.

¹⁵Nanulu' Aku noyo ramuyun, maa' raginio mambaal kau ra atan ondo' binaal Kuli noyo ramuyun.

¹⁶Balain takamin toojo: Sangulun ulipon kalo maatang poyo intor ra tuan nano. Mogondo' niayuk ra sangulun sinusub kalo maatang poyo intor ra nanusub riso.

¹⁷Amon ru makapandai kau raginio, mulu' poyo bansuk min amon ru suguton min.

¹⁸Sala' ka akau ngaangai' kon Kuli. Nakapandai Aku osoi pinili' Kuli. Kaa' ragu ru Buuk Kitab ragitio suguton noyo, ‘Ulun ondo' gumulung Raki' mangakan, tumula' io Raki'.’

¹⁹Balain takamin raino ra kalo poyo masugut baal ragitio, maa' raginio ra io masauk ra maagu no, mangintopot kau ra ‘Aku noyo AKU’.[42]

²⁰Balain takamin toojo: Osoi ayuk mangapu ra ulun sinusub Kuno, Aku pana apuon no. Am osoi ayuk mangapu Raki', apuon no niayuk Io ondo' nanusub Raki'.”

²¹Karagu ri Jisus ginio, maimamang am pambala' Io, “Balain takamin toojo: Sangulun intor ramuyun mampataak Raki' ra pantula' Kuno.”

²²Pototontong maamaya' Nano ra rondo' am bokon, sabap ra kalo nakapandai ra osoi kon Nano.

²³Sangulun intor ra maamaya' ri Jisus nanturung ra sapapa' Nano, io ti noyo ondo' tagamin ri Jisus.

²⁴Ginio ra anii' io ri Simon Pitrus ra pulanu am indagu, “Kuati' ga Mangingila' no, osoi kon Nano.”

²⁵Inggaari' no boo i Jisus am pangkuot, “Tuhan, osoi kon Muni?”

²⁶Taam i Jisus, “Ondo' aniin Ku ra ruti' ra patunjakon ti, io no ginio.” Alapo' boo ri Jisus sangkinis ruti', tunjaki' No am taaki' No ri Judas, anak ri Simon Iskariot.

²⁷Kaalap ayuk ri Judas ruti' i, subol bagu Tingganai ru riwato riso. Indagu boo i Jisus riso, “Baalo' noyo atan guangon muno ra mataki'!”

²⁸Kaa' kolondo' sangulun pana intor risilo ondo' nangakan i, nakarati' kua indagu i Jisus ri Judas koson raginii.

²⁹Sabap ri Judas ti mampaguut ra ruit nilai, ginio ra kukula' intor risilo nangkara' ra sinusub io ri Jisus mambali ra atan ondo' maatang ra pangiantakan, kapoam mantayar ra ruit no ra ulun musikin.

³⁰Kaalap ayuk ri Judas ruti' i, paringkaagou io ingkual. Paat ragili molondom noyo.

³¹Pakaugar i Judas, indagu i Jisus, “Raino noyo Anak ru Ulun katulayon; am raino niayuk i Aki Kapuuno' katulayon ralalom Riso.

³²Amon ru i Aki Kapuuno' katulayon ralalom Riso, katulayon Io niayuk ri Aki Kapuuno' galama', am pongoon No ginio ra mataki'.

³³Anak-anak ondo' tagamin Kuno, kalo boo mabuoi Aku soroi ramuyun. Maguyum kau pana Raki'; kaa' ondo' rinagu Kuno ra tingganai ru ulun ru Jaudi, raino raguon Ku poyo ramuyun, ‘Kalo mokoongoi kau ra angayan Kuno.’

³⁴Gitio noyo panusuban bagu ondo' raguon Kutu ramuyun; Kotogom kano ra rondo' am bokon. Koson ra Aku motogom ramuyun, akau niayuk musiti' motogom ra rondo' am bokon.

³⁵Amon ru motogom kau ra rondo' am bokon, bagu mapandayan ru ngaangai' ulun ra akau no maamaya' Kuno.”

³⁶Pangkuot i Simon Pitrus ri Jisus, “Tuhan, ati angayan Mu?” Taam i Jisus, “Kalo mokoongoi kou ra angayan Kuno raino, kaa' makasunu' kou niayuk ra tauli no.”

³⁷Pangkuot poyo i Pitrus, “Tuhan, kua pai' aku pakaaya' raino? Nakatampos aku noyo mampataak ra painawo kuno koson Okou.”

³⁸Taam i Jisus riso, “Totopot kia mampataak kou ra painawo muno koson Aku? Balain tokou toojo: Kalo poyo maningkuluuk manuk tandaa' no, intalu kono magali' ra makaulig kou Raki'!”